Адыгеим щыпсэурэ бзылъфыгъэм фэгъэхьыгъэ уголовнэ Iоф къызэIуахыгъ. Зыныбжь имыкъугъэ икIалэ ищыIэныгъэ зэрар къезыхыщт Iофым хищагъэу ары бзылъфыгъэр зэрагъэмысэрэр.
Адыгэ Республикэм хэгъэгу кIоцI IофхэмкIэ и Министерствэ мызэу, мытIоу республикэм щыпсэухэрэм ыкIи ихьакIэхэм зафигъэзагъ, мототехникэр анахь щынэгъончъэ транспортэу щыIэхэм зэращыщыр афиIотагъ. Мототехникэр зыгъэIорышIэн зымылъэкIыхэрэм, ащкIэ фитыныгъэ зимыIэхэм, анахьэу зыныбжь имыкъугъэхэм, къаигъэ ар зэрашIырэр зэрэмытэрэзыр, Iофыгъо хьылъэхэм, тхьамыкIагъохэм зэрафищэщтхэр бэрэ къыхагъэщы. Полицием джащ фэдэу цIыфхэр щегъэгъуазэх мототранспортыр зыгъэIорышIэхэрэм административнэ пшъэдэкIыжь зэрарагъэхьырэм имызакъоу, мопедхэр, квадроциклэхэр ыкIи питбайкхэр зыныбжь имыкъугъэ якIалэмэ къафэзыщэфыхэрэм, хъугъэ-шIэгъэ гъэунэфыгъэмэ ауж, уголовнэ пшъэдэкIыжь арагъэхьын зэралъэкIыщтым.Мы илъэсым ибэдзэогъу мазэ илъэс 15 зыныбжь кIалэу Кощхьэблэ районым щыщым питбайкыр ыгъэIорышIэзэ, машинэхэр зэрыкIорэ гъогум техьагъ, гъогу-транспорт хъугъэ-шIагъэм хэфагъ, шъобж зэфэшъхьафхэр тещагъэхэ хъугъэ. Районым и Къэралыгъо автоинспекцие зэрэхигъэунэфыкIыгъэмкIэ, мототехникэр ыгъэIорышIэнэу кIалэм фитыныгъэ иIагъэп. Мотоциклэр шъэожъыем къыфэзыщэфыгъэр янэу илъэс 36-рэ зыныбжьыр ары. Водительскэ удостоверение зэримыIэр, хэушъхьафыкIыгъэ егъэджэнхэр зэримыкIугъэхэр ышIэзэ, ащ питбайкыр икIалэ ритыгъ, ащкIэ хэбзэукъоныгъэм ар фиузэнкIыгъ, зыныбжь имыкъурэ шъэожъыем ищыIэныгъэ чIыпIэ щынагъо ригъэуцуагъ.Урысыем следствиехэмкIэ и Комитет следствиехэмкIэ и ГъэIорышIапIэу Адыгэ Республикэм щыIэм и Джэджэ район отдел уголовнэ Iофыр УФ-м и УК ия 151.2-рэ статьям иа 1-рэ Iахь къыпкъырыкIызэ къызэIуихыгъ. Зыныбжь имыкъугъэр хэбзэукъоныгъэм къыфэзыщэрэм пшъэдэкIыжь егъэхьыгъэныр а статьям къыделъытэ, мысагъэ зыфалъэгъурэм илажьэ загъэунэфырэм, зы илъэсым нэсэу хьапс тыралъхьан алъэкIыщт.