Iэшъынэ А.
Мы мафэхэм IэкIыб къэралыгъохэм къарыкIыгъэ студентхэу Адыгэ къэралыгъо университетым щеджэхэрэм апае зэIукIэ зэхащагъ. Ащ хэлэжьагъэх АР-м лъэпкъ IофхэмкIэ IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Долэ Долэтбый, хэгъэгу кIоцI IофхэмкIэ Министерствэм кощын IофхэмкIэ и ГъэIорышIапIэу АР-м щыIэм илIыкIохэр.
Адыгэ къэралыгъо университетым IэкIыб къэралыгъо 42-мэ къарыкIыгъэ студентхэр щеджэх. Кощын Iофым фэгъэхьыгъэ шIэныгъэхэм ахагъэхъоным фэшI мыщ фэдэ Iофтхьабзэхэр ренэу афызэхащэх.Ежь яшIоигъоныгъэкIэ Урысые Федерацием къэкIожьынхэм фытегъэпсыхьэгъэ къэралыгъо программэм фэгъэхьыгъэу студентхэм гущыIэгъу афэхъугъ Долэ Долэтбый. Ащ къызэриIуагъэмкIэ, мы программэр Урысыем 2019-рэ илъэсым, Адыгеим 2006-м къащегъэжьагъэу щыIэныгъэм щыпхыращы. Илъэси 7-м къыкIоцI тилъэпкъэгъу 451-рэ республикэм къэкIожьыгъэх ыкIи Урысыем ицIыф хъугъэх. Мы илъэсыр пштэмэ, нэбгырэ 35-рэ, ахэм ащыщэу 15-р программэм къыдыхэлъытагъэу, адырэ 20-р яунагъохэм ащыщхэу къэкIожьыгъэх.— Программэм пшъэрылъ шъхьаIэу иIэр республикэм социальнэ-экономикэ хэхъоныгъэхэр ышIынхэр, IэкIыбым щыпсэурэ IофышIэ чанхэр тишъолъыр къещэлIэгъэнхэр ары. Мыщ ухэлэжьэным пае шэпхъэ гъэнэфагъэхэр пылъых. Анахьэу республикэм ищыкIэгъэ лъэныкъохэм япхыгъэу апшъэрэ гъэсэныгъэ яIэн фае. Зыныбжь илъэс 18-м нэсыгъэхэм къащегъэжьагъэу мыщ хэлэжьэнхэ амал яI, илъэситIо нахьыбэ еджэгъэ студентхэри пхырыкIынхэ алъэкIыщт. Анахь шъхьаIэр урысыбзэр дэгъоу ашIэныр ары, — къыIуагъ комитетым итхьаматэ.Тилъэпкъэгъоу къэзгъэзэжьыгъэхэр Мыекъуапэ имызакъоу, Тэхъутэмыкъое, Мыекъопэ районхэм бэу зэращыпсэухэрэр ащ къыхигъэщыгъ. IэкIыб къэралыгъохэм ащыIэу программэм хэлажьэ зышIоигъохэр зэкIолIэнхэ фаехэм, тхылъэу агъэхьазырыщтхэм нэужым Долэ Долэт къатегущыIагъ. Джащ фэдэу къэралыгъо программэм хэлажьэхэрэм фэгъэкIотэныгъэу яIэхэм, IэпыIэгъоу арагъэкIырэм яIофыгъохэм къащыуцугъ. Кощын IофхэмкIэ къулыкъушIэхэр студентхэм гущыIэгъу афэхъугъэх, охътэ гъэнэфагъэм къыкIоцI республикэм щыпсэунхэу фитыныгъэ зэряIэр къэзыушыхьатырэ тхылъхэр шIокI имыIэу яIэн зэрэфаер агу къагъэкIыжьыгъ. Ащ ишIуагъэкIэ еджэфэхэкIэ хэбзэгъэуцугъэм диштэу ахэр республикэм щыпсэунхэ алъэкIыщт. Джащ фэдэу Iоныгъо мазэм къыщегъэжьагъэу медицинэ уплъэкIунхэр шIокI имыIэу ашIын зэрэфаер къараIуагъ. Ар зимыIэхэм тазыр атыралъхьащт ыкIи къызэрыкIыгъэхэ къэралыгъохэм агъэкIожьынхэ алъэкIыщт.Iофтхьабзэм нэмыкI Iофыгъохэри къыщаIэтыгъэх, унэшъо гъэнэфагъэхэр ашIыгъэх.ДЕЛЭКЪО Анет.