Iэшъынэ А.
Iоныгъом и 8-м академическэ мэкъамэм и Дунэе фестивалэу «Адыгея музыкальная» зыфиIорэр «Налмэсым» и Унэ къыщызэIуахыгъ. Къэралыгъо программэу «Культурэм ихэхъоныгъ» зыфиIоу 2026-рэ илъэсым телъытагъэм къызэрэщыдыхэлъытагъэу академическэ мэкъамэм ишъолъыр фестиваль зэхащагъ.
Адыгэ Республикэм культурэмкIэ и Министерствэ, республикэм и Концерт зэхахьэ, общественнэ организациеу «Урысыем икомпозиторхэм я Союз» зыфиIорэм и Адыгэ шъолъыр къутамэ Iофтхьабзэм кIэщакIо фэхъугъэх. Ащ иIофшIэн илъэси 9 хъугъэу лъызыгъэкIуатэрэр композитор цIэрыIоу Нэхэе Аслъан.Фестивалыр къызэIуахыным ыпэкIэ композиторхэр зыхэлэжьэгъэ пресс-зэIукIэ рагъэкIокIыгъ. Казахстан, Узбекистан, Монголием, Абхъазым, Къалмыкъым, Татарстан, Якутием, Санкт-Петербург, КъБР-м, Краснодар краим, Иркутскэ хэкум ыкIи Адыгеим якомпозиторхэм журналистхэр аIукIагъэх.— Лъэпкъ академическэ музыкальнэ искусствэм хэхъоныгъэ ышIыным, къыткIэхъухьэрэ лIэужхэм яхэгъэгу шIу алъэгъоу пIугъэнхэм фестивалыр афытегъэпсыхьагъ. Академическэ музыкэм ныбжьыкIэхэр хэщэгъэнхэм, шъолъырхэм ыкIи лъэпкъ зэфэшъхьафхэм азыфагу илъ культурнэ зэпхыныгъэр гъэпытэгъэным ар фэIорышIэ. Илъэс къэс мыщ мэкъэмакIэхэр хэтэгъахьэ ыкIи Iофтхьабзэм зетэгъэушъомбгъу, нахь гъэшIэгъон зэрэтшIыщтым тыпылъ, — зэIукIэм къыщиIуагъ Нэхэе Аслъан.
— Академическэ мэкъамэм и Дунэе фестиваль Адыгеим щыкIоным зиIахьышIу хэлъыр АР-м и ЛIышъхьэу КъумпIыл Мурат. Непэ тизыкIыныгъэ зыгъэпытэхэрэм ащыщ лъэпкъ зэфэшъхьафхэм якультурэ бай. Лъэпкъ шэн-хабзэхэм якъэухъумэн мыщ фэдэ фестивальхэр фэIорышIэх, — хигъэунэфыкIыгъ Урысые Федерацием икомпозиторхэм я Союз иправление итхьаматэу, Урысыем инароднэ артистэу Рашид Калимуллиным.Академическэ мэкъамэм и Дунэе фестиваль мэфэкI шIыкIэм тетэу къызэIуахыгъ.— АР-м и ЛIышъхьэрэ министрэхэм я Кабинетрэ тиIэпыIэгъухэу академическэ мэкъамэм икъызэтегъэнэнрэ ихэгъэхъонрэ тадэлажьэ. Академическэ мэкъамэхэм яфестиваль гухахъо хэжъугъотэнэу сышъуфэлъаIо, — къыIуагъ АР-м культурэмкIэ иминистрэу Аулъэ Юрэ.Адыгеим исимфоническэ оркестрэ зэлъашIэрэ оперэ зэфэшъхьафхэм япычыгъохэр къыригъэIуагъэх. ПстэумкIи произведении 10-м ехъу программэм хэхьагъ.Урысыем, Адыгеим, Къэрэщэе-Щэрджэсым, Къэбэртэе-Бэлъкъарым янароднэ артистэу, Д. Шостакович ыцIэкIэ щыт тыным, УФ-м и Правительствэ ишIухьафтын ялауреатэу, Зэкъошныгъэм иорден къызфагъэшъошагъэу, «Ислъамыем» икIэщакIоу Нэхэе Аслъан имэкъамэу «Нартская рапсодия» зыфиIорэм фестивалыр къызэIуихыгъ. Адыгеим исимфоническэ оркестрэ скрипкэмкIэ исолистэу ХъутIыжъ Заур композиторэу Нэхэе Аслъан ытхыгъэр фестивалым щигъэIугъ. Рашид Калимуллиным, ХьэIупэ Джэбрэил, Ян Круль, Тхьабысымэ Умарэ, Ильяс Камаловым, Къэбэрдэкъо Мурат, ЖэнэлI Светланэ, Анзэрэкъо Чеслав, КIыргъ Юрэ ыкIи нэмыкI мэкъэмэусхэм яIофшIагъэхэр мэфитIум къырагъэIуагъэх.Къэгъэлъэгъоным идирижерыгъэх АР-м инароднэ артистэу, Адыгеим исимфоническэ оркестрэ ипащэу Аркадий Хуснияровыр, Урысыем изаслуженнэ артистэу Андрей Семеновыр, дирижерэу Николай Кустовыр.Iоныгъом и 9-м академическэ мэкъамэм ишъолъыр фестиваль хэлэжьагъэхэм апае Iэнэ хъурае зэхащагъ. Культурэм ыкIи искусствэм алъэныкъокIэ гумэкIыгъоу щыIэхэм ахэр атегущыIагъэх. Шъолъырхэм язэпхыныгъэ гъэпытэгъэным, тапэкIэ зэрэзэдэлэжьэщтхэм, академическэ музыкэм фэгъэхьыгъэ Iофтхьабзэхэр нахьыбэу зэхэщэгъэнхэм, нэмыкIхэм анэсыгъэх.Академическэ мэкъамэм и Дунэе фестиваль иятIонэрэ мафэ концертыр Адыгэ республикэ колледжэу Тхьабысымэ Умар ыцIэ зыхьырэм къыщатыгъ. Музыкальнэ произведении 10-м ехъу программэм иятIонэрэ пычыгъо хэхьагъ. МэфэкI шIыкIэм тетэу Iофтхьабзэр зэфашIыжьыгъ.Лъэпшъыкъо Фатим.