Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ иIофышIэхэм очылхэм я Адыгэ республикэ коллегие иочылэу гъэпцIагъэкIэ ахъщэшхо дзэкъулыкъушIэхэм къаIызыхыщтыгъэм игъогупэ пабзыкIыгъ.
Нафэ къызэрэхъугъэмкIэ, юридическэ фэIо-фашIэхэр зыгъэцакIэщтыгъэ очылым хэушъхьафыкIыгъэ дзэ операциер зыщыкIорэ чIыпIэм щыIэ дзэкъулыкъушIэхэр ыгъэгугъэщтыгъэх дзэ къулыкъум ахэр къыхагъэкIыжьынхэмкIэ IэпыIэгъу афэхъунэу. Ащ пае сомэ миллионитIу къыратын фаеу ариIощтыгъ, ау зэригъэгугъагъэхэр ыгъэцэкIэжьыщтыгъэп.Урысыем и Уголовнэ кодекс ия 159-рэ статья ия 4-рэ Iахь диштэу Урысые Федерацием и Следственнэ комитет Адыгэ РеспубликэмкIэ иследственнэ гъэIорышIапIэ уголовнэ Iоф очылым къыфызэIуихыгъ.Следователыр зэрэкIэлъэIугъэм тетэу очылэу Iоф зышIэщтыгъэр иунэ икIын фимытэу унашъо ашIыгъ. БзэджэшIагъэм лъапсэ фэхъугъэхэм ягъэунэфын тегъэпсыхьэгъэ следственнэ Iофтхьабзэхэр джырэкIэ зэрахьэх.