Ны мылъкум игъэфедэн

Мы илъэсыр къызихьагъэм щегъэжьагъэу Адыгеим щыпсэурэ унэгъо 1000-мэ япсэупIэ амалхэр нахьышIу шIыгъэнхэмкIэ ны мылъкур къызфагъэфедагъ.

Ны мылъкур къызтефэрэ унагъохэм лъэныкъо зэфэшъхьафхэм ахъщэр апэIуа­­гъэхьаным ифитыныгъэ хабзэм ареты. ПсэупIэхэм язэгъэгъотынкIэ ар нахьыбэм къызфагъэфедэ. Сабыир илъэсищ зыхъу­кIэ, ахъщэр бгъэфедэн плъэкIыщтэу хэбзэгъэуцугъэм къыщеIо, ау унагъом унэ ыщэфыным пае чIыфэ къэралыгъом къыIихыгъэу щытмэ е сабыир къэмыхъу­зэ ыпэкIэ чIыфэ иIагъэмэ, ар гъэгъу­жьыгъэным пае ны мылъкур афатIупщын алъэкIыщт.Мыекъопэ районым ипсэупIэу Тульскэм урысыбзэмкIэ кIэлэегъаджэу Наталья Зайцевар щэлажьэ, лъэпкъ орэдыIо купми хэт. Ишъхьэгъусэу Андрей респуб­ликэм ит хъызмэтшIапIэхэм ащыщ Iоф щешIэ. Ахэм сабыитIу зэдапIу — Аннэрэ Александрэрэ. Зэшъхьэгъусэхэм ны мылъкур 2012-рэ илъэсым, ятIонэрэ пшъашъэр къызэхъум, къаратыгъ. Ащ дэжьым Тульскэм километрэ 27-кIэ пэчыжьэ къутырым унагъор щыпсэу­щтыгъ. Бзылъфыгъэр автобус зэфэ­шъхьафхэмкIэ IофшIапIэм нэсыщтыгъ, кIэлэцIыкIу Iыгъы­пIэми нахьыкIэр зыдищэщтыгъ. Сабыир илъэсищ зэхъум, хабзэм къаритыгъэ ахъщэр къызфагъэфедагъ.— ПсэупIэ дэгъу Тульскэм щызэдгъэгъотыгъ. ЕджапIэм ар зэрэпэблагъэри гупсэф. Унэр хъоо- пщау, пшъашъэхэм афыхэхыгъэ чIыпIи яI. Щагоу дэлъыри, хатэри иных. Зыгорэ дэпшIыхьащтми, чIыпIэ иI,— еIо Наталье.Ны мылъкур зэрэбгъэзекIон плъэкIыщтым зэхъокIыныгъэхэр 2026-рэ илъэсым фэхъугъэх.— ПсэупIэ зэрэзэбгъэгъотышъущтым нэмыкIэу, унэм ишIынкIэ, е игъэкIэжьынкIэ бгъэфедэн ар плъэкIыщт. Сабыир унагъом къимыхъухьэзэ унакIэ зышIынэу езыгъэжьагъэхэм е игъэкIотыгъэ гъэцэкIэжьынхэр зыгъэцакIэхэрэм IофшIэнхэм атырагъэкIодэгъэ ахъщэр чIыфэу хабзэм къыIахыгъэмэ, псэупIэм изэгъэгъотын епхыгъэ нэмыкI чIыфэхэр яIэхэмэ мылъкур ащ пэIуагъэхьажьышъущт. Мыхэм анэмыкI лъэныкъохэмкIи уна­гъохэм ахъщэр къызфагъэфедэшъущт, — тыщигъэгъозагъ Урысыем и Социальнэ фонд икъутамэу АР-м щыIэм ипащэ игуадзэу Татьяна Киселевам.2026-рэ илъэсым ны мылъкур зы­фэдизыр: апэрэ сабыимкIэ — сомэ 728 921-м ехъу; ятIонэрэ е къыкIэлъыкIорэ сабый къызфэхъугъэу ыпэкIэ ны мылъкур зимыIагъэм — сомэ 963 243-м ехъу; хэбзэ мылъкур ыпэкIэ аратыгъэ зыхъу­кIэ, ятIонэрэ сабыимкIэ ахъщэ тедзэу сомэ 234 321-рэ афатIупщы.Сабыир унагъом къызихъокIэ, ащ епхыгъэ тхылъхэр цIыфхэм яграждан зэфыщытыкIэ изытет зыщатхырэ къулыкъум щагъэхьазырых, нэужым ахэр Социальнэ фондым фэкIох. Мэфитф пIалъэкIэ ны мылъкум епхыгъэ тхылъхэр агъэхьазырынхэ фае.Ахъщэр къызфэзыгъэфедэ зышIоигъо­хэм ар къэзыушыхьатырэ лъэIу тхылъыр дунэе хъытыумкIэ «Къэралыгъо IэпыIэгъу» зыфиIорэ нэкIубгъомкIэ агъэхьы­шъущт.Ны мылъкум епхыгъэ къэбар нахь игъэкIотыгъэ къызIэкIэзыгъахьэ зышIоигъохэм зыкI зэпхыныгъэ гупчэм ителефонэу 8(800)I00-00-01-м теошъущтых е Урысыем и Социальнэ фонд икъу­тамэу АР-м щыIэм зыфагъэзэшъущт.Цэй Замир.