А. Гусев
Республикэм икъэлэ шъхьаIэ изэтегъэпсыхьан лъагъэкIуатэ. Джырэ уахътэм IофшIэнхэм яжъотыпI, Мыекъуапэ дэсхэм ямызакъоу, ащ хьакIэу къакIохэрэми гуIэтыпIэ афэхъуным пстэури тегъэпсыхьэгъэщт.
Метрэ 40 зилъэгэгъэ кIэсэнитIоу Урысые Федерациемрэ Адыгэ Республикэмрэ я Къэралыгъо быракъхэр зыпылъыгъэщтхэм ягъэуцун Мыекъуапэ икъэлэ парк идэхьэгъу дэжь щыфежьагъэх. Къэзыуцухьэхэрэ псэолъэ пстэуми ахэр къашъхьарыщыщтых, къалэм ичIыпIэ зэфэшъхьафхэм уакъырыплъэу укъаплъэми плъэгъущтых. Быракъхэм яшъомбгъуагъэ метри 7,5-рэ, якIыхьагъэ метрэ 11,25-рэ зэрэхъущтыр. Чэщырэ дэгъоу алъэгъунхэм пае остыгъэ нэбзыйхэр ахэм атырарагъэдзэщтых.
«Быракъхэр Урысыем щыпсэурэ лъэпкъхэм языкIыныгъэ, ячIыгу гупсэ шIулъэгъоу фыряIэм, зэдыти Хэгъэгу тызэрэрыгушхорэм ятамыгъэу щытых. Ащ фэдэ быракъхэр цIыф кIуапIэхэм, зекIохэр зыщызэхащэрэ чIыпIэхэм ащыгъэIэгъэнхэм мэхьанэшхо иI. КIэсэнхэр зыгъэпсэфыпIэу агъэкIэжьыгъэм изы лъэгъупхъэ пкъыгъо зэрэхъущтхэм тицыхьэ телъ», — къащитхыгъ республикэм и ЛIышъхьэу КъумпIыл Мурат социальнэ хъытыухэм.
Мыекъуапэ икъэлэ парк ибассейнэ изэтегъэпсыхьан лъэкIуатэ.— Илъэсэу икIыгъэм инфраструктурэхэм атегъэпсыхьэгъэ бюджет чIыфэхэм ащыщ сомэ миллион 450-м ишIуагъэкIэ мыщ фэдэ IофшIэнхэр дгъэцэкIагъэх: жъы хъугъэ конструкциехэр Iутхыжьыгъэх, къушъхьэ чапэхэр дгъэпытагъэх, пкъэу хэтIагъэхэр дгъэуцугъэх, — къыIуагъ республикэм и ЛIышъхьэ.IофшIэнхэм яятIонэрэ чэзыу макIо: псэолъэшIхэм паркымрэ бассейнымрэ азыфагу чапэр щагъэпы-тэ, псыхъоу Шъхьэгуащэ телъ лъэсрыкIо лъэмыджым пае пкъэу хэтIагъэхэр агъэуцух. А пстэуми адакIоу къэлэ паркым игупчэ къыщегъэжьагъэу бассейным нэс псыутхэм ылъапсэ агъэхьазыры.
— Къалэми республикэми ащыпсэухэрэр мы бассейным зэрежэхэрэр тэшIэ. Илъэсыбэрэ къэлэдэсхэмрэ хьакIэу къакIохэрэмрэ гъэмафэрэ зыщагъэпсэфыныр якIасэу щытыгъ. Амалэу тиIэр зэкIэ дгъэфедэщт проектыр нахь псынкIэу гъэцэкIагъэ хъуным пае. Зы шъолъыр зыкI хъущт гъэпсэфыпIэм ягуапэу унагъохэм зыщагъэпсэфын алъэкIыщт. Къэлэ паркыр, бассейныр, псыIушъор ыкIи шъолъырэу Мэздахэр зэпхыгъэу хъущтых. ТапэкIи зэрэщытыгъэм фэдэу ыпкIэ хэмылъэу агъэкIэжьыгъэ чIыпIэм цIыфхэм зыщагъэпсэфын алъэкIыщт, — къыIуагъ Адыгеим и ЛIышъхьэ.