КIэлэцIыкIу 900 фэдизмэ афашIыщт

Лъэпкъ проектэу «Унагъом» къыдыхэлъытагъэу кIэлэцIыкIухэр зэрыс унагъохэм социальнэ IэпыIэгъу зэфэшъхьафхэр республикэм ща­рагъэгъоты.

Ахэр цIыфышъхьэ пчъагъэм хэгъэхъогъэным, зигъот макIэ­хэм адеIэгъэным фэIорышIэх, ащ дакIоу илъэс 18 мыхъугъэ кIэлэцIыкIухэм япсауныгъэ къы­зэтегъэнэгъэным фытегъэпсы­хьэгъэ IэпыIэгъухэри Адыгеим щыгъэнэфагъэх. Непэ зигугъу къэтшIыщтыр ортопедическэ лъэкъопылъхьэ ятыгъэныр ары.Ащ фэдэ IэпыIэгъум къы­хырагъэубытэхэрэр гъот макIэ зиIэхэр, зыныбжь илъэс 18-м нэмысыгъэхэу ортопедическэ лъэкъопылъхьэ ищыкIагъэу вра­чым ылъытагъэхэр ары. Ар къа­ратыным пае врач-орто­педым къафитхыгъэ тхьапэр Адыгэ Республикэм икъэралыгъо учреждениеу «IофшIэнымкIэ ыкIи цIыфхэр социальнэу ухъу­мэгъэнхэмкIэ Гупчэм» рахьы­лIэн, нэужым ащ тхылъ гъэнэфагъэ къыIахын фае. Мы Iэпы­Iэгъум ишIуагъэкIэ кIэлэцIыкIу­хэм япсауныгъэ къызэтенэ ыкIи сэкъатныгъэ яIэ хъуным щеу­хъумэх.

— Лъэпкъ проектэу «Уна­гъом» къыдыхэлъытэгъэ Iэ­пыIэгъу тедзэхэу шъолъы­рым щыдгъэнэфагъэхэм кIэ­лэцIыкIухэр зэрыс уна­гъохэм тишIуагъэ ядгъэкIыным, джащ фэдэу къэхъу­хэрэм япчъагъэ хэгъэхъогъэ­ным фытегъэпсыхьагъэх. Анахьэу тынаIэ зытедгъэтыхэрэм ащыщ очнэу еджэ­рэ бзылъфыгъэ ныбжьыкIэ­хэу сабый ежэхэрэр, са­быи­бэ зэрыс унагъохэу ипотекэ зыштагъэхэр, нэмыкI­хэри. КъыкIэзгъэтхъымэ ­сшIоигъу, цIыфышъхьэ пчъа­гъэм хэгъэхъогъэным, унагъом, ныгъом, тыгъом, кIэлэцIыкIугъом IэпыIэгъу афэхъугъэным яIофыгъохэр апэ итэгъэшъых, — хигъэу­нэфыкIыгъ АР-м и ЛIы­шъхьэу КъумпIыл Мурат.АР-м IофшIэнымрэ социальнэ хэхъоныгъэмрэкIэ и Министерст­вэ къызэритыгъэмкIэ, 2026-рэ илъэсым зытефэхэрэм ортопедическэ лъэкъопылъхьэ ятыгъэ­нымкIэ пэIуагъэхьанэу респуб­ликэм ибюджет сомэ миллион 12 фэдиз къыхагъэкIыгъ. Ащ ишIуагъэкIэ кIэлэцIыкIу 900 фэ­дизмэ ар афащэфын ямурад. ИкIыгъэ илъэсым мы программэм игъэцэкIэн сомэ миллион 17-м ехъу пэIуагъэхьагъ, кIэлэцIыкIу 1300-мэ ортопедическэ лъэкъопылъхьэ аратыгъ. Мыгъэ а пчъагъэр нахь макI, ау хэбзэ­къулыкъушIэхэм къызэраIуагъэм­кIэ, агъэнэфэгъэ нэбгырэ пчъа­гъэм нахьыбэмэ закъыфагъазэ­мэ, мылъкум джыри хагъэхъощт.

