Ныдэлъфыбзэр языгъашIэхэрэм язэнэкъокъу

Урысыем ис лъэпкъхэм абзэхэм я Мафэ ипэгъо­кIэу я V-рэ Урысые зэнэ­къокъоу «Ныдэлъфы­бзэмкIэ ыкIи литературэмкIэ анахь кIэлэ­егъэджэ дэгъу» зыфиIо­рэм иаужырэ уцугъо тыгъуасэ Липецкэ щыра­гъэжьагъ.

УФ-м просвещениемкIэ и Министерствэ зэнэкъокъум изэ­хэщакIу. Урысые Федерацием лъэпкъыбзэхэмкIэ и Федеральнэ институт ащ иоператорыр.Юбилейнэ Iофтхьабзэм Урысыем ишъолъыр 87-мэ къарыкIыгъэ нэбгыри 131-рэ зэрипхыгъэх. Ахэм ащыщэу 85-р кIэлэ­егъаджэх, 46-р кIэлэпIух.Шъолъыр уцугъом текIоныгъэ къыщыдэзыхыгъэхэ КIыкI Розэрэ Шэуджэн Фатимэрэ Адыгеим ыцIэкIэ зэнэкъокъум хэлажьэх. Адыгабзэм изэгъэшIэнкIэ шIыкIэ-амалэу къызфагъэфедэхэрэр зэрифэшъуашэу къагъэлъагъо.

КIыкI Розэ А. И. Хъуадэм ыцIэ зыхьырэ Хьэлъэкъое гурыт еджапIэу N 4-м адыгабзэмкIэ ыкIи литературэмкIэ икIэлэ­егъадж. Илъэс 28-рэ хъугъэу кIэлэцIыкIухэм яныдэлъфыбзэ арегъашIэ, шIу арегъэлъэгъу. ИIофшIэнкIэ анахьэу тарихъыр, адыгэ шэн-хабзэхэр, тхыдэжъхэр къызфегъэфедэх. Ащ ишIуа­гъэкIэ къыткIэхъухьэрэ лIэужхэр ижъырэ лъэхъаным нахь пэблагъэ ешIых ыкIи яхэгъэгу ибаи­ныгъэ алъегъэIэсы. ИкIэлэеджа­кIохэм ягъэхъагъэхэм ар арэгушхо, ахэр адыгабзэм фэгъэ­хьыгъэ зэнэкъокъухэм, олимпиа­дэхэм ренэу ахэлажьэх, текIоныгъэхэр къыдахых.Шэуджэн Фатимэ Пэнэжьыкъое кIэлэцIыкIу IыгъыпIэу «Насыпым» икIэлэпIу. Сабыим ипIункIэ ыпэрапшIэу шIулъэгъум къыпкъырэкIы. АщкIэ зэлъашIэрэ кIэлэегъаджэу Иоганн Пес­талоцци «ШIу умылъэгъумэ, бгъэсэн уфитэп» зэриIуагъэр IэубытыпIэ ешIы. Сабый пэпчъ шъхьафэу дэзекIоныр, гукIэгъу хэлъэу ыгъэ­сэныр ыкIи пшъэ­дэ­кIыжь иIэным фищэныр ипшъэ­рылъ шъхьаIэу елъытэ. КIэлэцIыкIу IыгъыпIэм щыIэ зыхъукIэ, мафэ къэс роль пчъа­гъэмэ арэуцо: кIэлэцIыкIухэм яныбджэгъу, гъэсакIо, актер ыкIи режиссер.Ныдэлъфыбзэм изэгъэшIэнкIэ шъолъыр пчъагъэхэм къарыкIыгъэхэм шIэныгъэ дэгъухэр къагъэлъагъо. «Методическая мастерская» зыфиIорэмкIэ зэнэкъокъур аублагъ. Нэбгырэ пэпчъ иIофшIэнкIэ гухэлъэу, авторскэ IофшIагъэу иIэхэр ыкIи хэкIыпIэу къагъотыхэрэр къыраIотыкIыгъэх.ДЕЛЭКЪО Анет.