Адыгэ къэралыгъо университетыр кIэщакIо зыфэхъугъэ кIэлэцIыкIумэ яя 5-рэ Дунэе литературнэ зэнэкъокъоу Жэнэ Къырымызэ ыцIэкIэ щытым хэлажьэ зышIоигъохэм мэкъуогъум и 1-м къыщегъэжьагъэу шышъхьэIум и 30-м нэс яIофшIэнхэр къырахьылIагъэх.
ОсэшI купым итхьаматэу, кIэлэцIыкIу тхакIоу КIуращынэ Лейлэ Iофтхьабзэр зэрэрекIокIыгъэр къедгъэIотагъ, зэнэкъокъум пшъэрылъэу иIэхэм такIэупчIагъ.— АдыгабзэкIэ, къэбэртэябзэкIэ, урысыбзэкIэ кIэлэцIыкIумэ апае тхэхэрэр, цIыкIумэ афэгъэхьыгъэ произведениехэм адэлэжьэрэ сурэтышIхэр, тхыгъэхэр бзищкIэ зэзыдзэкIхэрэр къыхэгъэщыгъэнхэр зэнэкъокъум ипшъэрылъ шъхьаIэх,— еIо КIуращынэ Лейлэ.Зэнэкъокъум хэлажьэхэрэм яIофшIагъэхэр зыфэдэхэр, лъэныкъоу нахь IофшIэныбэ къызэрахьылIагъэм тигущыIэгъу къедгъэIотагъ.— Зэнэкъокъум хэлэжьэ нэбгырэ 40-м яIофшIагъэхэр электрон почтэмкIэ гъэмэфэ мэзищым къытфагъэхьыгъэх. IофшIэгъэ 50-м анахь дэгъухэр къыхэтхыгъ. Анахьэу тызгъэгушIуагъэр ныбжьыкIэхэр нахьыбэу къыхэлажьэхэ зэрэхъугъэр ары. ОсэшI купым Iоныгъо ыкIи чъэпыогъу мазэхэм Iоф ышIэщт, текIуагъэхэр шэкIогъум и 15-м къэнэфэщтых. Анахь дэгъухэр зэнэкъокъум итхылъ шъхьаф къыдэхьащтых. Лъэныкъохэм ащытекIуагъэмэ ацIэхэр, алъэкъуацIэхэр зэнэкъокъум исайтэу «http://konkursjane.adygnet.ru» зыфиIорэм ыкIи сайтхэу Вконтакте, Телеграмым къарыхьащтых, — хигъэунэфыкIыгъ тигущыIэгъу.Лъэпшъыкъо Фатим.