Атлетикэ онтэгъумкIэ Урысые зэнэкъокъухэр Краснодар краим испэупIэу Сукко щыкIуагъэх.
СССР-м ыкIи РСФСР-м язаслуженнэ тренерхэу Ю.П. Саркисянрэ В.Ф. Соколовымрэ яшIэжь фэгъэхьыгъэ турнирым илъэс 13 — 15 зыныбжь кIалэхэр ыкIи пшъашъэхэр, джащ фэдэу хъулъфыгъэхэмрэ бзылъфыгъэхэмрэ хэлэжьагъэх. Пшъэшъэ анахьыкIэхэр зыхэт купхэм язэнэкъокъу изэфэхьысыжьхэмкIэ, Адыгеим икомандэ ятIонэрэ чIыпIэр къыдихыгъ.Илъэс 13 — 15 зыныбжьыхэм язэнэкъокъу тиреспубликэ илIыкIохэм дышъэ медалищ къыщахьыгъ. Константин Лапиным екIолIэгъуитIум килограмм 200 къыIэтыгъ, апэрэ чIыпIэр къызэрэдихыгъэм дакIоу спортым имастер хъунымкIэ кандидатым ишапхъэхэр ыгъэцэкIагъэх. Ар зыгъасэрэр Хьакурынэ Руслъан. Цэй Асхьад екIолIэгъуитIум килограмм 230-рэ къыIэтыгъ, чемпион хъугъэ.
Спортсменым итренерыр Чэмбэхъу Анзор. Милана Смаиловами дышъэ медаль къыфагъэшъошагъ, зыгъасэхэрэр Михаил Бесовымрэ Виталий Васюхинымрэ. Къыздэрмыш Айдэмыр тыжьын медаль къыхьыгъ (тренерыр Бгъошэ Тимур), Полина Окинчукрэ ГъукIэлI Стэллэрэ ящэнэрэ хъугъэх. Ахэр Михаил Бесовым егъасэх.Нахьыжъхэм якуп хэтыгъэ ЛъэпцIэрышэ Рэмэзан дышъэ медаль къыфагъэшъошагъ (тренерхэр Артем Горловымрэ Роман Казаковымрэ). Никита Карповым екIолIэгъуитIум килограмм 309-рэ къыIэтыгъ, турнирым текIоныгъэ къыщыдихыгъ ыкIи Урысыем спортымкIэ имастер хъугъэ. Виктория Дедиковам тыжьын медаль къылэжьыгъ (зыгъэсагъэхэр Евгений Иванцовымрэ Владимир Драневымрэ).