Адыгэ Республикэм щыпсэухэу лъытэныгъэ зыфэтшIыхэрэр!ТичIыпIэгъу лъапIэхэр!
Урысые Федерацием ис лъэпкъхэм абзэхэм я Мафэ апэрэу непэ тихэгъэгу щыхэтэгъэунэфыкIы!Iоныгъом и 8-р къызэрэхахыгъэр аукъодыеу щытэп. Советскэ усэкIо цIэрыIоу Расул Гамзатовыр къызыхъугъэ мафэм ар зэрэтырагъэфагъэм итворчествэ зэрагъэлъапIэрэр къеушыхьаты. УсэкIошхом итхылъхэу аварыбзэкIи, урысыбзэкIи къыдэкIыгъэхэм лъэпкъ зэфэшъхьафхэм якультурэхэр зэрэзэрэгъэбаижьырэр къахэщы.Урысые Федерацием и Президентэу Владимир Путиным мыщ фэдэ мафэр хагъэунэфыкIынэу зэригъэнэфагъэм къегъэлъагъо лъэпкъ пэпчъ икультурэ кIэн икъызэтегъэнэжьынрэ изегъэужьыжьыгъэнрэ япхыгъэ Iофыгъохэм хэгъэгум ипащэ лъэшэу ынаIэ зэратыригъэтырэр, диалект пэпчъ осэшхо зиIэ мылъкоу зэрэщытыр.Культурэхэмрэ шэн-хабзэхэмрэ лъэшэу зыщагъэлъэпIэрэ шъолъырхэм Адыгеир ащыщ. ХьакIэхэм дахэу защыпэгъокIхэрэ тичIыгу лъэпкъишъэм ехъумэ къахэкIыгъэхэр лIэшIэгъубэ хъугъэу зэгурыIохэу щызэдэпсэух. Республикэм икъэралыгъуабзэхэр — урысыбзэмрэ адыгабзэмрэ тихэгъэгу икультурэ кIэнышхо изы Iахьэу щытых.Бзэр лъэпкъым ыпсэу, лIэшIэгъубэмэ къакIоцI тарихъ гъогоу ащ къыкIугъэр, игушъхьэбаиныгъэ, идунэегурыIуакIэ къытлъызыгъэIэсырэ, цIыфхэр зэгурызыгъэIорэ амал. А баиныгъэр къыткIэхъухьащтхэм къафэтыухъумэныр зэдытипшъэрылъ.Бзэхэр ухъумэгъэнхэ, ахэм зягъэужьыжьыгъэн зэрэфаер мы мэфэкIым тыгу къегъэкIыжьы. Ныдэлъфыбзэр кIэлэцIыкIухэм аIутлъхьаным ар къыфэджэ.Филологхэм, ныдэлъфыбзэр языгъэшIэрэ кIэлэегъаджэхэм, тхакIохэм, культурэм иIофышIэхэм, республикэм щыпсэухэу ныдэлъфыбзэр къэзыухъумэхэрэм, ар кIэлэцIыкIухэм алъызыгъэIэсыхэрэм, лъэпкъхэм азыфагу илъ литературэм хэхъоныгъэ езыгъэшIыхэрэм лъэшэу тызэрафэразэр мы мафэм къэтэIо. Мафэ къэс зэшIошъухырэ IофхэмкIэ лъэпкъ зэгурыIоныгъэр шъогъэпытэ, тихэгъэгушхо нахь лъэш хъуным шъуфэлажьэ.Урысыешхом щагъэфедэрэ бзэхэр тапэкIи щэрэIэх, зыр адрэм ерэгъэбаижь, зы унэгъо пытэу тызэкъуарэгъэуцу!ТичIыпIэгъу лъапIэхэр, псауныгъэ пытэ, щыIэкIэ-псэукIэ дэгъу шъуиIэнэу, бзэхэм язэгъэшIэнкIэ ыкIи якъэухъумэнкIэ гъэхъэгъакIэхэр шъушIынэу тышъуфэлъаIо!Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл МуратАдыгэ Республикэм и Къэралыгъо Совет — Хасэм и Тхьаматэу Владимир Нарожнэр