Адыгеим и ЛIышъхьэу КъумпIыл Мурат унагъом и Мафэ ипэгъокIэу къалэу Мыекъуапэ зэIукIэгъу щадыриIагъ Урысые зэнэкъокъоу «Илъэсым иунагъу» зыфиIорэм текIоныгъэр къыщыдэзыхыгъэхэм ыкIи ащ хэлэжьагъэхэм.
Iофтхьабзэм хэлэжьагъэх Адыгэ Республикэм иминистрэхэм я Кабинет и Тхьаматэ игуадзэу, АР-м финансхэмкIэ иминистрэу Виктор Орловыр, АР-м IофшIэнымрэ социальнэ хэхъоныгъэмрэкIэ иминистрэу Мырзэ Джанбэч.
Урысые зэнэкъокъоу «Илъэсым иунагъу» зыфиIорэм ишъолъыр чэзыу текIоныгъэр къыщыдэзыхыгъэхэм республикэм и ЛIышъхьэ афэгушIуагъ. Джэджэ районымкIэ Голованов Александррэ Маринэрэ яунагъо лъэныкъоу «Сабыибэ зэрыс унагъу» зыфиIорэм текIоныгъэр къыщыдахыгъ. Зэнэкъокъум ифедеральнэ чэзыу ар къыхеубытэ.«ЗэкIэхэми тышъорэгушхо. Мыщ фэдэ зэнэкъокъухэм джыри зэ уарегъэгупшысэжьы анахь мэхьанэ зиIэ шIуагъэхэм. ШъуищысэкIэ къэшъогъэлъагъо унагъом насыпэу илъыр IофшIэным, узэрэлъытэжьыным, къиныгъохэм уапэшIуекIонымкIэ узэгъусэным зэряпхыгъэр. Унагъом, ным ыкIи кIэлэцIыкIухэм IэпыIэгъу ятыгъэныр Урысые Федерацием и Президентэу Владимир Путиным къэралыгъомкIэ анахь мэхьанэ зиIэхэм ащыщэу къыгъэнэфагъ. Адыгеим пшъэрылъхэу а лъэныкъомкIэ ыпашъхьэ итхэр зэкIэлъыкIоу зэшIуехых, партиеу «Единэ Россием», лъэпкъ проектхэм, пстэуми апэу лъэпкъ проектэу «Унагъор» зыфиIорэм япхыгъэу. Ахэм адакIоу IэпыIэгъумкIэ федеральнэ амалхэри тэгъэфедэх, цIыфхэм IэпыIэгъоу яттырэм нахь зызэредгъэушъомбгъущтымкIэ республикэ Iофтхьабзэхэри зетэхьэх», — къыIуагъ АР-м и ЛIышъхьэ.
КъумпIыл Мурат къызэрэхигъэщыгъэмкIэ, мы аужырэ лъэхъаным республикэм ипотекэ IэпыIэгъур нахь щагъэлъэшыгъ: федеральнэ сомэ мин 450-м республикэм ибюджет щыщ сомэ мин 550-р хагъэхъуагъ, ящэнэрэ кIэлэцIыкIур къызыхъукIэ, унэгъо ныбжьыкIэхэм сомэ мин 300, студент унагъохэм — сомэ мин 200, ны ныбжьыкIэхэу илъэс 26-м шIомыкIыгъэхэм — сомэ мин 25-рэ, ны-студенткэхэм — сомэ мини 100 араты.Сабыибэ зэрыс унагъохэм Iофтхьэбзэ зэфэшъхьафыбэ а лъэныкъомкIэ адызэрахьэ, хэушъхьафыкIыгъэ дзэ операцием хэлажьэхэрэм яунагъохэм шъхьафэу яшIуагъэ арагъэкIы. IэпыIэгъум къыдыхэлъытагъэу социальнэ зэзэгъыныгъэр агъэфедэзэ яIоф къызэIуахын алъэкIыщт, унэгъо гупчэхэм зарагъэушъомбгъущт, кIэлэцIыкIу къэхъугъакIэхэм апае муниципалитет пэпчъ пIэлъэ гъэнэфагъэкIэ агъэфедэщт пкъыгъохэр къызщаратырэ чIыпIэхэр къащызэIуахыгъэх. Бизнесри а Iофым къыхагъэлажьэ: республикэм ипащэхэм ягукъэкIкIэ кIэлэцIыкIухэр зиIэ IофышIэхэм IэпыIэгъу ятыгъэнымкIэ корпоративнэ программэхэр агъэфедэх. Нахьыжъхэм ыкIи сэкъатныгъэ зиIэхэм IэпыIэгъу ятыгъэным фытегъэпсыхьэгъэ Iофтхьабзэхэри агъэфедэх.
