Кушъхьэфэчъэ спортымкIэ зэнэкъокъоу «Темыр Кавказым щыпсэурэ лъэпкъхэм язэкъошныгъ» зыфиIорэр я 34-у Мыекъуапэ щырагъэжьагъ.
Мэфэ пчъагъэхэм ателъытэгъэ турнирыр республикэм икъэлэ шъхьаIэ щырагъажьэшъ, къалэу Грознэм щаухы. ЗэкIэмкIи ащ едзыгъуи 7 къыдыхэлъытагъ, спортсменхэм зэкIэмкIи километрэ 933,5-рэ къачъыщт. ТекIоныгъэм фэбанэх Урысыем, Белоруссием, Казахстан ыкIи Зэхэт Араб Эмиратхэм яспортсмен анахь лъэшхэр.— «Темыр Кавказым щыпсэурэ лъэпкъхэм язэкъошныгъ» зыфиIорэр тикъэралыгъокIэ анахь мэхьанэшхо зиIэ зэнэкъокъухэм ащыщ. Илъэс пчъагъэхэм зэхащэрэ турнирым шъолъырхэр зэрепхых. Кушъхьэфэчъэ спортыр цIыф лъэшхэм яспорт, зэнэкъокъум изэфэхьысыжь зэлъытыгъэр команднэ IофшIэныр ыкIи шъхьэкIэфэныгъэ зэфэпшIыжьыныр ары. Темыр Кавказым ичIыпIэ зэфэшъхьафхэм ащыкIорэ къызэдэчъэным спортымрэ гъэсэныгъэмрэ зэрепхых. Сыда пIомэ, спортсменхэр зэрэзэнэкъокъухэрэм дакIоу шъолъырхэм ятарихъ нэIуасэ зыфашIы, зэрагъашIэ. Iофтхьабзэм хэлажьэхэрэм гъэхъэгъэшIухэр ашIынхэу, текIоныгъэм фэбэнэнхэу афэсэIо. Ежь зэнэкъокъур IэпэIэсэныгъэм имэфэкI орэхъу, Темыр Кавказым ихьэкIэпэгъокIыныр спортсменхэм дахэкIэ агу къерэнэжь, — къыIуагъ Урысыем кушъхьэфэчъэ спортымкIэ и Федерацие ипрезидентэу Олег Сиенкэм.
Мы илъэсымкIэ зэнэкъокъум къыдыхэлъытэгъэ апэрэ едзыгъуитIур Адыгеим щыкIуагъэх. Апэрэм игъогууанэ километри 138,7-рэ илъыгъ. Спортсменхэм Мыекъуапэ щырагъажьи, республикэм ипсэупIэхэу Севернэм, Калининым, Келермесскэм, Джаджэм, Заревэм, Улапэ, Штурбинэм, Дукмасовым, Ореховым ягъогухэм къарычъагъэх. Адыгеим икъэлэ шъхьаIэ иурамэу Пионерскэм зэнэкъокъум иапэрэ едзыгъо щаухыгъ. Командэу «Мангазея — Московскэ спорт» зыфиIорэм илIыкIохэм хагъэунэфыкIырэ чIыпIищ аубытыгъ. Георгий Сергеевым текIоныгъэр къыдихыгъ, Артемий Хомяковым ятIонэрэ чIыпIэр фагъэшъошагъ, Михаил Вьюношевыр ящэнэрэ хъугъэ. Адыгеим испортсменхэмкIэ къэгъэлъэгъон анахь дэгъу зиIэр Лъэустэнджэл Даниил, ар я 10-р. Зыныбжь илъэс 19-м нэмысыгъэхэм язэнэкъокъу пэрытныгъэр щиубытыгъ Мыекъуапэ щыщэу, спортымкIэ мастерэу Вадим Ларичевым.Зэнэкъокъум иятIонэрэ едзыгъо къыдыхэлъытагъэу унэе зэнэкъокъухэр станицэу Кужорскэм щыкIуагъэх, спортсменхэм километрэ 13 къачъыгъ. Москва илIыкIохэм хагъэунэфыкIырэ чIыпIищ къахьыгъ. Савва Новиковым пэрытныгъэр ыубытыгъ, Артемий Хомяковым ятIонэрэ чIыпIэр къыдихыгъ, Михаил Фокиныр ящэнэр.ЕдзыгъуитIум ауж генеральнэ классификацием пэрытныгъэ щиIыгъ Москва щыщ Артемий Хомяковым. НыбжьыкIэхэм язэнэкъокъу апэрэ чIыпIэр щеубыты Мыекъуапэ илIыкIоу Вадим Ларичевым.Джы спортсменхэр Къэрэщэе-Щэрджэс Республикэм щызэнэкъокъущтых.