М. Гордышов
Адыгеим и ЛIышъхьэу КъумпIыл Мурат Джэджэ районым щызэтырагъэпсыхьэрэ еджапIэм щыIагъ. Ащ игъусагъэх АР-м иминистрэхэм я Кабинет и Тхьаматэ игуадзэу, Адыгеим финансхэмкIэ иминистрэу Виктор Орловыр, гъэсэныгъэмрэ шIэныгъэмрэкIэ министрэу Евгений Лебедевыр, Джэджэ районым ипащэу Сергей Кондратенкэр.
Лъэпкъ проектэу «НыбжьыкIэхэмрэ кIэлэцIыкIухэмрэ» зыфиIорэм тетэу псэупIэу Джаджэм дэт еджапIэу N 3-м иигъэкIотыгъэ гъэцэкIэжьын макIо. Проектым къызэрэдилъытэрэмкIэ, псэолъэшIхэм унашъхьэр, инженер коммуникациехэр, пчъэхэр ыкIи шъхьаныгъупчъэхэр зэблахъущтых, ыкIоцI ыкIи щагур зэтырагъэпсыхьащтых. Зэзэгъыныгъэм сомэ миллиони 120-рэ фэдиз пэIухьащт, 2027-рэ илъэсым шышъхьэIум IофшIэнхэр зэкIэ аухын мурад яI.АР-м гъэсэныгъэмрэ шIэныгъэмрэкIэ иминистрэу Евгений Лебедевым къызэриIуагъэмкIэ, гурыт еджапIэу N 3-м чIэсхэм илъэсыкIэ еджэгъоу аублагъэр станицэм дэт нэмыкI еджапIэхэм ащыкIощт, ащ тегъэпсыхьэгъэ транспорткIэ аращэлIэщтых.
Республикэм и ЛIышъхьэ IофшIэнхэр зэрэкIохэрэм зыщигъэгъозагъ, подряднэ организацием ипащэ дэгущыIагъ. КъумпIыл Мурат муниципалитетым иадминистрацие пшъэрылъ фишIыгъ амалэу щыIэхэм ателъытагъэу IофшIэнхэр заухыхэкIэ, еджапIэм къыпэIулъ чIыпIэр зэтегъэпсыхьэгъэным, нэфрыгъуазэхэр гъэуцугъэнхэм, чъыгхэр ыкIи къэгъагъэхэр гъэтIысхьэгъэнхэм япхыгъэ Iофхэр агъэцэкIэнхэу.Зэхэубытагъэу къэпIон хъумэ, 2021-рэ илъэсым къыщегъэжьагъэу Джэджэ районым гъэсэныгъэм ылъэныкъокIэ мыхэр щызэшIуахыгъэх: псэупIэу Джаджэм кIэлэцIыкIу 240-рэ зычIэфэщт IыгъыпIэхэр, Келермесскэм — нэбгыри 120-м телъытэгъэ IыгъыпIэхэр ащагъэпсыгъэх, къутырэу Прогрессым дэт гурыт еджапIэу N 5-м игъэкIотыгъэ гъэцэкIэжьынхэр рашIылIагъэх, псэупIэу Гончаркэм дэт гурыт еджапIэу N 6-ми ащ фэдэ гъэцэкIэжьынхэр щызэшIуахыгъэх, къоджэ еджэпIи 6-мэ яспортивнэ залхэр агъэкIэжьыгъэх.
Адыгеим и ЛIышъхьэ Джэджэ районым ипащэу Сергей Кондратенкэм гущыIэгъу зыфэхъум, муниципалитетым хэхъоныгъэу ышIыщтымкIэ къапыщылъ пшъэрылъхэм къащыуцугъэх. Общественнэ чIыпIэхэр зэтегъэпсыхьэгъэнхэм, инфраструктурнэ проектхэр гъэцэкIэгъэнхэм, псауныгъэм икъэухъумэн, культурэм, спортым япхыгъэ псэуалъэхэм яшIын ыкIи яигъэкIотыгъэ гъэцэкIэжьын къыдыхэлъытагъэу зэшIохыгъэн фаехэм атегущыIагъэх.Мы илъэсым лъэпкъ проектхэм атетэу Джэджэ районым Iофтхьэбзабэ щызэшIуахыгъ: псэупIэу Джаджэм дэт паркэу «Центральнэр» агъэцэкIэжьыгъ, ащ сомэ миллиони 5 пэIухьагъ, псэупIэу Новэм игупчэ парк зэтырагъэпсыхьагъ, ащ епхыгъэ Iофтхьабзэу зэшIуахыгъэхэм сомэ миллиони 3,9-рэ фэдиз апэIухьагъ, Джэджэ районым икIэлэцIыкIу тхылъеджапIэ модельнэ шIыкIэм тетэу агъэкIэжьыгъ, ащ сомэ миллиони 8,4-рэ пэIуагъэхьагъ, Джэджэ краеведческэ музеим техникэмкIэ изэтегъэпсыхьан сомэ миллионрэ мин 500-рэ къыфыхагъэкIыгъ.