Общественнэ лъыплъакIохэр агъэхьазырых

Хэдзынхэр зэрэкIохэрэр зыуплъэкIурэ ыкIи алъыплъэрэ Общественнэ штабэу Адыгэ Республикэм и Общественнэ палатэ ыгъэ­псыгъэм изэхэсыгъо мы мафэхэм щыIагъ.

Ащ хэлэжьагъ Граждан обществэм хэхъоныгъэ ышIынымкIэ ыкIи цIыфхэм яфитыныгъэ­хэмкIэ Советэу УФ-м и Президент дэжь щызэхэщагъэм хэтэу, Ассоциациеу «Шъхьафит об­щественнэ лъыплъэным» итхьаматэу Александр Брод.Хэдзынхэм языфэгъэхьазырынкIэ Общественнэ палатэм мэзитIум къыкIоцI IофшIэнэу ыгъэцэкIагъэм къытегущыIагъ ащ и Тхьаматэу Устэ Руслъан. Ащ къызэриIуагъэмкIэ, чIыпIэ хэдзыпIэ 265-у республикэм къыщызэIуа­хыщтхэм алъыплъэщт нэбгырэ 700-м ехъур агъэхьазырыгъэх.— Общественнэ лъыплъакIо­хэм пшъэрылъэу яIэр дэгъоу ашIэным пае егъэджэнхэр афызэхэтщагъэх. Анахь шъхьаIэр хэдзынхэр хэбзэ­гъэуцугъэм ди­штэу, шапхъэхэм атетэу зэ­рэкIорэм, цIыфхэм яфи­тыны­гъэ­хэр амыукъонхэм лъы­плъэнхэр ары. Шапхъэхэм адимы­штэрэ лъэныкъо горэ общест­веннэ лъыплъакIом зилъэгъукIэ, участковэ хэдзын комиссием ипащэ зыфигъэзэн е ищыкIа­гъэмэ, полицием икъулыкъушIэу чIэтым риIон фае. Непэрэ ма­фэм общественнэ лъы­плъакIо­хэм ягъэхьазырын зэрифэ­шъуашэу кIуагъэу сэлъытэ, — къы­Iуагъ Устэ Руслъан.УрысыемкIэ лъэхъан мыпсын­кIэм хэдзынхэр зэрэкIощтхэр къыдалъытэзэ, хэушъхьафыкIыгъэ мобильнэ купхэр зэрагъэ­хьазырхэрэр, зыщищыкIэгъэ чIыпIэм ахэр зэрекIолIэщтхэр АР-м и Общественнэ палатэ и Тхьаматэ къы­Iуагъ.Урысыем и Общественнэ палатэ иунашъокIэ цIыфхэм яфитыныгъэхэр къэухъумэгъэнхэмкIэ Адыгеим и Уполномоченнэ иныбжьыкIэ Совет щыщхэр штабым хагъэхьагъэх. Ащ ипащэу Михаил Шебанец ныбжьыкIэхэр нахьыбэу хэдзынхэм ахэлэжьэнхэм пае Iофэу агъэцакIэхэрэм къатегущыIагъ.— Республикэм и Общест­веннэ палатэ ыкIи ныбжьыкIэ Со­ветым хэтхэр тиIэпыIэгъоу Iоф­тхьабзэхэр бэу зэхэтщагъэх. Анахьэу тынаIэ зытедгъэтыгъэ­хэр илъэс 18 хъу­гъэхэу, апэрэу хэдзынхэм ахэлэжьэщтхэр ары. Ахэм фитыныгъэу яIэхэр къа­фэтIотагъэх. Ащ нэмыкIэу сэкъатныгъэ зиIэхэр хэдзынхэм ахэлэжьэнхэ амал яIэным пае хэ­дзыпIэ чIыпIэхэр зэрафытегъэпсы­хьагъэхэр тыуплъэкIугъэх, нахьыбэр апэрэ къатхэм атетых ыкIи пандусхэр аIутых, тэрэзэу зымылъэгъу­хэрэм апайи хэу­шъхьафыкIыгъэ пкъыгъохэр ачIэ­лъых, — къыIуагъ Михаил Шебанец.Хэдзын мафэхэм ныбжьыкIэхэм япшъэрылъхэр зэрифэшъуашэу агъэцэкIэнхэу зэрэхьазырхэр джащ фэдэу ащ къы­Iуагъ. Сэкъатныгъэ зиIэхэм апае социальнэ таксихэм мы мафэ­хэм Iоф ашIэщт, гуфакIохэр бэу хэдзыпIэ чIыпIэхэм ачIэтыщтых.— Общественнэ штабым зэп­хыныгъэ дытиIэу Iоф зэдэтэшIэ. Адыгеим хэдзынхэм зэрифэшъуашэу зафегъэхьазыры. «ИнформУИК» зыфиIорэр респуб­ликэм дэгъоу зэрэщызэхаща­гъэр къасIо сшIоигъу. Участковэ комиссием хэт нэбгырэ 908-мэ унэгъо мини 149-рэ къакIу­хьагъ, хэдзынхэм япхыгъэ къэбархэр къафаIотагъэх. Хэдзынхэр зыщыкIощтхэ чIыпIэ шъхьаIэхэм анэмыкIэу охътэ гъэнэфагъэм Iоф ашIэнэу чIыпIитIу къызэIуа­хыщт, зыр — дзэ частым, адрэр хьапсым, — къы­Iуагъ Александр Брод.Нэужым Урысыем хэдзынхэм зызэрафигъэхьазырырэм къытегущыIагъ. Хэу­шъхьафыкIыгъэ дзэ операциер кIозэ хэдзынхэр зэхэпщэнхэр зэрэмыпсынкIэр къыкIигъэтхъыгъ. Зэрифэшъуашэу тикъэ­ралыгъо ахэр щырамыгъэкIокIынхэм пыим иамал­хэр рихьылIэнхэм ищынагъо зэрэщыIэр ыкIи ащ пэшIуекIогъэным пае нэбгырэ пэпчъ ипшъэрылъ зэрифэшъуа­шэу зэшIуихын зэрэфаер Ассоциацием ипащэ къыIуагъ. Къэбар нэпцIэу дунэе хъытыум къырагъэхьан алъэкIыщтхэр цIыфхэм ашIошъ мыхъунхэр анахь шъхьа­Iэу зэрэщытыр къыкIигъэтхъыгъ.Iофтхьабзэм нэмыкI Iофыгъо ащытегущыIагъэх, пшъэрылъ гъэнэфагъэхэр агъэуцугъэх.ДЕЛЭКЪО Анет.