«Къэралыгъом иIэпыIэгъу фэныкъо унагъо пэпчъ нэдгъэсыным тынаIэ тетэгъэты. Ау, сыд фэдэрэ Iофтхьабзэ зэрахьагъэми, зэфэгумэкIыжьыныгъэмрэ зэрэлъытэжьынымрэ апеIэн щыIэп. Унагъор ары анахь мэхьанэ зиIэхэм защафагъасэхэрэр: нахьыжъхэм лъытэныгъэ афэшIыгъэныр, нахьыкIэхэм афэгумэкIыгъэныр, Iофым зыщамыдзыеныр. А шIуагъэхэр зы лIэужым къыкIэлъыкIорэ лIэужым негъэсых, цIыф лъэпкъыбэмэ ялIыкIохэр зыщыпсэухэрэ тихэгъэгу нахь лъэш ащ ешIы. Джэгъогъуныгъэ къытфызиIэ IэкIыб къэралхэм япчъагъэ хэхъо нахь мышIэми, шъощ фэдэ унагъохэр ары кIэгъэкъонышхоу тиIэхэр. ЗэкIэхэми шъузэзыпхырэр шъыпкъэныгъэ зэрэзэфышъуиIэр, шъунаIэ зэрэзэтетыжьыр, хэгъэгоу шъузщыпсэурэм фышъуиIэ шIулъэгъур ары. Хэгъэгум иухъумакIохэм яунагъохэм шъхьафэу зафэзгъазэ сшIоигъу. Яшъхьэгъусэхэмрэ акъохэмрэ пшъэрылъышхоу яIэр агъэцэкIэфэ, шъо унагъом иджэныкъо машIо къэшъоухъумэ, тидзэкIолIхэм кIэгъэкъонышхоу шъуряI. Тицыхьэ зытелъыжьэу ыпэкIэ тызэрэлъыкIуатэрэм, тикIэлэцIыкIухэр зэрэтпIухэрэм ыкIи неущрэ мафэм тицыхьэ зэрэтелъым яшыхьатышIух шъуиунагъохэр зэкIэ», — къыIуагъ Адыгеим и ЛIышъхьэ.Ащ нэужым республикэм ипащэ зэнэкъокъум щатекIуагъэхэм дипломхэр ыкIи сомэ мин 300 хъурэ ахъщэ шIухьафтынхэр аритыгъэх. Урысые зэнэкъокъоу «Илъэсым иунагъу» зыфиIорэм къыхиубытэрэ лъэныкъоу «Сабыибэ зэрыс унагъор» зыфиIорэмкIэ текIоныгъэр къыдэзыхыгъэхэр Джэджэ районым щыщхэу Голованов Александррэ Маринэрэ, «Унэгъо дышъ» зыфиIорэмкIэ Джэджэ районым щыщхэу Спивак Викторрэ Еленэрэ, «Хэгъэгум иухъумэкIо унагъу» зыфиIорэмкIэ Красногвардейскэ районым щыщхэу Антонов Сергейрэ Иринэрэ, «Унагъор шэн-хабзэхэм яухъумакIу» зыфиIорэмкIэ Теуцожь районым щыщхэу СтIашъу Руслъанрэ Заремэрэ, «Къоджэ унагъу» зыфиIорэмкIэ Кощхьэблэ районым щыщхэу Щыгъущэ Бислъанрэ Саидэрэ, «Унэгъо ныбжьыкI» зыфиIорэмкIэ Шэуджэн районым щыщхэу Нэпсэу Аслъанрэ Зарэрэ.ЗэIукIэгъум ыуж КъумпIыл Мурат текIоныгъэр къыдэзыхыгъэ унагъохэм гущыIэгъу афэхъугъ, республикэм и ЛIышъхьэ ынаIэ къызэратыригъэтырэм, кIэлэцIыкIухэм япIункIэ къызэрадеIэрэм апае зэрэфэразэхэр ахэм къаIуагъ.ЯIоф къызэIуахынымкIэ, лъэпкъ IэпэщысэхэмкIэ IэпыIэгъу къаратынымкIэ, чIыпIэхэм хэхъоныгъэ ашIынымкIэ грант программэхэр Адыгеим зэрэщагъэфедэхэрэм ыкIи нэмыкIхэм атегущыIагъэх. ХэушъхьафыкIыгъэ дзэ операцием хэлажьэхэу СССР-м и ЛIыхъужъэу Андырхъое Хъусен ыцIэ зыхьырэ артиллеристскэ дивизионым ыкIи Мыекъопэ реактивнэ дивизионым ядзэ подразделениехэм къулыкъур ащызыхьыхэрэм яшIуагъэ зэрарагъэкIырэми тегущыIагъэх.Iофыгъоу къаIэтыгъэ пстэуми республикэм и ЛIышъхьэ игъэкIотыгъэ джэуапхэр аритыжьыгъэх, икIэухым АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч пшъэрылъ фишIыгъ зэIукIэгъум илъэхъан упчIэу къатыгъэхэмрэ игъоу алъэгъугъэхэмрэ зэфихьысыжьынхэу.АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.