Кушъхьэфэчъэ спортыр зыгу рихьыхэрэр Iоныгъом и 6-м Мыекъуапэ щызэрэугъоигъэх. Республикэм икъэлэ шъхьаIэ щыпсэухэрэр мыщ фэдэ Iофтхьабзэхэм ахэлэжьэнхэр шэнышIу афэхъугъ.
ЫпэкIэ Конституцием, физкультурникым ыкIи Къэралыгъо быракъым ямафэхэм япхыгъэу ахэр зэхащэщтыгъэхэмэ, мызыгъэгум Iофтхьабзэр мэфэкI мафэ горэм епхыгъэу щытыгъэп. Зыныбжь илъэс 16-м ехъугъэхэм заушэтын амал яIагъ, ащ пае пэшIорыгъэшъэу зябгъэтхын ищыкIэгъагъэп.Урамхэу Пионерскэмрэ Лермонтовым ыцIэ зыхьырэмрэ зыщызэхэкIыхэрэм дэжь нэбгырэ 250-рэ щызэрэугъоигъ. Ахэр кушъхьэфачъэхэм атесхэу Мыекъуапэ иурамхэм къарычъагъэх, спорт зэнэкъокъум дакIоу япсауныгъэ агъэпытагъ, километрэ 18 зэрылъ гъогууанэр къызэранэкIыгъ.
Мы Iофтхьабзэм изэхэщэн зигукъэкIыр Адыгэ Республикэм и ЛIышъхьэу КъумпIыл Мурат. Кушъхьэфэчъэ спортымкIэ шъолъыр еджапIэмрэ АР-м физическэ культурэмкIэ ыкIи спортымкIэ и Комитетрэ изэхэщакIох.Къызэдэчъагъэхэм ахэтыгъ Мыекъопэ къэлэ администрацием ипащэу Геннадий Митрофановыр.