Хъымыщэкъо Э.
Шэуджэн районым ит къуаджэу Хьакурынэхьаблэ искусствэхэмкIэ икIэлэцIыкIу еджапIэ чIэсхэм ягъэхъагъэхэм ахагъахъо.
Орэдыр зикIасэу, апшъэрэ категорие зиIэ кIэлэегъаджэу Хъымыщэкъо Эммэ илъэсыбэ хъугъэу мыщ щэлажьэ. Ащ орэдкъэIоным ныбжьыкIэхэр фегъасэх. БэмышIэу Эммэрэ икIэлэеджакIоу Хъуажъ Самирэрэ «Белый пароход» зыфиIорэ проектэу Москва щырекIокIыгъэм хэлэжьагъэх. ЕджапIэм ыцIэ дахэкIэ Урысыем щагъэIугъ, Адыгеир зэрифэшъуашэу къагъэлъэгъуагъ.— Мыгъэ яплIэнэрэу фестивалым тыхэлэжьагъ. Хъуажъ Самирэ сэнаущыгъэ зыхэлъ орэдыIу. Дунэе, шъолъыр зэнэкъокъубэмэ тахэлэжьагъ, апэрэ чIыпIэхэр къащытхьыгъэх. Мы проектым зэрэхэлажьэрэм ишIуагъэкIэ ащ иIэпэIэсэныгъэ хэхъо. Адыгэ Республикэм ыцIэкIэ а зыр ары Iофтхьабзэм зыщызыушэтыгъэр, — къыIуагъ Хъымыщэкъо Эммэ.— Мы фестивалым сыхэлэжьэныр сэркIэ насыпыгъ. Федеральнэ сценэм сытетэу орэд къызэрэсIуагъэм гушхоныгъэ къыситыгъ. СикIэлэегъаджэу Эммэ Аслъан ыпхъум лъэшэу сыфэраз,— еIо Хъуажъ Самирэ.
Урысые кIэлэцIыкIу музыкальнэ фестивалэу «Белый пароход» зыфиIорэр социальнэ проектэу щыт. Урысыем ишъолъыр 46-мэ къарыкIыгъэ сэнаущыгъэ зыхэлъ кIэлэцIыкIухэр, ныбжьыкIэхэр ащ зэфищагъэх. Ахэм ахэхьэх сабыибэ зэрыс ыкIи гъот макIэ зиIэ унагъохэм къарыкIыгъэхэр, зипсауныгъэкIэ пыч зиIэ кэлэцIыкIухэр. Мыгъэ нэбгыри 170-рэ Iофтхьабзэм хэлэжьагъ, хорым игъусэхэу орэд къаIуагъ.Гала-концертхэр къалэхэу Москва, Санкт-Петербург ыкIи Владивосток ащыкIуагъэх.КIэлэцIыкIу фестивалым ипшъэрылъ шъхьаIэх хэхъоныгъэ егъэшIыгъэныр, сэнаущыгъэ зыхэлъ ныбжьыкIэхэр къыхэгъэщыгъэнхэр, ахэм адеIэгъэныр.Лъэпшъыкъо Фатим.