Кощхьэблэ район администрациер
Апэрэр псэупIэу Вольнэм дэт тхылъеджапIэм хэт. «Литературэм изэмылIэужыгъуаб» — джары ащ зэреджагъэхэр. «Унэгъо шэн-хабзэхэр ыкIи культурэм ипсэуалъэхэр» зыфиIорэ федеральнэ программэм ишIуагъэкIэ проектыр агъэцэкIагъ.
МэфэкI Iофтхьабзэм хэлэжьагъэх АР-м культурэмкIэ иминистрэу Аулъэ Юрэ, культурэмкIэ район гъэIорышIапIэм ипащэу Рауф Хурья, модельнэ тхылъеджапIэхэр шъолъырым щыгъэпсыгъэнхэм дэлэжьэрэ проектым, АР-м и Лъэпкъ тхылъеджапIэ япащэу Къыкъ Бэллэ, нэмыкIхэри.— Мы гупчэхэр тинепэрэ щыIакIэ диштэрэ тхылъеджэпIэ къодыехэп. Унагъо пэпчъ яуахътэ мыхэм щагъэкIон, кIэлэцIыкIухэм яшIэныгъэхэм щахагъэхъон, ежь псэупIэм дэсхэр зыхэлэжьэщтхэ зэхахьэ зэфэшъхьафхэр щырагъэкIокIынхэ алъэкIыщт. ШIогъэшхо цIыфхэм къафахьынэу сэлъытэ, — къыхигъэщыгъ Аулъэ Юрэ.Рэзэныгъэ гущыIэхэр къэзэрэугъоигъэхэми, проектым игъэцэкIэн дэлэжьагъэхэми афигъэзагъ тхылъеджапIэм ипащэу Хьакъунэ Фатимэ.— ТшIэрэр зэкIэ кIэлэцIыкIухэм апай. ТхылъыкIэу зэдгъэгъотыхэрэр, IофшIэн зэфэшъхьафхэр зыщыбгъэцэкIэшъущт Iанэу тиIэ хъугъэхэр — мыхэр зэкIэ кIэлэцIыкIухэм янеущырэ мафэ къэзгъэпсыщт екIолIакIэх. Тыфай дунаим щыхъурэр ашIогъэшIэгъонэу, еджэныр якIасэу, шIэныгъэ куухэр зэрагъэгъо- тызэ тиныбжьыкIэхэр къэ- хъунхэу, — къыIуагъ Хьакъунэ Фатимэ.ТхылъеджапIэм теплъэу иIэщтыр зигукъэкIыр Фатим ары. КъэкIорэ ныбжьыкIэхэм яуахътэ нахь гупсэфэу зэрэщагъэкIощтыр къыдилъытэзэ, гупчэр зыфэдэщтым дэлэжьагъ. Iэмэ-псымакIэхэри чIагъэуцуагъэх. Ау шIухьафтын шъыпкъэу хъугъэр кIэлэцIыкIухэм апае тхылъ миным ехъу къызэрэратыгъэр ары. ЗэкIэмкIи ащ 6153-рэ чIэлъ.ЯтIонэрэ кIэлэцIыкIу-гъэсэныгъэ гупчэм ыцIэр «Дышъэ къэмлан». Кощхьэблэ районым Лъэпкъ культурэмкIэ игупчэ хэтэу ар агъэпсыгъ. Къэралыгъо программэу «Унэгъо шэн-хабзэхэр ыкIи культурэм ипсэуалъэхэр» зыфиIорэм иIэпыIэгъукIэ ар ашIыгъ. Джащ фэдэу лъэпкъ проектэу «Унагъом» къыдыхэлъытагъ.Дышъэидэм ишъэфхэр къызщызIэкIагъэхьащт ыкIи лъэпкъ Iэпэщысэхэм яшIынкIэ чIыпIэу ар хъущт. Джащ фэдэу адыгэ шэн-хабзэхэр, лъэпкъым итарихъ, икультурэ, илитературэ мыщ щызэрагъэшIэщт. Егъэджэн сыхьатхэм язэхэщэнкIэ IэпыIэгъу хъущт Iэмэ-псымэхэри гупчэм зэригъэгъотыгъэх. ХэдыкIыным, бзэным атегъэпсыхьагъэхэр, нэмыкI техникэхэри яIэ хъугъэ.«Дышъэ къэмланыр» ныбжьыкIэхэр зэфэзыщэрэ чIыпIэ хъуным зэрэщыгугъыхэрэр мэфэкI зэхахьэм хэлэжьагъэхэм къыхагъэщыгъ. Лъэпкъым ишэн-хабзэхэм языкъегъэIэтыжьынкIэ ныбжьыкIэхэм егъэжьапIэ афэхъуным игугъапIэхэри зэрэщыIэр къаIуагъ.Цэй Замир.