КъэкIырэ пстэури дэгъоп

Россельхознадзорым Къыблэ шъолъырымкIэ и ГъэIорышIапIэ цIыфхэм япсауныгъэкIэ щынагъо къэзытырэ амброзиер къызыщыкIырэ чIыпIэхэм ягъэунэфын къыдыхэлъытагъэу Мыекъопэ районым ипоселкэу Краснооктябрьскэм IофшIэгъу дэкIыгъо щыриIагъ. Ащ хэлэжьагъ «Адыгэ макъэр».

Хабзэ зэрэхъугъэу, Россельхознадзорым и ГъэIорышIапIэу Къыблэ шъолъырым щыIэмрэ Адыгэ Республикэмрэ зэзэгъыныгъэу зэдашIыгъэм къызэрэдилъытэу, илъэс къэс жъоныгъуакIэм къыщыублагъэу амброзием ебэныгъэнымкIэ федеральнэ унашъоу щыIэр агъэцакIэзэ дэкIыгъо-уплъэкIун Iофтхьабзэхэр Адыгэ Республикэм щызэхащэх. Мы лъэныкъомкIэ комиссие зэхащагъэу Iоф ешIэ, ащ хэтых АР-м мэкъу-мэщымкIэ и Министерствэ, муниципальнэ образованиехэм ялIыкIохэр.— Итхъухьэгъэ IофшIэнхэм адиштэу республикэм ирайонхэм тащыагъ, лэжьыгъэ къызща­гъэкIырэ мэкъумэщ чIыгухэр амброзием зэрэщаухъумэхэрэр тыуплъэкIугъ. Шапхъэу щыIэхэр ыкIи хэбзэгъэуцугъэр амыукъонхэм фытегъэпсыхьэгъэ пэшIорыгъэшъ унашъохэр тшIыгъэ. ХъызмэтшIапIэхэм япащэхэм Iофтхьэбзэ зэфэшъхьаф­хэр адызетэхьэ, шIокI имыIэу амброзиер зэрагъэкIодын фаер агурытэ­гъаIо. Хэбзэгъэуцугъэр зыукъохэ­рэм тазыр зэратыралъхьащтым епхыгъэ мэкъэ­гъэIу тхьапэхэр пащэхэм афэтэгъэхьы. Амброзиер къызыщыкIэу тэ къыхэдгъэщырэ чIыпIэхэм ямызакъоу, цIыф­хэми макъэ ­къытагъэIу ар нахьыбэу зыдэщыIэм ыкIи игъом зыщамыупкIэрэм япхыгъэу. Арэу­щтэу непи хъугъэ, поселкэу Краснооктябрьскэм иурамэу Светлэмрэ Лениным ыцIэ зы­хьы­рэмрэ зыщызэуалIэхэрэм ты­къэкIуагъ, — ­къыIуагъ Россельхознадзорым Къыблэ шъо­лъырымкIэ и ­ГъэIоры­шIапIэ иинспекторэу ГъукIэлI Рустам.

ГумэкIыгъорАмброзиер зэрыт ыкIи нэмыкI уцыжъхэмкIэ зэхэкIыхьэгъэ чIыпIэр аупкIэнэу рагъэжьэгъахэу тырихьылIагъ. Краснооктябрьскэ къоджэ псэупIэм иадминистрацие ипащэ игуадзэу Владимир Кравцовым къызэриIуагъэмкIэ, яIофшIэн чэзыу къыдыхэлъытагъэу мы Iофтхьа­бзэр рагъэкIокIы.— Дэо тхылъ къытIэкIэхьагъэу щытэп, ау тиIофшIэн пылъ ха­бзэмкIэ общественнэ чIыпIэхэу къытэпхыгъэхэр тыупкIэнхэу щыт. Къыхэзгъэщымэ сшIоигъу, мыгъэ чIыгум псыр икъоу зэригъотыгъэм къыхэкIыкIэ уцыр жъугъэу къэкIы, поселкэр инышъ, къызэлъиубытырэ шъо­лъырыр игъом тыупкIэнэу кIочIэгъу тыфырикъурэп. Джыдэдэм тыздэщыт чIыпIэр кIэлэцIыкIу джэгупIэу щытыгъ. Мыщ щыгъэуцугъэгъэ псэуалъэхэр жъы хъугъэхэу, кIэлэцIыкIухэм ящыIэныгъэкIэ щынагъо зэхъум, икIыгъэ илъэсым Iутхыжьыгъэх. Къэнагъэр тIысыпIэ закъохэр арыгъэ, ахэри Iэтахъохэм зэха­къутагъэх. Мы чIыпIэр цIыфхэр къыхэлажьэхэзэ агъэпсырэ бюджетым ипрограммэ хэфагъ, къэ­кIощт илъэсым кIэу зэтырагъэпсыхьащт, — къыIуагъ Владимир Кравцовым.