Тызыхэт илъэсым мы фэIо-фашIэм епхыгъэ къэралыгъо зэзэгъыныгъэр зыгъэцэкIэщтыр Iахьзэхэлъ обществэу «Московскэ протезнэ-ортопедическэ предприятием» и Мыекъопэ къутам. Ащ ипащэу Цэй Камал «Адыгэ макъэр» гущыIэгъу фэхъугъ, социальнэ фэIо-фашIэр зэрагъэцакIэрэр нэрылъэгъу тфэхъугъ.— Илъэс зэкIэлъыкIохэм мы фэIо-фашIэмкIэ къэралыгъо зэзэгъыныгъэр зэри­фэшъуашэу тэгъэцакIэ. Къыхэзгъэщымэ сшIоигъу ортопедическэ лъэкъопылъхьэр зэкIэ шъолъырхэм зэрэщарамытырэр. Ау Адыгеим кIэлэцIыкIухэм япсауныгъэ изытет типащэхэм лъэшэу анаIэ тырагъэты, ащ ишы­хьат программэм игъэцэкIэн пэIухьащт мылъкур респуб­ликэ бюджетым къызэри­тIупщырэр. ИкIыгъэ илъэсыр пштэмэ, сомэ миллион 11-рэ мини 100-м ехъурэ къыт­IэкIэхьагъ, лъэкъопылъхьэ зэштэгъу 1692-рэ афэт­шIыгъ, 2026-м сомэ миллион 12-м кIахьэу къытфатIупщыгъ, мы уахътэм ехъулIэу зэштэгъу 254-рэ яттыгъ. Лъэкъопылъхьэу предприятием щытшIыхэ­рэр шэп­хъэшIухэм адештэх, шъом хэшIыкIыгъэх. Амалэу щы­Iэм елъытыгъэу тиIоф­шIа­кIэ тэгъэпсы, дэо тхы­лъым къыдатхэхэрэм защысэгъэгъуазэ, гумэкIыгъо­хэр зэ­рэ­дэдгъэзыжьыщтхэм тынаIэ тет, ау гущыIэ дахэу къытпагъохырэр на­хьыбэшъ, ар тигуапэ, — ­къыIуагъ Цэй Камал.Ортопедическэ лъэкъопылъхьэу ашIырэр тIоу зэтефыгъ: ишIынкIэ нахь хьылъэу пкъыгъуа­бэу зэхэтыр ыкIи ишIынкIэ нахь Iэрыфэгъоу зы пкъыгъо зыхэтыр. Ащ фэдэ лъэкъопылъхьэ зищыкIагъэу алъытэгъэ нэбгырэ пэпчъ цокъэ къэштэгъуитIу зырыз фашIы: кIымэфэ ыкIи гъэ­мэфэ лэхъанхэм ателъытагъэу.Предприятием ишъолъыр къутамэ къыщашIырэ лъэкъопылъхьэм изытет ауплъэкIу, лъэплъэх. Нэбгырэ пэпчъ ­ылъэгу иуз елъытыгъэу цуакъэр фашIы. Тхьамэфэ заулэм къыкIоцI ащ игъэхьазырын пылъых.— Республикэм щыпсэурэ кIэлэцIыкIухэм ортопедическэ лъэкъопылъхьэ ягъэгъотыгъэным мэхьанэшхо иI. Сабыир джыри цIыкIузэ иуз къыхэбгъэщымэ, ар нахь гъэхъужьыгъошIу ыкIи сэкъатныгъэ иIэ хъуным ищынагъо щыгъэзыягъэ мэхъу. КъыткIэхъухьэхэрэм псауныгъэ пытэ яIэныр къэралыгъом ыкIуачIэ ылъапс, ар типащэхэм къыдалъытэзэ, программэр пхыращы, — хигъэунэфыкIыгъ Цэй Камал.Мыщ фэдэ IэпыIэгъу зэратыгъэ цIыфхэм ащыщхэм гущыIэгъу тафэхъугъ.Килабериа Тенгизрэ ишъхьэгъусэрэ кIэлэцIыкIуищ зэдапIу, ахэм зэкIэми ащ фэдэ лъэ­къопылъхьэ къараты.— Пшъэшъэ анахьыжъым илъэ­си 5, ащ къыкIэлъыкIорэ тIолъфэныкъохэм илъэси­тIурэ ныкъорэ аныбжь. Ор­топедым зэрилъыта­гъэмкIэ, ахэм хэушъхьафыкIыгъэ лъэкъопылъхьэ ящыкIагъ. Ащ епхыгъэу илъэс заулэ хъугъэу ыпкIэ хэмы­лъэу а фэIо-фашIэр къытфагъэцакIэ. МазэкIэ узэкIэ­Iэбэжьымэ, нахьыкIэхэм цуакъэхэр къафашIыгъ. Ха­бзэми, ортопедическэ гупчэм Iоф щызышIэхэрэми лъэшэу тафэраз, унагъомкIэ ар зэхапшIэу IэпыIэгъу­шIу, — еIо Тенгиз.Алэкъэе Нэфсэт икIэлитIу алъэгу «плосковальгуснэ» зэ­хъокIыныгъэ яIэу врачым къыхигъэщыгъ. Ар зыпкъ игъэуцожьыгъэным пае ортопедическэ лъэкъопылъхьэ илъэс заулэ хъугъэу къараты.— СикIэлэ нахьыжъ илъэ­си 8, адрэм – 4 аныбжь. Яуз инэшанэ елъытыгъэу алъэгу тырашIыкIызэ, ящыкIэгъэ лъэкъопылъхьэ къэштэ­гъуитIу зырыз ыпкIэ хэмылъэу къараты. Лъэшэу сигуапэ ащ фэдэу къэралыгъом ынаIэ кIэлэцIыкIухэм зэратыригъэтырэр, уна­гъомкIи ащ фэдэ IэпыIэгъум мэхьанэ иI, — хигъэунэфыкIыгъ Нэфсэт.IЭШЪЫНЭ Сусан.