Теннис цIыкIумкIэ зэнэкъокъоу «Шаг в будущее — СКФО» зыфиIорэм иящэнэрэ едзыгъо къалэу Ессентуки щыкIуагъ.
Мыщ зыныбжь илъэс 16-м емыхъугъэ кIалэхэр ыкIи пшъашъэхэр хэлэжьагъэх. Урысыем и Къыблэ исубъектиймэ ялIыкIохэр текIоныгъэм ыкIи хагъэунэфыкIырэ чIыпIэхэм афэбэнагъэх.Адыгеим ыцIэкIэ турнирым хэлэжьагъэх Мыекъуапэрэ Кощхьэблэ районымрэ яспорт еджапIэхэм защызыгъасэхэрэр. ХъулъфыгъэхэмкIэ команднэ зэнэкъокъухэм республикэм испортсменхэм яплIэнэрэ чIыпIэр къыщыдахыгъ. Апэрэ чIыпIищыр аубытыгъ Ставрополь краим, Къэбэртэе-Бэлъкъарым ыкIи Дагъыстан. Типшъашъэхэм нахь дэгъоу зыкъагъэлъэгъуагъ, тыжьын медальхэр къахьыгъэх.Унэе зэнэкъокъухэм Арсений Семеновым ятфэнэрэ чIыпIэр къащыдихыгъ, Дарья Кузнецовар ябгъонэрэ хъугъэ. СпортсменитIуми Кощхьэблэ районым ипсэупIэу Вольнэм зыщагъасэ.Турнирым ияплIэнэрэ едзыгъо тыгъэгъазэм ыкIэм зэхащэщт. Джырэ уахътэм тикомандэ яплIэнэрэ чIыпIэм щыт, ящэнэрэр зыIыгъ Дагъыстаным зы очко, Къэбэртэе-Бэлъкъарым очкоуитIу ныIэп ауж къызэринэрэр. Зэнэкъокъум пэрытныгъэр щиIыгъ Ставрополь краим икомандэ.