Цэй з.
УФ-м и ЛъытэкIо палатэ и Совет зэригъэнэфагъэу, уплъэкIокIо-лъытэкIо къулыкъухэу шъолъырхэм ащыIэхэм апае зэхащэгъэ семинарыр Мыекъуапэ щыкIуагъ.
Урысыем ишъолъырхэм ыкIи имуниципальнэ образованиехэм мылъкум игъэзекIон зэращызэхэщагъэм иуплъэкIун ащыгъэлъэшыгъэным, зыкI екIолIакIэхэм, зэдэлэжьэныгъэм ыкIи упчIэ шъхьаIэу къэуцухэрэм ар афэгъэхьыгъагъ.АР-м финансхэмкIэ иминистрэу Виктор Орловыр, тишъолъыр игъэцэкIэкIо хабзэ, Запорожскэ, Херсон, Донецкэ, Луганскэ республикэхэм къарыкIыгъэхэр, УплъэкIокIо-лъытэкIо палатэу Ростов, Вологодскэ хэкухэм ащылажьэхэрэм ялIыкIохэр ащ къекIолIагъэх. КъэмыкIошъугъэхэр зэнкIэ зэпхыныгъэм тетэу Iофтхьабзэм хэлэжьагъэх. Мыщ фэдэ шIыкIэу зэIукIэр къызэIуихыгъ УФ-м и ЛъытэкIо палатэ дунэе ыкIи шъолъыр зэдэлэжьэныгъэмкIэ и Департамент ипащэу Тимур Махмутовым.— Къэралыгъом ибюджет тэрэзэу гъэзекIуагъэ зэрэхъурэм улъыплъэным пае зэгурыIоныгъэрэ зэдэлэжьэныгъэрэ ахэлъэу Палатэм епхыгъэ къулыкъухэм зэкIэми Iоф ашIэн фае. Къыхэзгъэщы сшIоигъу, тикъэралыгъо къыхэхьажьыгъэ шъолъырхэм ащыIэ чIыпIэ къулыкъухэм яIофшIакIи. УплъэкIокIо-лъытэкIо палатэу ахэм ащыIэхэм ищыкIэгъэ тхылъхэр агъэтэрэзыгъахэу Iоф ашIэ, ащ тегъэгушхо, — ишIуфэс гущыIэ къыщиIуагъ Тимур Махмутовым.Мыщ фэдэ Iофтхьабзэхэр илъэс къэс зэхащэх. ЯIофшIэн зэфэхьысыжьхэр щыфашIых, неущырэ мафэми тегущыIэх.— Тикъулыкъу иIофшIэн муниципальнэ чIыпIэхэм ащылажьэхэрэм къащежьэ. Мыщ фэдэ зэхахьэхэр ахэм Iоф ащызышIэхэрэм егъэджэн дэгъу афэхъух. Бюджет ахъщэр зэрагъэзекIорэм хэукъоныгъэхэр къыхэдгъэщыным нахьи ахэр чIыпIэхэм зэрэхамышIыхьащтхэр агурыгъэIогъэныр нахь тэрэз. Ары пшъэрылъ шъхьаIэу тиIэри, — къыхигъэщыгъ АР-м и УплъэкIокIо-лъытэкIо палатэ итхьаматэу Павел Стаценкэм.УплъэкIокIо-лъытэкIо къулыкъум и Советэу Палатэм епхыгъэу лажьэрэм иIофшIэн зэригъэцакIэрэм къытегущыIагъ муниципальнэ образованиехэм мылъкур зэращагъэзекIорэм лъыплъэрэ комиссием ипащэу, Вологодскэ хэкум и УплъэкIокIо-лъытэкIо палатэ ипащэу Ирина Карнаковар. Илъэс 12 хъугъэ Советым иIофшIэн зигъэцакIэрэр. ДжырэкIэ нэбгырэ 14 ащ хэт. Муниципальнэ къулыкъухэм яIофшIэн ахэр лъэплъэх ыкIи ар зэрагъэпсыщтыр агъэнафэ. БлэкIыгъэ илъэсым изэфэхьысыжьхэри ащ къышIыгъэх. IофшIэным шIуагъэу къытырэм къытегущыIагъ, хэбзэгъэуцугъакIэхэм ыкIи зэхъокIыныгъэу къихьащт илъэсым къяжэхэрэм ягугъу ащ къышIыгъ.Iофтхьабзэм хэлэжьэгъэ хьакIэхэм зэхэсыгъо ужым загъэпсэфын амали яIагъ, Адыгеим итворческэ купхэм концерт къатыгъ. Тиреспубликэ ичIыопс зыфэдэр арагъэлъэгъунэу непэ Мыекъопэ районым рагъэблэгъэщтых. ЗекIо Iофтхьабзэхэр афызэхащэщт.Цэй Замир.