УнашъорГъэIорышIапIэм къыIэкIэхьэгъэ къэбарым къыпкъырыкIызэ, инспекторэу ГъукIэлI Рустам поселкэм инэмыкI чIыпIэхэри къыплъыхьагъэх. Анахьэу амброзием зыкъызщиштэгъэ чIыпIэхэу ыгъэунэфыгъэхэр къэкIощт тхьамафэм ыкIэхэм анэс аупкIэнэу Владимир Кравцовым унашъо фишIыгъ.Мы мафэм ехъулIэу Мыекъопэ районым хэукъоныгъэу къыщыхагъэщыгъэхэр яIэубытыпIэу Россельхознадзорым Къыб­лэ шъолъырымкIэ и ГъэIорышIапIэ ­чIыгу Iахьхэр зие нэбгырэ 23-мэ унашъохэр афагъэхьыгъ.Джащ фэдэу ГъэIорышIапIэм федеральнэ ыкIи шъолъыр мэхьанэ зиIэ автомобиль гъогухэм лъэшэу ынаIэ атет. Мы лъэныкъомкIэ гъэIорышIапIэхэу «Адыгеяавтодорымрэ» «Черноморьемрэ» зэгъусэхэу зэдэлажьэх.ПшъэдэкIыжьыр, тазырырУФ-м ихэбзэгъэуцугъэ къызэригъэ­нафэрэмкIэ, къэкIырэ уцыжъхэм алъэныкъокIэ шапхъэхэр зыукъохэрэм пшъэ­дэкIыжь арагъэхьыщт. ЦIыф къызэрыкIохэм, унэе хъызмэтшIапIэ зиIэхэм, бэджэндэу чIыгур зыгъэлажьэхэрэм, адрэ чIыгоу зэкIэми зэдагъэфедэрэм къыщыкIырэ амброзием ебэныгъэнымкIэ пшъэдэкIыжьыр зыхьыщтыр муници­пальнэ псэупIэхэм яадминистрациехэр ары. ЦIыф къызэрыкIом тазырэу ытыщтыр сомэ 300 — 500, IэнатIэ зыIыгъым — сомэ 500 — 1000, юридическэ лъапсэ зиIэхэм — сомэ 5000 — 10000.Зэрарыр, зызфэжъугъэзэщтырАмброзиер зы метрэм къыщегъэжьагъэу метритфым нэс илъэгагъэу илъэсым зэ къэкIы. Бэдзэогъу-шышъхьэIу мазэхэм къэгъагъэ хъунэу регъажьэ. Бжыхьэм ехъулIэу чылапхъэхэр ретэкъухьэ. Ащ кIэу къыпытэкъурэм цIыфым ыпэпс къырегъэчъы, нэхэм нэпсыр къакIегъэ­кIы, егъапскэ, ыкIышъо къэуплъыжьы, егъэхъупцIы. Ахэм адакIоу жьымыгъот иIэ мэхъу. Ащ нэмыкIэу, чIыгум къытырэ лэжьыгъэм къыщегъакIэ, джащ фэдэу амброзием кIэу къыпытэкъурэр былым Iусым зыхафэкIэ, щэм иIэшIугъэ ыкIи ышъо зэблехъу, былымылми иягъэ екIы.А мазэхэм ащ ыгъэсымэджэрэ цIыфыбэм Адыгеир къабгынэн фаеу мэхъу. Арэущтэу мыхъуным фэшI амброзиер къэгъагъэ мыхъузэ бгъэкIодыныр шIокI зимыIэ Iофэу щыт. Ащ пае хэкIыпIэ закъоу щыIэр лъапсэр дыкIыгъоу уцы­жъыр къичыгъэныр ары.Амброзием ебэныгъэныр гумэкIыгъо шъхьаIэу зэрэщытыр къыдалъытэзэ, Россельхознадзорым Къыблэ шъолъырымкIэ и ГъэIорышIапIэ агу къегъэ­кIыжьы: карантин зытелъ къэкIыхэрэм алъэныкъокIэ УФ-м ихэбзэгъэуцугъэ къызэригъэнафэрэмкIэ, унэе чIыгу зи­Iэхэм ыкIи бэджэндэу ар зыгъэлажьэ­хэрэм, юридическэ лъапсэкIэ лажьэхэрэм уцыжъхэр агъэкIодынхэ фае, ащ нэмыкIэу, зэдагъэфедэрэ чIыгухэр амброзием щыухъумэгъэнхэр зыпшъэ дэкIырэр муниципальнэ образованиехэм яадминистрациехэр ары.Амброзиер бэу къызщыкIырэ, ар жъугъэу зыщыкъэгъэгъэн зыщилъэкIыщт чIыпIэхэм гу алъышъутагъэмэ, джащ фэдэу мыщ епхыгъэ упчIэхэр шъуиIэхэмэ, телефонэу 861 220-07-04; 861 222-95-73-мкIэ е электрон адресэу rshn38@fsvps.gov.ru зыфиIорэмкIэ ГъэIорышIапIэм иIофышIэхэм зафэжъугъэзэн шъулъэкIыщт.IЭШЪЫНЭ Сусан.