Ситхыгъэхэр лъэпкъым къыфэнэщтых

МэщбэшIэ Исхьакъ идунай ыхъожьыгъ. Къэбар гухэкIым тигъэнэшхъэигъ. Лъэпкъым ынапэу, итамыгъэу щытыгъэ тхэкIошхом ыкIи общественнэ IофышIэшхом фэгъэхьыгъэу редакцием къыфагъэхьыгъэр ыкIи непэ къыхэтыутырэр бэ. Тэ, лъэпкъ журналистхэмкIэ, Исхьакъ цIыф хэхыгъэу щытыгъ.

«Адыгэ макъэм» (а лъэхъаным «Социалистическэ Адыгеим») иредакцие ар илъэситфэ щылэжьагъ. ТхэкIошхом творческэ гъогоу къыкIугъэм изы Iахь лъэпкъ гъэзетым епхыгъэу зэрэщытыгъэр дгъэлъапIэщтыгъ. Непэ ащ щылажьэхэрэмкIэ ынаIэ къыттетыгъ, ар ренэу зэхатшIэщтыгъ. Сыдигъо ыдэжь тыкIуагъэми, къытфэчэфыгъ, ынэгу ихыгъэу къытпэгъокIыщтыгъ, тиупчIэжьэгъугъ. Гъэзетым мафэ къэс зэ­ре­джэрэр ымыгъэгъуащэу, ащ къыщы­хэутыгъэхэм къафигъэзэжьэу, ишIошIхэр, иеплъыкIэхэр къыриIотыкIэу, игу­пшысэхэмкIэ шъхьэихыгъэу къыддэгуащэщтыгъ. Ныдэлъфыбзэм иухъумакIоу зэрэщытыр къыушыхьатэу, къэIуакIэхэм тынаIэ атырытигъадзэщтыгъ, лъэпкъы­бзэм рылэжьэрэ журналистхэм адыгабзэм ишапхъэхэр агъэфедэзэ зэрэтхэхэрэм лъыплъэщтыгъ. Сыд фэдэрэ упчIэ тиIэми, Исхьакъ телефонкIэ тыфытеощтыгъ, IэпыIэгъу къытфэхъуным фэхьазырыгъ.2025-рэ илъэсым МэщбэшIэ Исхьакъ ыныбжь илъэс 95-рэ зэрэхъугъэр ­Адыгеим игъэкIотыгъэу щыхагъэунэ­фыкIыгъ. Тэри, редакцием иIофышIэхэмкIэ, «Адыгэ макъэм» нахьыжъ лъапIэр къед­гъэблэгъагъ, зэIукIэгъу гъэшIэгъон дэтшIыгъ. ИщыIэныгъэ, итворчествэ фэгъэхьыгъэу бэ къытфиIотагъэр. Редакциер зычIэт унэм ия 3-рэ къат къы­зэрэдэтщэягъэм тетэу, зычIэсыгъэ кабинетым Iапэ фишIыгъ, къышIэжьыгъ. Гъэзетым зыIукIыжьыгъэм щыублагъэу редакцием зэ нэмыIэми къычIэхьанэу зэрэмыхъугъэр, зэредгъэблэгъагъэмкIэ лъэшэу къызэрэтфэразэр ащыгъум къы­тиIуагъ. Сыхьат-сыхьатитIу горэм рекIо­кIынэу тызэнэгуещтыгъэ зэIукIэгъум иохътэ пIалъэ гъунапкъэмэ аблэкIыгъэу, Исхьакъ къыIуатэрэр тшIогъэшIэгъонэу, игукъэкIыжьхэр тшIолъапIэу тыкIэрысыгъ, ежьыри къытхэгупсэфы­хьагъэу чIэкIыжьыным дэгуIэщтыгъэп, пчыхьэ нэс тигъусагъ. Iоф зиIэ журналистхэр чIэкIыхэу, къызагъэзэжьыкIэ, зэIукIэгъум къычIэхьажьыщтыгъэх. Итхы­гъэхэм зэрадэлажьэрэм, республикэр зыпхырыкIыгъэ тарихъ хъугъэ-шIагъэу ежь ышъхьэкIэ зыхэлэжьагъэхэм, Урысыем итхакIохэм я Союз непэ ипшъэ­рылъхэр зыфэдэм къатегущыIэзэ Исхьакъ къызэфихьысыжьыгъагъ:— Художественнэ тхыгъэр — щыIэныгъэм игъундж, хэкум,­ ­къэралыгъом игумэкI, ащ щы­хъурэ-щышIэрэм тхэкIо шъыпкъэм ынаIэ тыригъэтын фае. ­Лъэпкъым ылъапсэ къызэтенэным, бзэр, шэн-хабзэхэр, тарихъыр ухъумэгъэнхэм тхакIом итворчествэ фэIорышIэ. Тарихъ романхэр стхы зэхъум а пшъэ­дэкIыжьыр зэхасшIэщтыгъ. ­Хъарзынэщхэм сазэрэдэла­жьэ­рэм имызакъоу, хъугъэ-шIагъэ­хэр зыщыхъугъэ чIыпIэхэм ся­кIуалIэ, тхыгъэр зыфэгъэхьыгъэ цIыфым къыкIугъэ гъогум сырэкIо, сегупшысэ а зэманым ыгу ихъыкIыщтыгъэр зэхасшIэмэ сшIоигъоу. ТхакIом зыщыщ лъэпкъым игутео ренэу зэхишIэн, итворчествэ ар къыхэщын фае, ситхыгъэхэр лъэп­къым къыфэнэщтых.Том 27-рэ хъурэ тхылъ зэкIэлъыкIоу адыгабзэкIи урысыбзэкIи къыдигъэкIыгъэхэр, иусэхэр, ироманхэр зыдэт тхылъи 100-м ехъу лъэпкъым ихъарзынэщ дышъэ кIэнэу хэхьагъэх. МэщбашIэм итхы­гъэ пчъагъэ бзэ зэфэшъхьафхэмкIэ зэра­дзэкIыгъ. АР-м и Гимн игущыIэу Исхьакъ ытхыгъэхэр иосыет фэдэу къытфыщинагъ:«ШIум факIу, лъыкIуат,Республикэу тиунэ дах.Егъэхъу, зыIат,Республикэу тигугъэ лъаг —Уилъэпкъи хъишъэр фэIуат…»Аужырэ илъэсыми Исхьакъ бэ зэшIуи­хыгъэр. РоманыкIэу «Лыу» зыфиIорэр къыдигъэкIыгъ, Урысыем итхакIохэм я Союз изэфэсэу Москва щыкIуагъэр зэрищагъ. Союзым зэхъокIыныгъэу щыкIохэрэм, тхакIохэм яорганизацие ыкIи ащ икъутамэхэу шъолъырхэм арытхэм языужьыжьын, языкъегъэIэтын дэлэжьэным фэхьазырыгъ. ЗэлъашIэрэ политикэу, дипломатэу Рамазан Абдулатиповым имэфэкI ихэгъэунэфыкIын фэ­гъэхьыгъэ зэIукIэгъоу гуманитар ушэтынхэмкIэ Адыгэ республикэ институтым щыкIуагъэм чанэу хэлэжьагъ. Респу­б­ликэм имэфэкI мафэу чъэпыогъум и 5-м хэдгъэунэфыкIыщтым гъэзетым пае зэдэгущыIэгъу дэтшIыным фэхьазырыгъ, упчIэхэр пэшIорыгъэшъэу фэдгъахьынхэу къежэщтыгъ…Иакъыл ыкIуачIэ, идунэезэхашIэ къып­фэмыубытынэу иныгъэ, игупшысэ хыорхэм къапхырыкIыгъэ тхыгъэхэр къытфэнэжьыгъэх. Опсауфэ къыдэкIырэ тхылъ пэпчъ тшIогъэшIэгъонэу тызэрэлъыплъэщтыгъэм, псынкIэу зэ­рэтыджыщтыгъэм фэмыдэу, ахэм къа­фэдгъэзэжьыщт итхыгъэ сатырхэм азыфагу тхакIом игупшысэу щызэ­блэкIыхэрэр къэтыубытыным тыкIэ­хъопсэу…Исхьакъ зэрэтимыIэжьыр къипIотыкIын умылъэкIынэу чIэнэгъэшху, егъа­шIэм къытшъхьащытыщтэу тшIошIы­щтыгъ. Тхьэм джэнэт лъапIэ къырет. «Адыгэ макъэм» иредакцие щылажьэхэрэрМэщ­бэшIэ Исхьакъ игупсэхэм, иIахьылхэм афэтхьаусыхэх, якъин адагощы.