ИгъэкIотыгъэ гъэцэкIэжьынхэр щэкIох

Къуаджэу Хьакурынэхьаблэ дэт кIэлэ­цIыкIу IыгъыпIэу «Насып» зыфиIорэм иятIонэрэ псэуа­лъэ агъэцэкIэжьы «Къоджэ псэупIэхэм хэхъоныгъэ ягъэ­шIыгъэныр» зыфиIорэ къэралыгъо программэм ишIуагъэкIэ.

ар аужырэ шапхъэхэм адиштэ хъущт, зэрифэшъуашэу зэтырагъэпсыхьажьыщт.КIэлэцIыкIу IыгъыпIэм ипащэу Зе­зэрэхьэ Фатимэ къызэриIуагъэмкIэ, IофшIэнхэр шэкIогъум ыкIэхэм аухынхэу щыт. ЗэкIэмкIи сомэ миллион 86,5-м ехъу ащ къыфатIупщыгъ, ащ щыщэу миллион 65-м кIахьэу гъэкIэжьын Iоф­шIэнхэм атефэщт, адрэ мылъкумкIэ зэтырагъэпсыхьащт, ищыкIэгъэ Iэмэ-­псымэхэр къащэщтых.

— 1978-рэ илъэсым ашIыгъэ ­псэуалъэм игъэкIотыгъэ гъэцэкIэжьынхэр ищыкIэгъэ дэ­дагъ. Колхозым епхыгъэ кIэлэцIыкIу IыгъыпIэу мыр къызэ­Iуахыгъагъ, нэужым зэтегъэуцожьыгъэнымкIэ гупчагъ, зи­псауныгъэкIэ илэгъухэм акIэмыхьэрэ кIэлэцIыкIухэр чIэсэуи хъугъэ. 2013-рэ илъэсым сабыеу тиIэр бэу, тычIэмыфэ зэхъум, мы чIыпIэр къытатыжьи, ­къоджэ гъунэм щыпсэухэу, мыщ нахь пэблагъэхэр къэдгъэ­кIожьыгъагъэх. ЗэкIэмкIи нэбгырэ 75-м тегъэпсыхьэгъагъ, 60-м кIахьэу къакIощтыгъэх,ау гъэцэкIэжьынхэр тыухымэ, япчъагъэ хэхъонэу къытшIошIы, — еIо Фатимэ.ГъэцэкIэжьынхэр зыщыкIохэрэ кIэлэцIыкIу IыгъыпIэм текIолIагъ, пшъэрылъэу иIэмкIэ гъунэпкъэ гъэнэфагъэ зиIэ обществэу «Лидерстрой» зыфиIоу Iоф­шIэнхэр зыгъэцакIэхэрэм ипрорабэу Мэрэтыкъо Рэмэзан гущыIэгъу тыфэ­хъугъ. Ащ къызэриIуагъэмкIэ, игъэкIотыгъэ IофшIэнхэр псэуалъэм ичIыпIэ пэпчъ ищыкIагъ. КъатитIоу зэтетэу кIэ­лэ­цIыкIухэр зычIэсым нэмыкIэу щагум шъхьафэу зыщыгыкIэхэрэ, зыщыпщэ­рыхьэхэрэ, гъэтIылъыпIэ хэтэу дэтых.

— IофшIэнхэр щылэ мазэм ыкIэхэм адэжь тыублэгъагъэх. ЫпэрапшIэу дэпкъхэм, кIашъо­хэм акIэрылъи, джэхашъохэм ателъи атетхыгъэх, дгъэкъэбзагъэх. Инженер инфраструктурэхэр, гъэфэбапIэхэр, псырыкIуапIэхэр, электропроводкэр зэблэтхъугъэх. Шапхъэхэм адимыштэрэ чIыпIэхэр дгъэтэрэзыжьыгъэх. Нэужым икIэрыкIэу штукатуркэ зэкIэ тшIы­жьы­гъэх, джэхашъохэр идгъэ­чъыкIыжьыгъэх, «декоративная штукатурка» зыфаIорэр тэшIыжьы, кIашъохэр тэгъэтэрэзых, дэкIояпIэр зэблэт­хъугъ. Шъхьаныгъупчъэхэр, ­пчъэхэр хэдгъэуцожьыгъэх. Нэужым зыщищыкIагъэм плиткэр, ламинатыр атетыдзэ­жьыгъ, — еIо Рэмэзан.IофшIэнхэр агъэцакIэхэ хъумэ анахьэу анаIэ зытырагъэтырэр кIэлэцIыкIухэм япсауныгъ ыкIи ящынэгъончъагъ, унэ пстэуми джырэ уахътэм диштэрэ вентиляцием исистемэ ащагъэуцугъ, ащ ишIуагъэкIэ жьы къабзэр ренэу ахэм арытыщт.

