Лъэпкъыбзэ еджапIэу «Адыглэнд»
Лъэпкъыбзэ еджапIэу «Адыглэнд» зыфиIорэм зичэзыу яхэнэрэ IофшIэгъу лъэхъан тыгъуасэ ыублагъ. Iоныгъом и 12-м нэс Адыгеим ирайонхэм, икъалэхэм ыкIи Къэрэщэе-Щэрджэс Республикэм къарыкIыгъэ кIэлэеджэкIо 60-мэ адыгабзэр нахь игъэкIотыгъэу зэрагъэшIэщт.
Хабзэ зэрэхъугъэу, адыгабзэмкIэ муниципальнэ ыкIи республикэ олимпиадэхэм текIоныгъэр е хагъэунэфыкIырэ чIыпIэхэр къащыдэзыхыгъэхэр ары къырагъэблэгъагъэхэр. Мыгъэ нэбгырэ 50-р апэрэу къэкIуагъэх, нэбгыри 10-р блэкIыгъэ илъэсхэм щыIагъэхэу, адыгэ культурэм хэшIыкI фызиIэхэр ары, ахэр пщынэ еох, къэшъох, орэдхэр къаIо.
Адыгэ къэралыгъо университетым Адыгэ филологиемрэ культурэмрэкIэ ифакультет лъэпкъыбзэ еджапIэм икIэщакIу. Адыгабзэр нахь арагъэшIэныр, ащ имэхьанэ къэIэтыгъэныр, адыгэ культурэм игъэкIотыгъэу нэIуасэ фашIынхэр ары зэхэщакIохэм пшъэрылъ шъхьаIэу зыфагъэуцужьырэр.Тхьамафэм къыкIоцI бзэм фэгъэхьыгъэу бэ афызэхащэщтыр. КIэлэеджакIохэм апае культурэ-гъэсэныгъэ программэ гъэшIэгъон зэхагъэуцуагъ. Лекциехэр, мастер-классхэр, квестхэр ыкIи творческэ зэIукIэгъухэр яIэщтых. Адыгеим итарихъ, адыгэхэм язекIокIэ-шIыкIэхэм, тхыпхъэхэм нахь игъэкIотыгъэу нэIуасэ афэхъущтых. ЗэлъашIэрэ шIэныгъэлэжьхэм, искусствэм иIофышIэхэм, журналистхэм, нэмыкIхэми зэIукIэгъухэр адыряIэщтых. Лъэпкъ ыкIи спорт джэгукIэ зэфэшъхьафхэр афызэхащэщтых.КIэлэеджакIохэм адыгэ хабзэр зэрэзэрагъэшIэщтым дакIоу къэшъощтых, орэдхэр къаIощтых, адыгэ джэгур пчыхьэ къэс рагъэкIокIыщт.ДЕЛЭКЪО Анет.