М. Гордышов
Унэе мылъкукIэ социальнэ мэхьанэ зиIэ псэолъэ заулэ зыщагъэпсырэ къуаджэу Афыпсыпэ Адыгеим и ЛIышъхьэу КъумпIыл Мурат щыIагъ.
Ахэм зыкIэ ащыщ нэбгыри 150-м телъытэгъэ кIэлэцIыкIу IыгъыпIэр. Шъэумэн Хьазрэт ыцIэ зыхьырэ шIушIэ фондым имылъкукIэ проектыр гъэцэкIагъэ мэхъу. Квадрат метрэ мини 4,4-рэ фэдиз зыубытырэ тIо зэтет псэуалъэм еджапIэм джыри мыкIорэ кIэлэцIыкIухэр щаIыгъыщтых. А чIыпIэм кIэлэцIыкIу джэгупIэхэр зычIэтыщт бгъагъи 8 щагъэпсыщт, Iэмэ-псымэхэр зычIэлъыщтхэ унэ, кIэлэцIыкIу IыгъыпIэр къэзгъэфэбэщтыр ыкIи нэмыкIхэр хэтыщтых.
Фондым икъэкIуапIэхэмкIэ джыри зы псэуалъэ ашIы: Шъэумэн Хьазрэт ыцIэ зыхьырэ сымэджэщым къыхэт IэзапIэу къатитIу хъурэм квадрат метрэ мин 1,4-рэ еубыты. Нэбгырэ 50-м медицинэ комплексыкIэр тегъэпсыхьагъ. Ащ ишIуагъэ къэкIощт врач кабинетхэр нахьыбэ шIыгъэнхэмкIэ, Афыпсыпэ имызакъоу, зэрэ Тэхъутэмыкъое районэу ащыпсэухэрэм апэрэ медицинэ IэпыIэгъур зэрагъэгъотыным иIофи нахь къыгъэпсынкIэщт.
ЗэрэрахъухьагъэмкIэ, 2027-рэ илъэсым мэлылъфэгъум псэуалъэр аухынэу щыт. Унэр къызызэIуахыкIэ, Iэзэн лъэныкъомкIэ зэфэшъхьафыбэ къызэлъиубытыщт. Джырэ уахътэм диштэрэ отделениеу цэхэм зыщяIэзэщтхэм бэ къыхиубытэщтыр: терапевт, хирургие, ортопед ыки кIэлэцIыкIу лъэныкъохэр.
Адыгеим и ЛIышъхьэу Шъэумэн Хьазрэт ыцIэ зыхьырэ фондым игъэIорышIапIэ и Тхьаматэу Шъэумэн Асиет псэупIэм имызакъоу районым ыкIи республикэм яхэхъоныгъэ чанэу зэрэхэлажьэрэм апае зэрэфэразэр къыIуагъ. Фондым ишIуагъэкIэ общественнэ мэхьанэ зиIэ Iофтхьэбзэ заулэ республикэм щызэшIуахы.
Ащ нэмыкIэу самбэмкIэ ыкIи дзюдомкIэ Гупчэу «Рэдэд» зыфиIорэм икъызэIухын Афыпсыпэ дэсхэр ежэх. Предпринимателэу Натхъо Пщымафэ имылъкукIэ ар ашIыгъ. Спорт псэуалъэр джырэ уахътэм диштэрэ Iэмэ-псымэхэмкIэ зэтегъэпсыхьагъ, зызэрэщагъэсэщтым имызакъоу, зэнэкъокъухэри щызэхащэнхэ алъэкIыщт, а зы уахътэм спортсмен куп заулэмэ зыщагъэсэшъущт. Ащ хэтых зызщафэпэщтыр, зызщагъэпскIыщтыр, административнэ ыкIи нэмыкI унэхэр.
Республикэм и ЛIышъхьэ спорт псэолъакIэр къыплъыхьагъ, ар язгъэшIырэм ыкIи спортым илIыкIохэм гущыIэгъу афэхъугъ. Натхъо Пщымафэ псэупIэм ихэхъоныгъэ ыкIи спортым зиушъомбгъуным иIахь зэрахишIыхьэрэм пае зэрэфэразэр КъумпIыл Мурат къыIуагъ. Спортым пыщагъэхэм ямызакъоу бэнэныр зисэнэхьат хъугъэхэми мыщ яIэпэIэсэныгъэ щыхагъэхъон алъэкIыщт.
АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.