ЦыхьэшIэгъу телефоным иамалхэр

ЦIыфыр мэпсэуфэ къиныгъохэм яуталIэ, ащ фэдэ зыхъурэм, нэбгырэ пэпчъ щыIэныгъэм зэригъэуцогъэ чIыпIэм къызэрикIыжьыщтым иамал еусэ. Зыхэм кIуачIэ къызхагъотэжьы, адрэхэр игукIае зыгорэм зэхихыным ыкIи специалистхэм яушъыйхэм афэныкъох. А Iофыгъом фэIорышIэ цыхьэшIэгъу телефонэу урысые зыкI номерэу 8-800-2000-122-р зиIэр. Мы теле­фоныр ныбжь зиIэ пстэуми атегъэпсыхьагъ, ау нахьыбэрэмкIэ зыкъыфэзыгъазэхэрэр кIэлэцIыкIухэр ары.

Адыгэ Республикэм IофшIэнымрэ социальнэ хэхъоныгъэмрэкIэ и Министерствэ къызэритыгъэмкIэ, унагъом ыкIи сабыим ящыкIэгъэ социальнэ-психологическэ IэпыIэгъур игъом специалистхэм арагъэкIынымкIэ мы кIэлэцIыкIу «цыхьэшIэгъу телефоныр» анахь шIыкIакIэхэм ащыщ. ЛъэныкъуитIумэ атегъэпсыкIыгъэу Iоф ешIэ — ыпкIэ хэмылъэу ыкIи шъэфыгъэ хэлъэу. Мы уахътэм ехъулIэу а телефоным республикэм иучреждении 4 епхыгъ. Ахэр АР-м икъэралыгъо бюджет учреждениехэу «Мыекъуапэ щыпсэухэрэм ясоциальнэ психологическэ фэIо-фашIэхэр зыщагъэцэкIэрэ Зэхэубытэгъэ гупчэр», «Адыгэ республикэ клиническэ психоневрологическэ диспансерыр», «Психолого-педагогическэ медицинэ ыкIи социальнэ IэпыIэгъухэмкIэ Гупчэр», муниципальнэ бюджет учреждениеу «Психолого-педагогическэ медицинэ ыкIи социальнэ IэпыIэгъухэмкIэ Гупчэр». Илъэсым къыкIоцI республикэмкIэ ащ гъогогъу минитIу фэдизрэ къытеох.Непэрэ щыIакIэу тызхэтым кIэлэцIыкIу цыхьэшIэгъу телефоныр зэгурыIоныгъэ зэрымылъ унагъохэм ыкIи IэпыIэгъу зищыкIэгъэ кIэлэцIыкIухэм якъыхэгъэщын фэIорышIэ. Телефоным иIофшIэн мэхьанэу иIэр психологическэ IэпыIэгъу зищыкIагъэхэр псынкIэу къыхэгъэщыгъэнхэр ыкIи ахэм Iоф адэшIэгъэныр ары. Психологхэм кIэлэцIыкIухэм зэдэгущыIэгъу адашIы, зыгъэгумэкIыхэрэр къарагъэIуатэ, шъхьадж екIолIэкIэ гъэнэфагъэ къыфагъотызэ ахэм IэпыIэгъу афэхъух.ЦIыфхэм социальнэ фэIо-фашIэхэр языгъэгъотырэ Зэхэубытэгъэ гупчэу Мыекъуапэ щыIэм иотделение ипсихологэу Хъуажъ Атланэ цыхьэшIэгъу телефоным иIофшIакIэ ыкIи занкIэу закъыфэзыгъазэхэрэм IэпыIэгъоу арагъэгъотыхэрэр «Адыгэ макъэм» къыфиIотагъ. Мы къулыкъур къэралыгъо ыкIи муниципальнэ фэIо-фашIэхэр лъэныкъуабэкIэ зыгъэцэкIэрэ (МФЦ) Унэгъо гупчэм хэхьэ.— Джырэ лъэхъан цыхьэшIэгъу телефоныр кIэлэцIыкIухэмкIэ амалышIоу щыт. Зыщыфаем игукъаохэр, зэмызэгъыхэрэр специалистхэм афиIуатэхэмэ, ищыкIэгъэ психологическэ зэдэгущыIэгъур ыгъотын елъэкIы. А уахътэм ыгу цIыкIу ихъыкIыщтыгъэ «бырсырхэр» щыгъэзыягъэхэ мэхъу. ЦыхьэшIэгъу телефоным чэщи мафи ыкIи ыпкIэ хэмылъэу зэрэкъэралыгъоу Iоф щешIэ: 8-800-2000-122 ыкIи номер кIэкIэу 124-рэ. IэпэIэсэныгъэ зыIэкIэлъ психологхэу мы къулыкъум хэтхэр нэбгырэ пэпчъ IэпыIэгъу фэхъуным фэхьазырых. ГумэкIы­гъоу шъуиIэхэмкIэ шъуадэгощэн, ащкIэ ушъыйхэр щыжъугъотынхэ амал щыI ыкIи зыгорэ гущыIэгъу шъушIы­нэу, къышъодэIунэу, къышъукъоуцонэу шъуфаемэ, зыкъытфэжъугъаз, — хигъэунэфыкIыгъ Хъуажъ Атланэ.