М. Гордышов
Мыекъуапэ игъогушхо шъхьаIэхэм ащыщэу Хьахъуратэм ыцIэ зыхьырэ урамым игъэцэкIэжьын рагъажьэ. Къалэм щыпсэухэрэр бэрэ зэжэгъэхэ хъугъэ-шIагъэм иегъэжьапIэ къызэрэблэгъагъэр къыIопщыгъ Адыгеим и ЛIышъхьэ.
«Гъогум игъэкIэжьын мыщ ищыкIэгъэ шъыпкъ. Хьылъэзещэхэр нахь макIэ хъунхэм пае Мыекъуапэ къэзыухьэрэ гъогу тшIыгъэ ыкIи Хьахъуратэм ыцIэ зыхьырэ урамым къалэм блэкIэу рыкIорэм ипчъагъэ нахь макIэ хъугъэ. Мы проектым изэшIохын илъэс заулэрэ тыпылъыгъ. Гъогушхо шъхьаIэм иигъэкIотыгъэ гъэцэкIэжьын ичэзыу шъолъырым рихъухьагъ, ащ къыдыхэлъытагъэх гъогумрэ лъэсрыкIоным тегъэпсыхьагъэхэмрэ ателъыр зэблэхъугъэныр, тамыгъакIэхэр тегъэуцогъэнхэр, зэрэгъэтхъыгъэр гъэкIэжьыгъэныр, нэфынэр тегъэуцогъэныр, рыкIопIэ зэфэшъхьафхэр чIычIэгъ шIыгъэнхэр, ощхыпсыр зэрылъэдэщтхэр лъэхъаным диштэу зэтегъэпсыхьэгъэнхэр. Мыр бэ зытефэщт проект, ыкIи федеральнэ бюджетым ащкIэ тыщэгугъы. Хъурэ-шIэрэм елъытыгъэу зэпстэури зэшIохыгъэным тефэщтыр шъолъырым иIэгоп. Джащ къыхэкIэу гъогум телъыр дгъэкIэжьынэу итхъухьагъ. Къихьащт тхьамафэм IофшIэнхэр рагъэжьэщтых. ЧIыпIэ анахь дэйхэм ателъыр тырахынышъ, асфальтыкIэ гъогогъуитIоу тыралъхьащт ыкIи шапхъэхэм адиштэу агъэтхъыщт. Къыхэзгъэщынэу сыфай, анахьэу Iофыр зыщыдэй кварталхэр арых IофшIэнхэр зыщыкIощтхэр», — къащитхыгъ шъолъырым ипащэ исоциальнэ нэкIубгъохэм.
АгъэкIэжьыщт Iахьэхэм зэкIэмкIи якIыхьэгъэщтыр километрэ 2200-рэ, ащ тефэщтыр сомэ миллиони 145-рэ фэдиз. Адыгэ Республикэм игъогу фонд мылъкур къыхахыщт, тыгъэгъазэм ехъулIэу IофшIэнхэр аухынхэу рахъухьэ.«Сицыхьэ телъ къэблэгъэрэ илъэсхэм урамым гъэцэкIэжьын куухэр зэретшIылIэщтхэм. Джырэ зэхъокIыныгъэхэм яшIуагъэкIэ щынэгъончъэу ыкIи гупсэфэу цIыфхэр урамым щызекIошъущтых», — къыхигъэщыгъ ЛIышъхьэм.Ащ къызэритхыгъэмкIэ, илъэс къэс гъогухэм ядэгъугъэ хагъахъо. 2025-рэ илъэсым тишъолъыр гъогу Iахь 38-рэ щагъэцэкIэжьыгъ зэкIэмкIи километрэ 79-рэ фэдиз якIыхьагъэу ыкIи лъэмыджи 5 щагъэкIэжьыгъ. Мы илъэсым лъэмыджи 4-рэ гъогу Iахь 24-рэ километрэ 64,6-рэ зэкIэмкIи якIыхьагъэу агъэцэкIэжьынэу рахъухьэ. Джащ фэдэу псэолъэшхуитIумэ яшIын лъагъэкIуатэ —Мыекъуапэ къэзыухьэрэ гъогум иаужырэ чэзыурэ (км 11,148-рэ) автомобиль гъогоу «Гъозэрыплъ — Лэгъонэкъэ бгы тешъор» зыфиIорэм иятIонэрэ Iахьэ иящэнэрэ чэзыоу километри 7,4-рэ хъурэмрэ. ЗэкIэ проектхэр афагъэнэфэгъэгъэ уахътэм къыпэу зэшIуахых. Щынэгъончъэным пае сурэт ыкIи видео тезыхырэ камерэхэр атетых, машинэхэм яхьылъагъэ зыуплъэкIухэрэр ыкIи «Тайфун» зыфиIорэ мобильнэ комплекситIу ащыгъэпсыгъ.