ФутболымкIэ Адыгэ Республикэм и Къэралыгъо Совет — Хасэм ишIухьафтын зэрылъ Кубокымикъыдэхын фэгъэхьыгъэ зэнэкъокъур къызэIуахыгъ.
Апэрэ ешIэгъухэм ауж текIоныгъэм фэбэнэщт командий къэнэфагъ. Финалым и 1/8-м щызэIукIагъэх зэгъунэгъу Тэхъутэмыкъое ыкIи Теуцожь районхэм якомандэхэр. ЗэIукIэгъум иохътэ шъхьаIэ 3:3-у аухыгъ. Ащ къыхэкIыкIэ нахь лъэшыр пенальтикIэ къэнэфагъ, Теуцожь районым ифутболистхэм ар нахь дэгъоу агъэцэкIагъ, 4:2-у текIоныгъэр къыдахыгъ. Мыекъопэ «Ансарым» 6:1-у «Спартэм» къышIуихьыгъ. Ящэнэрэ ешIэгъум щызэIукIагъэх «Аргомрэ» «Факелымрэ». Мыхэми охътэ шъхьаIэр 2:2-у аухыгъ, пенальтикIэ 4:2-у «Аргом» текIоныгъэр къыхьыгъ. Адыгэкъалэ икомандэ Красногвардейскэ районыр къэзыгъэлъэгъорэ «Легионым» дешIагъ ыкIи апэрэ таймыр 9:0-у къыхьыгъ. Нэужыми Адыгэкъалэ ифутболистхэм яешIакIэ къырагъэIыхыгъэп, 12:2-у текIуагъэх.Зэнэкъокъум ифиналныкъо щызэIукIэщтых: «Теуцожь район» — «Ансар», «Урожай» — «Креатив», «Кавказ-Адэмый» — «Саусэрыкъо», «Арго» — «Адыгэкъал».ЕшIэгъухэр Iоныгъом и 12 — 13-м Мыекъуапэ истадионэу «Юностым» щыкIощтых.
