Къэралыгъо автоинспекциер
ЕджапIэмэ яавтобусхэр илъэсыкIэ еджэгъум зэрэфэхьазырхэр Тэхъутэмыкъое районым щауплъэкIугъ.
Iофтхьабзэм хэлэжьагъэх Къэралыгъо автоинспекциер, район прокуратурэр, гъэсэныгъэмкIэ ГъэIорышIапIэр. Ахэм автобусмэ ятехническэ зытет ыкIи ящынэгъончъагъэ шапхъэхэм зэрадиштэхэрэм уасэ фашIыгъ. Автобусыр къызэрагъэуцурэ системэр, рулыр, остыгъэмэ яблэн, щынэгъончъэ бгырыпхыхэр тэрэзэу зэтегъэпсыхьагъэхэмэ ауплъэкIугъ, тахографхэр ыкIи системэу ГЛОНАСС зыфаIохэрэр ахэтхэмэ, джащ фэдэу мэшIогъэкIосэ пкъыгъохэр, медицинэ аптечкэхэр, гъогум щыкъутагъэмэ, ар къэзыгъэлъэгъорэ тамыгъэхэр яIэхэмэ зэрагъэшIагъ.Зэфэхьысыжьхэм къызэрагъэлъэгъуагъэмкIэ, кIэлэеджакIохэр еджапIэмэ языщэлIэрэ автобусхэр зэкIэ илъэсыкIэ еджэгъум фэхьазырых, водительхэм щынэгъончъэу кIэлэцIыкIухэр къыращэкIынхэм фытегъэпсыхьэгъэ егъэджэн тедзэхэр арагъэкIугъэх.