Зыныбжь имыкъугъэхэр зыхэфэрэ гъогу-транспорт хъугъэ-шIагъэхэр нахь макIэ шIыгъэнхэм фэшI Тэхъутэмыкъое районымкIэ Къэралыгъо автоинспекцием икъулыкъушIэхэм циркэу «Крокус» зыфиIорэм илIыкIохэр ягъусэхэу кIэлэцIыкIухэр автомобилымкIэ къыращэкIыхэ хъумэ, ахэр къэзыухъумэхэрэ тIысыпIэхэр ыкIи щынэгъончъэным ибгырыпх зэрагъэфедэхэрэм фэгъэхьыгъэ Iофтхьабзэ зэхащагъ.
Автоинспекторхэм автомобильхэр къагъэуцухэзэ водительхэм шапхъэхэр зэрагъэцакIэхэрэр ауплъэкIугъ. Анахьэу анаIэ зытырагъэтыгъэр кIэлэцIыкIум илъэгагъэ ыкIи иинагъэ елъытыгъэу ар къэзыухъумэрэ тIысыпIэр ыкIи щынэгъончъэным ибгырыпх агъэфедэхэмэ ары. Циркым иIофышIэхэм къызэраIуагъэмкIэ, кIэлэцIыкIухэм ящынэгъончъагъэ нахьыжъхэм аIэ илъ. Арышъ, мы лъэныкъомкIэ ны-тыхэр щысэтехыпIэу зэрэщытынхэ фаер агу къагъэкIыжьыгъ.Зисабый щынэгъончъэу къезыщэкIыхэрэ ны-тыхэу къагъэуцугъэхэм ыпкIэ хэмылъэу якIэлэцIыкIухэр циркым ащэнхэу егъэблэгъэ билетхэр аратыгъэх. ШIухьафтын зэратыгъэхэм тапэкIи гъогурыкIоным ишапхъэхэр амыукъонхэу гущыIэ къатыгъ.