Тэхъутэмыкъое районым ихьыкум ащ щыпсэурэ Тыу Аскэр уголовнэ Iофэу къыфызэIуахыгъэм хэплъагъ. УФ-м и Уголовнэ кодекс ия 159.2-рэ статья ия 4-рэ Iахь къыщыдэлъытэгъэ бзэджэшIагъэр зэрихьагъэу ар агъэмысагъ.
ЗэрагъэунэфыгъэмкIэ, Тыу Аскэр уз гъэтIылъыгъэ иIэу къэзыгъэлъэгъорэ тхылъ нэпцIхэр ыгъэхьазырыхи, сэкъатныгъэ иIэу ыгъэпсыгъ, ащ къыпкъырыкIхэзэ, страхованиемкIэ пенсие фагъэуцугъ. Ащ тетэу сомэ миллионрэ мин 600-рэ бюджет ахъщэу гъэпцIагъэкIэ ыштагъ.ЩынэгъончъэнымкIэ федеральнэ къулыкъум и ГъэIорышIапIэу АР-м щыIэм къыгъэхьазырыгъэ материалхэм къапкъырыкIызэ хэгъэгу кIоцI IофхэмкIэ Министерствэм уголовнэ Iоф къызэIуихыгъ.Тэхъутэмыкъое район хьыкумым Тыу Аскэр мысэу ылъытагъ ыкIи условнэ шIыкIэм тетэу илъэси 3, ушэтыпIэ пIалъэу илъэси 2 пшъэдэкIыжь тырилъхьагъ.