Лъэпкъ тхылъеджапIэр
Апэрэ дунэе заом иилъэсхэм Адыгеим икъушъхьэчIэсхэмрэ Пшызэ икъэзэкъхэмрэ зэо гъусэныгъэу зэдыряIагъэм и ШIэжь мафэ тишъолъыр 2014-рэ илъэсым щегъэжьагъэу щыхагъэунэфыкIы. Ащ фэгъэхьыгъэ Iофтхьабзэ АР-м и Лъэпкъ тхылъеджапIэ мы мафэхэм щызэхащэгъагъ.
Iофтхьабзэм хэлэжьагъэх къэралыгъо хабзэм илIыкIохэр, Адыгэ къэралыгъо университетым тарихъымкIэ ифакультет истудентхэр, тхылъеджапIэм иIофышIэхэр. Мэхьанэ зиIэ тарихъ хъугъэ-шIагъэм ихэгъэунэфыкIын икIэщэкIуагъэх АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет, общественнэ-къэралыгъо организациеу «Урысыем илъэпкъхэм я Ассамблее» ишъолъыр къутамэ, республикэ общественнэ движениеу «Адыгэ Хасэр» ыкIи Мыекъопэ къэзэкъ отделыр. Iэнэ хъураер зэрищагъ тарихълэжьэу, шIэныгъэ-методическэ отделым иIофышIэу Александр Данильченкэм.ТхылъеджапIэм иIофышIэхэм тарихъ хъугъэ-шIэгъэ чыжьэм ехьылIэгъэ тхылъ къэгъэлъэгъон агъэхьазырыгъ. Адыгеим ыкIи Пшызэ Апэрэ дунэе заом иилъэсхэм лIыблэнагъэу цIыфхэм щызэрахьагъэр, Хэгъэгу зэошхом хэлэжьагъэхэм ыкIи хэушъхьафыкIыгъэ дзэ операцием хэтхэм язэкъотныгъэ-лIыблэнагъэ, яхэгъэгу шIулъэгъу зэрэлъагэр, уи Хэгъэгу, уи ЧIыгу Ным фэдэу зэрэлъапIэхэр къэгъэлъэгъоным щыкIэгъэтхъыгъ.Iофтхьабзэм хэлэжьагъэх фольклорнэ ансамблэу «Зернышкэм» иартист цIыкIухэр, творческэ объединениеу «Звонница» зыфиIоу Н. И. Уваровам ыцIэ зыхьырэр, орэдыIоу Ч. Даутэр.Iэнэ хъураем шIуфэс псэлъэ кIэкIхэр къыщашIыгъэх Адыгэ Республикэм лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Долэ Долэтбый, Адыгэ Хасэм ипащэу ЛIымыщэкъо Рэмэзан, Мыекъопэ къэзэкъ отделым иатаманэу С. Г. Захаровым ыкIи Адыгеим щыпсэурэ лъэпкъхэм я Унэ ипащэу Шъхьэлэхъо Аскэр. Хэгъэгур ухъумэгъэнымкIэ Адыгеим щыпсэурэ лъэпкъхэм азыфагу тарихъ зыкIыныгъэу илъыр зыфэдэр къэгущыIэгъэ ныбжьыкIэхэу Мыекъопэ къэзэкъ отделымкIэ Союзым хэтхэм къыраIотыкIыгъ.Iофтхьабзэр орэдыкIэу «Казак и горец» зыфиIоу блэкIыгъэ зэошхом хэтыгъэ Черкес шыудзэ полкым ыкIи Апэрэ дунэе заом хэлэжьагъэхэм афэгъэхьыгъэмкIэ аухыгъ. Орэдыр зыусыгъэр Мыекъопэ къэзэкъ отделым культурэмкIэ и Гупчэ ипащэу С. Марамзин.
Дзэукъожь Нуриет.