А. Гусев
Урысые футбол союзыр къэзыгъэлъагъохэу, футболымкIэ хэгъэгум ихэшыпыкIыгъэ командэ хэтыгъэхэу Андрей Аршавиным, Александр Филимоновым, Ари футболымкIэ Урысыем и Кубок Адыгеим къащагъ.
Хрусталым хэшIыкIыгъэ кубокыр метрэ 1800-кIэ чIым теIэтыкIыгъэ Азыщ къушъхьэтхым апэу дахьыягъ. ЕтIанэ республикэм ичIыпIэ анахь дахэхэм ащыщым — Гранитнэ кIэим рафткIэ къыщыращэкIыгъ. Мэфи 3-м къыкIоцI хьакIэхэм республикэм нэIуасэ зыфашIыгъ, илъэгъупхъэ чIыпIэхэм ащыIагъэх.Трофи-турым къыдыхэлъытагъэу Урысыем и Кубок аIыгъэу пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Экспресс-Кубань» зыфиIоу Тэхъутэмыкъое районым щызэхэщагъэм, заводэу «Картонтарэм», УрысыемкIэ бзылъфыгъэ IэшэшI закъоу Еутых Асе и Дышъэ ордэунэ ащыIагъэх. Спортсменхэм Мыекъуапэ илъэгъупхъэ чIыпIэхэр, Адыгэ Республикэм и Лъэпкъ музей зэрагъэлъэгъугъэх.
ДзюдомкIэ олимпийскэ резервым испорт еджапIэу Кобл Якъубэ ыцIэ зыхьырэм зэкIохэм, Урысые футбол союзым иамбассадорхэм кимоно къаратыгъ, мы спорт еджапIэр къэзыухыгъэу, дзюдомкIэ олимпийскэ чемпионэу Мудранэ Бислъан тренировкэ шъхьэихыгъэ мыщ щызэхищагъ.Трофи-турым къыдыхэлъытагъэуадыгэ къуаер къызыщыдагъэкIырэ заводэу Джэджэ районым итым щыIагъэх, лъэпкъ къашъомкIэ Адыгеим икъэралыгъо академическэ ансамблэу «Налмэсым» мастер-классэу къытыгъэм еплъыгъэх.Урысые футбол союзым илIыкIохэм зипсауныгъэкIэ щыкIагъэ зиIэ кIэлэцIыкIухэм атегъэпсыхьэгъэ Мыекъопэ еджапIэм, республикэ футбол еджапIэхэм ачIэсхэм футболымкIэ десэ къафатыгъ. Джащ фэдэу футболист цIэрыIохэр хэушъхьафыкIыгъэ дзэ операцием хэлэжьэрэ тидзэкIолIхэм апае гуфакIохэм хъытыухэр, шэф остыгъэхэр ыкIи нэмыкI пкъыгъохэр зыщагъэхьазырхэрэ унэм щыIагъэх. «Единэ Россием» зэригъэуIурэ шIушIэ IэпыIэгъум игъусэу мастерскоим къыщагъэхьазырхэрэр фронтым рагъащэх. Спортсменхэр шIушIэ Iофтхьабзэм хэлэжьагъэх, хэушъхьафыкIыгъэ дзэ операцием иветеранхэм яассоциациеу Адыгэ Республикэм щыIэм сомэ миллион ратыгъ. Сэкъатныгъэ зиIэхэр зыпылъ спортым изегъэушъомбгъун ар пэIуагъэхьащт.
Трофи-турымкIэ хъугъэ-шIэгъэ шъхьаIэу хъугъэр Мыекъопэ «Зэкъошныгъэмрэ» Красноярскэ «Енисеимрэ» зэдыряIэгъэ ешIэгъур ары. «Пути регионов» зыфиIорэмкIэ Урысыем и Ку-бок ия 4-рэ едзыгъо игупчэ ешIэгъоу ар щытыгъ.ЕшIэгъум ыпэкIэ футболыр зикIасэхэм яфестиваль щыIагъ. Пчыхьэзэхахьэм къыдыхэлъытагъэу урысые эстрадэм иартистхэм, республикэм искусствэмкIэ иIэпэIасэхэм концерт къатыгъ, футболымкIэ хэгъэгум и Кубок аIыгъэу сурэт зытырырагъэхыгъ, футболист цIэрыIохэу, Евро-2008-м джэрз медаль къыщызыхьыгъэ Андрей Аршавиным, Урысыем гъогогъуи 6 ичемпион хъугъэ Александр Филимоновым, Урысыем и Кубок къыдэзыхыгъэ Ари автографхэр къаIахыгъэх.Урысые политическэ партиеу «Единэ Россием» и Адыгэ шъолъыр къутамэ и Секретарэу, Адыгеим и ЛIышъхьэу КъумпIыл Мурат Мыекъопэ «Зэкъошныгъэм» фэгумэкIэу, ащ иешIакIэ еплъы шIоигъоу республикэ стадионым къэкIуагъ. Футболыр зикIасэхэм ягъусэу ЛIышъхьэр анахь футбол зэнэкъокъушхоу республикэм итарихъ хэхьащтым шIогъэшIэгъонэу еплъыгъ.