— КIэлэцIыкIухэр мэфэ реным зыдэщыIэщтхэ чIыпIэр гупсэфэу ыкIи щынэгъончъэу гъэпсыгъэн фае. АщкIэ пшъэрылъэу тиIэр зэкIэ зэрифэшъуашэу тэгъэца­кIэ. IофшIэнэу щыIэм елъытыгъэу мафэм нэбгырэ 20-м ехъу дэтэу мэхъу, нэбгырэ пэпчъ ипшъэрылъхэр зэрифэшъуашэу егъэцакIэ. ЫпэрапшIэу санитар шапхъэхэм адиштэу, щынэгъончъэу зэрэдгъэпсыщтыр ары тызыпылъыр. ГущыIэм пае, розеткэхэр зэкIэ дэтхьыягъэх, шап­хъэм къызэрэдилъытэрэмкIэ, кIэ­лэцIыкIухэр нэмысынхэм пае ахэм метрэ 1,80-рэ ялъэгагъэу щытынхэ фае, — къыхигъэ­щыгъ Мэрэтыкъо Рэмэзан.КIэлэцIыкIу IыгъыпIэм ыкIоцI гупсэфэу, зэкIэмкIи купиплIыр шъхьафэу чIэфэнэу зэтеутыгъ. Зы бгъумкIэ уихьэ­мэ, санитар унэр, зыщыджэгущтхэр, зыщыш­хэщтхэр, зыщычъыещтхэр зэкIэ шъхьафых. Ащ нэмыкIэу пащэм, психологым, медицинэм иIофышIэ якабинетхэр хэтых.Псэолъэ пстэуми унашъхьэхэр ащызэблахъугъэх. Дэпкъхэм атегъэуагъэр нахь макIэ шIыгъэным пае ыпэкIэ имы­Iагъэу «армопояс» зыфиIорэм фэдэ афашIыжьыгъ.КIэлэцIыкIу IыгъыпIэм ыкIоцI закъоп агъэкIэжьырэр. Псэуалъэхэм акIыб керамогранитым хэшIыкIыгъэ хэушъхьафыкIыгъэ плиткэр атырагъапкIэщтыгъ. Ащ ыпэкIэ дэпкъхэр агъэхьазырыгъэх. Ар санитар шапхъэхэм адештэ, дахэу къызэрэлъэгъощтым имызакъоу, кIымафэрэ чъыIэр къыпхырыкIыщтэп, гъэмафэрэ чъыIэтагъэ къышIыщт. Щагум изэтегъэпсыхьани ыуж ихьагъэх. КIэлэцIыкIухэр тыгъэм хэмытхэу зыщыджэгущтхэ чIыпIэхэр афагъэпсых. ЫпэкIэ ащ фэдэхэр икъущтыгъэхэп, джы куп пэпчъ шъхьафэу иIэщт. Джащ фэдэу щагум асфальт тыралъхьащт, дахэу къашIыхьащт, зыщыджэгущтхэ ыкIи спортым епхыгъэ Iофтхьабзэхэр зыщызэхащэщт чIыпIэхэр агъэпсыщтых.Мы кIэлэцIыкIу IыгъыпIэм чIэс кIэлэцIыкIухэр «Насыпым» иунэ шъхьаIэ джырэкIэ щыIэх. ГъэрекIо къэралыгъо программэм ишIуагъэкIэ ари зэрифэшъуашэу зэтырагъэпсыхьажьыгъагъ.Зэзэгъыныгъэу зэдашIыгъэмкIэ, шэ­кIогъум ыкIэхэм адэжь игъэкIотыгъэ гъэцэкIэжьынхэр аухыщтых. Нэужым Iэмэ-­псымэхэр чIагъэуцожьыщтых, зэIуа­хыжьыщт. 2027-рэ илъэсым иублэгъум гъэкIэжьыгъэ кIэлэцIыкIу IыгъыпIэм ипчъэхэр къызэIуихыжьынхэу ­агъэнафэ.ДЕЛЭКЪО Анет.