Шыу Хасэм ихъарзынэщ
Адыгэ шы лъэпкъхэм яушэтынышхоу «Адыгэ зекIо-Фыщт 2026-рэ» зыфиIорэр республикэм щыкIуагъ.
АР-м иобщественнэ движениеу «Шыу Хасэр» Iофтхьабзэм кIэщакIо фэхъугъ. Проектыр пхырыщыгъэнымкIэ зишIуагъэ къэкIуагъэр президент грантхэмкIэ Фондымрэ Адыгэ Республикэм игрантхэмрэ.Шэу хэлэжьагъэхэр кIочIэшхо, пытагъэ зыхэлъхэр, къушъхьэхэм къащакIухьаным фытегъэпсыхьагъэхэр ары. Шы спортым ныбжьыкIэхэр нахьыбэу хэщэгъэнхэм, ахэм ягушъхьэлэжь баиныгъэ нахь зыкъыIэтыным Iофтхьабзэр фэIорышIагъ.Зэнэкъокъум къыращэлIагъэх Адыгеим, Къэбэртэе-Бэлъкъарым, Къэрэщэе-Щэрджэсым ыкIи Пшызэ шъолъырым яшы лъэпкъ анахьышIухэр.Шыу Хасэм итхьаматэу Тхьапшъэкъо Альберт зекIом икъэбар къедгъэIотагъ.— Грант проектышхоу «Очаг дружбы» зыфиIорэр шыу Хасэм егъэцакIэ. «Адыгэ зекIо-Фыщт 2026-рэ» зыфиIорэр апэрэ Iофтхьабзэу ащ къыдыхэлъытагъ. Ухьазырыныгъэ дэгъу зиIэ шыухэмрэ шыхэмрэ километрэ 60 хъурэ къушъхьэлъэ гъогур зэпачыгъ. Хаджыкъо чIыпIэм щыублагъэу Фыщт нэсэу купым ыкIугъ. Ткъош республикэхэм азыфагу илъ зыкIыныгъэр гъэпытэгъэным Iофтхьабзэр фэIорышIэ. Шыу зекIо зэнэкъокъум хэлэжьэн фитыгъэхэр къэбэртэе шы лъэпкъхэу илъэси 5 ыкIи ащ нахьыбэ зыныбжьхэр ары. Iоныгъо мазэм «Фестиваль кабардинской породы» зыфиIорэр къуаджэу Тэхъутэмыкъуае щызэхэтщэщт. Ащ ыуж «Лъэпкъхэм языкIыныгъэ и Фестиваль» ящэнэрэу къыкIэлъыкIощт. Къэбэртэешым къэбарэу пылъым фэгъэхьыгъэ лекциехэр къуаджэхэм ятхылъеджапIэхэм ащызэхэтщэщт, — къыхигъэщыгъ Тхьапшъэкъо Альберт.Мы Iофтхьабзэм хэлажьэх Цуамыкъо Рэмэзан, Къэзанэкъо Дамир, Цуякъо Рустам, Курбаналые Шъалихь, Дыгужъ Рустам.Шы лъэпкъышIухэр зыгъэIорышIэрэ шыухэр гъогууанэм щызэнэкъокъугъэх. ИжъыкIэ зэрэщытыгъэм фэдэу адыгэ шъуашэр ащыгъэу, гъогу гъомыли, шыхэм яIуси зыдаIыгъэу ушэтынышхор акIугъ.Апэрэ чIыпIэр къыдихыгъ КъЩР-м къикIыгъэ Дыгужъ Рустам ыгъэIорышIэгъэ шэу Атлантым. ЯтIонэрэ хъугъэх Адыгеим щыщ Цуамыкъо Рэмэзанрэ ишэу Гирейрэ. Ящэнэрэу къэсыжьыгъэх шыу ныбжьыкIэу Къэзанэкъо Дамиррэ ишэу Каратрэ.Лъэпшъыкъо Фатим.