Адыгеим иполитическэ ыкIи иобщественнэ IофышIэшхоу, генерал-майорэу Дорофеев Александр Анатолий ыкъор илъэс 80 ыныбжьэу дунаим ехыжьыгъ.Александр Анатолий ыкъор 1946-рэ илъэсым бэдзэогъум и 4-м Калининградскэ хэкум ит къалэу Гвардейскэм щыпсэурэ дзэкъулыкъушIэм иунагъо къихъухьагъ, ятэ Хэгъэгу зэошхом хэлэжьагъ, Урысые Федерацием и ЛIыхъужъ.1968-рэ илъэсым апшъэрэ дзэ команднэ Бакинскэ училищыр дышъэ медалькIэ къызеухым ыуж Германием къулыкъур щихьыгъ. Ащ нэужым М. В. Фрунзэм ыцIэкIэ щыт Дзэ академием ыкIи Советскэ Союзым и Маршалэу Б. М. Шапошниковым ыцIэкIэ щыт апшъэрэ офицер курсхэу «Выстрел» зыфиIорэм ащеджагъ.1980 — 1983-рэ илъэсхэм Германием щыIэ советскэ дзэ купым и Берлинскэ гарнизон ипэщагъ.1985-рэ илъэсым Кутузовым иорденрэ Жъогъо Плъыжьым иорденрэ къызфагъэшъошэгъэхэ я 9-рэ Краснодарскэ Краснознаменнэ дивизием ипащэу агъэнэфагъ. Ащ къыщегъэжьагъэу илъэс 40-м ехъурэ Адыгеим щыпсэугъ.1991 — 1999-рэ илъэсхэм Александр Анатолий ыкъор Темыр-Кавказ дзэ коим идзэхэм япащэ игуадзэу щытыгъ. 1985-рэ илъэсым къыщыублагъэу 2001-рэ илъэсым нэс народнэ депутатхэм я Краснодар край ыкIи Адыгэ хэку Советхэм, АР-м и Къэралыгъо Совет — Хасэм ядепутатыгъ.Парламентариеу зэрэщытым епхыгъэу Адыгэ Республикэм и Конституцие идэлэжьэн ыкIи шъолъыр хэбзэгъэуцугъэм ылъапсэхэм ягъэнэфэн иIахьышхо хишIыхьагъ. Урысыем идзэкIолIхэу гъэры хъугъэхэр, уIагъэхэр ыкIи хэкIодагъэхэр къыхэгъэщыжьыгъэнхэмкIэ, Чэчэн Республикэм террористхэм апэшIуекIорэ Iофтхьабзэхэр зыщызэрахьэгъэхэ лъэхъаным лIыхъужъхэм яшIэжь хэмыкIокIэжьынымкIэ Iофышхо зэшIуихыгъ.НыбжьыкIэхэр патриотхэу пIугъэнхэм епхыгъэ лъэныкъомкIи зышъхьамысыжьэу А. А. Дорофеевым бэ ышIагъэр. Дзэ ыкIи къэралыгъо IофышIэ цIэрыIохэм афэгъэхьыгъэ статья минрэ ныкъорэм ехъу ытхыгъ, порталэу «Фронтовики» зыфиIорэм лIыхъужъ 600-м ехъумэ ацIэхэр хэмыкIокIэжьынхэм епхыгъэ Iофтхьабзэхэр щызэрихьагъ.ЩэIэфэ республикэмрэ хэгъэгумрэ шIуагъэ къафихьызэ бэ ыгъэцэкIагъэр, Къыблэ дзэ коим игъэIорышIапIэ иинспектор куп пэщэныгъэ дызэрихьагъ, хэушъхьафыкIыгъэ дзэ операцием хэлажьэхэрэмрэ иветеранхэмрэ IэпыIэгъу афэхъущтыгъ.Генерал-майорэу Александр Дорофеевым игъэхъагъэхэр тын лъапIэхэмкIэ хагъэунэфыкIыгъ: Жъогъо Плъыжьым иорден, ЛIыхъужъныгъэм иорден, медалэу «Адыгеим и Щытхъузехь» зыфиIорэр ыкIи нэмыкIхэр къыфагъэшъошагъэх.ЦIыф цIэрыIор зэрэтхэкIыжьыгъэр Адыгэ Республикэм щыпсэухэрэм гукъэошхо ащыхъугъ.Зидунай зыхъожьыгъэм иунагъо, иIахьылхэм тафэтхьаусыхэ. Дорофеев Александр Анатолий ыкъор иныбджэгъухэм, Iоф зыдишIагъэхэм, зышIэщтыгъэхэм, дэлэжьагъэхэм ыкIи гущыIэгъу фэхъугъэхэм гукъэкIыжь фабэкIэ агу илъыщт. Офицерыр ипшъэрылъ фэшъыпкъэн, и Хэгъэгу шIу ылъэгъун зэрэфаем ятамыгъэу ащ ыцIэ дышъэ хьарыфхэмкIэ Адыгеимрэ Урысыемрэ ятарихъ хэтхагъэ хъугъэ.М. Къ. КъумпIыл, В. И. Нарожнэр, А. А. Джарымэр, А. К. ТхьакIущынэр, А. А. КIэращэр, Э. К. Цэир, В. П. Свеженец, А. В. Авериныр, Г. А. Митрофановыр, А. М. Булановыр, Н. М. ГъукIэлIыр, А. А. Къуаджэр, Е. И. Саловыр, А. Хъ. ЛIыIужъур, Ю. Н. Колягиныр, А. В. Гербицкэр, Ю. Д. Нэхаир.Генерал-майорэу Дорофеев Александр Анатолий ыкъор иаужырэ гъогу зэрэтехьажьырэм фэгъэхьыгъэ Iофтхьабзэр Пушкиным ыцIэкIэ щыт унэм (къ. Мыекъуапэ, ур. Пушкиныр, 179) непэ, Iоныгъом и 12-м, сыхьатыр 12-м къыщыублагъэу 13-м нэс щыкIощт.Къалэу Мыекъуапэ дэт къэхалъэм (ур. Дорожнэр) непэ сыхьатыр 13.30-м щагъэтIылъыжьыщт.