КультурэмкIэ Министерствэм ихъарзынэщ
Адыгеим и Лъэпкъ музей икъэгъэлъэгъонэу «Черкешенка: гармония, изящество и стиль» зыфиIорэр республикэу Ингушетием икъалэу Сунжа дэт къэралыгъо музеим къыщызэIуахыгъ. Лъэпкъ культурэр къэухъумэгъэным ыкIи хэхъоныгъэ ышIыным, нэмыкI лъэпкъхэм тикультурэ нахьышIоу ягъэшIэгъэным Iофтхьабзэр атегъэпсыхьагъ.
Пасэм адыгэ бзылъфыгъэр зыфэдагъэм ар къытегущыIэ. Археологическэ ыкIи этнографическэ купитIоу къэгъэлъэгъоныр гощыгъэ. Зым бзылъфыгъэ гъэдэхалъэхэр, унэе хъызмэтым щагъэфедэщтыгъэ пкъыгъохэу археологхэм къагъотыгъэхэр хэхьагъэх. Адрэм лъэпкъ шъуашэхэр къыщыгъэлъэгъуагъэх.— Къэгъэлъэгъоным илъэси 10 фэдиз ыныбжь, хъулъфыгъэми бзылъфыгъэми ар афэгъэхьыгъ, анахь проектышхоу Лъэпкъ музеим ыгъэцакIэхэрэм ахэхьэ. Бзылъфыгъэмэ афэгъэхьыгъэ лъэныкъор апэрэу Ингушетием къэтщагъ. Адыгэ шъуашэр дунаим тет лъэпкъ шъуашэхэм зэрафэмыдэр, гъэпсыкIэу иIэмкIэ зэратекIырэр къэгъэлъэгъоным нафэ къеш1ы. Адыгэ пшъашъэм ишъуашэ идэхагъэрэ зышIыгъэм иIэпэIэсагъэрэ къэгъэлъэгъоным анахь шъхьаIэу щыпхырыщыгъ. Шъуашэр тарихъ намысэу зэрэщытыр, фэшъхьафхэри зэхахьэм къыщытIотагъэх, — къыIуагъ Лъэпкъ музеим ипащэ игуадзэу Шэуджэн Налмэс.
Дышъэидэм чIыпIэ хэхыгъэ Iофтхьабзэм щыриI. Сыда пIомэ, адыгэ бзылъфыгъэм ищыIэныгъэ изы Iахь анахь шъхьаIэхэм ар ащыщыгъ. Пшъэшъэжъыехэм яцIыкIугъо щегъэжьагъэу IэпэIэсэныгъэм фагъасэщтыгъэх. Дышъэ ыкIи тыжьын IуданэхэмкIэ пшъашъэм хидыкIышъу зыхъукIэ, пIуныгъэ-гъэсэныгъэ тэрэз зэриIэр, унэгъо дэгъу зэрэщапIугъэр ащ къыушыхьатыщтыгъ. ДышъэидэкIэ гъэкIэрэкIэгъэ щыгъынхэм, Iалъмэкъхэм, жьыфхэм, лэнысталъэхэм ыкIи нэмыкI хьап-щыпхэм къэгъэлъэгъоныр къагъэбаигъ.Адыгеим и Лъэпкъ музей икъэгъэлъэгъон цIыфыбэ къекIолIагъ. Республикэу Ингушетием и Правительствэ ипащэу Владимир Сластениныр ащ еблэгъагъ. Лъэпкъ Iэпэщысэхэр шIогъэшIэгъоныгъэх ыкIи къэбарэу апылъхэм защигъэгъозагъ.— Мыщ фэдэ къэгъэлъэгъон хьалэмэт Адыгеим къызэрикIыгъэмкIэ лъэшэу тафэраз. Адыгэ лъэпкъ искусствэр тилъэпкъ зэрэпэблагъэр къыхэзгъэщы сшIоигъу. Кавказым ис лъэпкъхэм зыкIыныгъэрэ зэкъошныгъэрэ азыфагу илъыным Iофтхьабзэр фэIорышIэщт. Къэралыгъом щыпсэурэ лъэпкъ зэфэшъхьафхэм якультурэ ибаигъэ зэрэгъунэнчъэр непэрэ Iофтхьабзэм къыушыхьатыгъ, — къыIуагъ Владимир Сластениным.Адыгэ бзылъфыгъэм фэгъэхьыгъэ къэгъэлъэгъоныр къалэу Сунжа дэт къэралыгъо музеим шэкIогъум и 8-м нэс щызэIухыгъэщт. Искусствэр зышIогъэшIэгъонхэр ащ еплъынхэ алъэкIыщт.
ЛъэпшъыкъоФатим.