Ахэм анэмыкIэу «инициативное бюджетирование» зыфиIорэм къыдыхэлъытагъэу псэолъэ зэфэшъхьафхэу республикэ, чIыпIэ ыкIи бюджетхэм къахимыубытэрэ лъэныкъохэм къахэкIыщт мылъкумкIэ зэтырагъэпсыхьащтхэри агъэнэфагъэх. Ахэм ахэхьэх псэупIэу Келермесскэм щашIыщт спорт тренажернэ гупчэр, псэупIэу Новэм и Гупчэ парк дэт спорт гупчэр, къутырэу Прогрессым къыдэтэджэщт кIэлэцIыкIу джэгупIэр, къутырэу Тамбовскэм иурамэу Прямоим, псэупIэу Дондуковскэм дэт паркэу Чкаловым ыцIэкIэ щытым игупчэ дэхьапIэ язэтегъэпсыхьан ыкIи нэмыкIхэр.Федеральнэ проектэу «Iэрыфэгъу къэлэ щыIакIэр» зыфиIорэмрэ къэралыгъо программэу «Къуаджэхэм хэхъоныгъэ ягъэшIыгъэныр» зыфиIорэмрэ къадыхэлъытагъэу 2026-рэ илъэсым мы къыкIэлъыкIорэ Iофтхьабзэхэр зэшIуахыщтых: псэупIэу Джаджэм дэт спорт гупчэм игъэкIотыгъэ гъэцэкIэжьынхэр рашIылIэщтых, псэупIэу Дондуковскэм екIолIэрэ автомобиль гъогур зэтырагъэпсыхьащт, псэупIэу Джаджэм иурамэу Рабочэм псырыкIуапIэ щагъэпсыщт, Дондуковскэм дэт паркэу Чкаловым ыцIэкIэ щытым волейбол ешIапIэ щашIыщт.Псауныгъэм икъэухъумэнкIэ 2026 — 2030-рэ илъэсхэм ателъытэгъэ программэм тегъэпсыхьагъэу район IэзапIэм игъэкIотыгъэ гъэцэкIэжьынхэр рашIылIэщтых, УЗИ-мкIэ ящыкIэгъэщт Iэмэ-псымэр ащэфыщт, псэупIэу Келермесскэм амбулаторие, къутырэу Прогрессым фельдшер-мамыку IэзапIэ ащашIыщт, селоу Нижний Айрюм джащ фэдэу фельдшер-мамыку IэзапIэ къыдэтэджэщт. Къутырэу Тамбовскэмрэ псэупIэу Дондуковскэмрэ адэт IэзапIэхэми игъэкIотыгъэ гъэцэкIэжьынхэр арашIылIэщтых.ЗекIоным ылъэныкъокIэ а чIыпIэм анаIэ нахь къытырадзэным епхыгъэу Iофтхьэбзэ гъэнэфагъэхэм къащыуцугъэх. ПсэупIэу Гончаркэм П. В. Букреевым ыцIэкIэ щыт дендропаркыр щагъэцэкIэжьы. Республикэ бюджетым къыхагъэкIынышъ, сомэ миллион 95-рэ ащ пэIуагъэхьащт.ТапэкIэ административнэ унэу мыщ дэтым игъэкIотыгъэ гъэцэкIэжьынхэр рашIылIэгъагъэх, электричествэм ирыкIуапIэхэр ашIыгъэу, мы лъэхъэнэ благъэхэм паркыр зэтырагъэпсыхьан мурад яI. ЛъэсрыкIо гъогухэри ашIыщтых, тIысыпIэхэр агъэуцущтых. ТапэкIэ зэшIуахынэу рахъухьагъэхэм ащыщых гъэмэфэ эстрадэр, урамым тетыщт кинотеатрэр, хьакIэхэм апае агъэпсыщт унэ цIыкIуи 6-р.ЗэдэгущыIэгъум икIэуххэр къызэфихьысыжьхэзэ Адыгеим и ЛIышъхьэ къызэрэхигъэщыгъэмкIэ, къэралыгъо программэхэм, лъэпкъ проектхэм, партиеу «Единэ Россиер» кIэщакIо зыфэхъугъэ Iофтхьабзэу рахъухьагъэхэр ипIалъэм ыкIи икъоу муниципалитетым щызэшIуахынхэ фае.«АгъэцэкIэжьырэ ыкIи агъэпсырэ псэуалъэ пэпчъ цIыфхэм ящыIакIэ нахьышIу шIыгъэным, социальнэ фэIо-фашIэхэр нахь дэгъоу афызэшIуахынхэм фэлэжьэн фае. Арышъ, цIыфхэр ежэх амал зэриIэкIэ нахь псынкIэу ыкIи нахь дэгъоу а IофшIэнхэр гъэцэкIагъэ хъунхэм. Федеральнэ IэпыIэгъум ишIуагъэкIэ лъэныкъо пстэухэмкIи Iофтхьэбзэшхохэр зэшIотэхых непэкIэ Iофхэм язытет гумэкIыгъо гъэнэфагъэхэр зэрэщыIэхэр нэрылъэгъу къешIыми. ТапэкIэ итхъухьэгъэгъэ проектхэм ащыщ гори хэзы тшIыщтэп. Бюджет мылъкоу къыхагъэкIырэр нахь шIогъэ ин хэлъэу зэрэдгъэфедэщтым тынаIэ тедгъэтыщт», — къыIуагъ Адыгеим и ЛIышъхьэ.АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.