ТигущыIэгъу къызэриIуагъэмкIэ, социальнэ фэIо-фа­шIэхэр зыгъэцэкIэрэ Гупчэу Мыекъуапэ дэтым икъулыкъу икIыгъэ илъэсым гъогогъу 200-м ехъурэ къытеуагъэх, ащ ипроцент 96-р — кIэлэцIыкIух. Тызхэт илъэсым иджырэ уахътэ ехъулIэу нэбгыри 120-м ехъу­рэмэ зыкъафагъэзагъ. Анахьэу унагъом ыкIи еджа­пIэм зэфыщытыкIэу ащыряIэхэм ымыгъэразэхэу ары кIэлэцIыкIухэм закъызэрафагъазэрэр. Нахьыжъхэр упчIэжьэгъу ашIыныр ахэмкIэ анахь шъхьаI. КIэлэцIыкIухэмрэ ны-тыхэмрэ язэфыщытыкIэхэр укъуагъэ хъумэ, кIэлэцIыкIур шъхьэзакъоу къэнэ ыкIи игукъанэ зэриIон щымыIэу уахътэ къекIу. Джащ фэдэу кIэлэцIыкIу зэпкъэгъу-лэгъухэм азыфагу зэгурымыIоныгъэу къитаджэрэр, жъалымыгъэ хэлъэу къызэрэдэзекIохэрэр ягумэкIыгъохэм къахэфэх.— Ныбжь зиIэу зыкъытфэзыгъэзагъэр мэкIэ дэд, илъэс 55-м къышIокIыгъэх. Зы хъулъфыгъэм игукIэя­гъэр исатыу зэтеуцуагъэр шIокIодынэу зэрэхъугъэр ары. АщкIэ хэкIыпIэ ыгъотынымкIэ апэрэ лъэбэкъоу ышIыщтхэр етIуагъэх, ыгу дгъэIэсагъэ. Къыхэзгъэщымэ сшIоигъу мы телефоным мэхьанэу иIэр. Къытеуагъэм ыцIи, ылъэкъуацIи тыкIэупчIэн тыфитэп. КъедгъэIорэ закъор ыныбжь ыкIи гумэкIыгъоу иIэр, ымакъэкIэ хъулъфыгъэмэ е бзылъфыгъэмэ къэтэшIэ. Зыкъытфэзыгъазэхэрэр зыдаттхэхэрэ журналри кодкIэ зэте­утыгъ. Ащ елъытыгъэу зэфэхьысыжьхэр тэшIых. ЗэрэхъурэмкIэ, специалистымрэ къытеуагъэмрэ тизэдэгущыIэгъу тазыфагу къенэжьы. Арышъ, щыIэныгъэм чIыпIэ зэ­жъоу узэригъэуцохэрэр, зэIуупIэныгъэхэр ыкIи гум дэхъыкIырэр зэхэшIэгъэнхэмкIэ, зэшIохыгъэнхэмкIэ IэпыIэгъу тафэхъуным тыфэхьазыр. УигукIаехэр уизакъоу зэпыпчынхэу щытэп, — еIо Хъуажъ Атланэ.КъэIогъэн фае цыхьэшIэгъу телефоным къытеохэрэм ямызакъоу, занкIэу зафэзыгъазэхэрэми психологическэ IэпыIэгъу зэрарагъэгъотырэр. Ар анахьэу зыфэгъэхьыгъэр Унэгъо МФЦ-м социальнэ фэIо-фашIэхэр зэригъэгъотырэ унагъохэм къарыкIыхэрэр ары, аныбжь илъэси 7-м къыщегъэжьагъэу.— Ащ фэдэ кIэлэцIыкIоу мыщ къакIохэрэм ежьхэр зэреджэхэрэ пIалъэм елъытыгъэу Iэрыфэгъоу уахътэр афэтэгъэнафэ. ГущыIэм пае, мы илъэсым Iоф зыдатшIэрэ кIалэр анахьэу зыгъэгумэкIырэр цIыфхэм ащэукIытэшъ, адэгущыIэн, ахэхьан зэримылъэкIырэр, ариIощт гущыIэхэр къызэримыгъотырэр ары. Игъорыгъозэ зыхэт щыIэкIэ-псэукIэм ар хэтэгъэгъуазэ, янэ къызэриIорэмкIэ, джы тучанми кIон елъэкIы, илэгъухэ­ми гущыIэгъу афэхъу. Джащ фэдэу нэмыкI Iэтахъоу къакIорэм игукъаор янэ-ятэхэм азыфагу бырсырэу илъым ыпкъ къикIыкIэ рэхьатыгъо зэримыIэр, яунэ ихьажьынэу зэрэфэмыер, нэмыкIхэри. КъыхэкIы кIэлэцIыкIур ежь ны-тыхэм къытфащэу, ежьхэм ащыукIытэу чIэдгъэкIыхэмэ, изакъоу Iоф датшIэу. Хъугъэ-шIагъэу тызэрихьылIэхэрэр зэфэшъхьафых, амалэу тIэкIэлъым елъытыгъэу шъхьадж ищыкIэгъэ IэпыIэгъур къыфэтэгъоты, — къыIуагъ психологым.ШъуинэIуасэхэм, шъуиныбджэгъухэм, шъуиIофшIэгъу­хэм мы телефоныр зэрэщыIэр къафэшъуIуат. ЗэкIэми тызэгъусэу тызэдеIэжьымэ, тызэгурыIоу тыщыIэщт!Iэшъынэ Сусан.