КомандитIуми ахэтыгъэхэр дэгъоу ешIагъэх. ТекIоныгъэ къыдэзыхыщтыр амышIэу футболыр зикIасэхэр едзыгъом ыкIэм нэс гумэкI горэм зэлъиIыгъыгъэх. Апэрэ таймыр 0:0-у аухыгъ. ЯтIонэрэ таймым Красноярскэ ифутболистэу Владислав Луташевым «Зэкъошныгъэм» икъэлапчъэ апэрэ Iэгуаор дидзагъ. Я 84-рэ такъикъым Мыекъопэ клубым ифутболистэу Делэкъо Аскэр ыгъэгушIуагъэх: «Енисеим» икъэлапчъэ Iэгуаор ащ дидзи, пчъагъэр 1:1 хъугъэ. ЕшIэгъум кIэухэу фэхъущтыр пенальтикIэ къэнэфагъ. ХьакIэхэр зы IэгуаокIэ тапэ ишъыгъэх.Адыгеим и ЛIышъхьэу КъумпIыл Мурат спорт комментаторэу Нэгъуцу Роман Адыгэ Республикэм изаслуженнэ журналист ибгъэхалъхьэрэ итхылърэ республикэ стадионым щыритыжьыгъэх.«Футболыр зикIасэхэу Адыгеим исхэм непэ ямэфэкIышхуагъ. ЧIыпIэ нэкI стадионым зэримыIагъэм ар къеушыхьаты. ТэркIэ ар хъугъэ-шIэгъэшхо хъугъэ. Ащ фэдэ Iофтхьэбзэ шIагъо республикэм зэрэщызэхищагъэм фэшI Урысые футбол союзым лъэшэу тыфэраз. Футболист цIэрыIохэр зыхэлэжьэгъэхэ трофи-турым спортсмен ныбжьыкIабэ тыригъэгушхощт нахь егугъухэзэ тренировкэхэр ашIынэу, текIоныгъакIэхэр къыдахынэу», — къыIуагъ АР-м и ЛIышъхьэ.ЕшIэгъу ужым КъумпIыл Мурат «Зэкъошныгъэм» ифутболистхэм аIукIагъ ыкIи адэгущыIагъ. Дэгъоу зэрешIагъэхэм пае спортсменхэм зэрафэразэр республикэм и ЛIышъхьэ ариIуагъ, клубым хэхъоныгъэ егъэшIыгъэнымкIэ амалэу щыIэхэм афэгъэхьыгъэу тренерхэм адэгущыIагъ.Футболыр спорт лъэпкъ шъхьаIэхэм зэрахахьэрэр, ныбжь зэфэшъхьафхэр зиIэ нэбгырабэу ар зикIасэхэри, спорт еджапIэхэм якIолIэрэ ныбжьыкIэхэри ащ зэрэзэрипхыхэрэр АР-м и ЛIышъхьэ къыхигъэщыгъ.Мы аужырэ илъэсхэм хэпшIыкIэу республикэм испорт инфраструктурэ джырэ шапхъэхэм адиштэу нахь зэтырагъэпсыхьагъ, футбол ешIапIэхэм ахагъэхъуагъ. Республикэм ипащэ футбол клубэу «Зэкъошныгъэм» иIофшIэнкIэ IэпыIэгъу фэхъу. КъумпIыл Мурат зэрэхигъэунэфыкIыгъэмкIэ, футболым Адыгеим зыщегъэушъомбгъугъэнымкIэ ищыкIэгъэ амалхэр тапэкIи зэрахьащтых.АР-м и ЛIышъхьэ ипресс-къулыкъу къытырэ къэбархэмкIэЛIышэ Саныет.