ПэщакIэм пшъэрылъхэр фигъэуцугъэх

Адыгеим и ЛIышъхьэу КъумпIыл Мурат цIыфхэм IофшIэн ягъэгъотыгъэнымкIэ къэралыгъо къулыкъум и ГъэIорышIапIэу АР-м щыIэм ипэщакIэу Гъужъыекъо Рустам зэIукIэгъу дыриIагъ. ЗэдэгущыIэгъум хэлэжьагъ АР-м и ЛIышъхьэрэ министрэхэм я Кабинетрэ я Администрацие къэралыгъо къулыкъумкIэ ыкIи кадрэ политикэмкIэ и ГъэIорышIапIэ ипащэу Бэгугъэ Азамат.

КъумпIыл Мурат Гъужъыекъо Рустам фэлъэIуагъ IэнэтIакIэм гъэхъагъэхэр щишIынхэу ыкIи цIыфхэм IофшIэн ягъэ­гъотыгъэным епхыгъэ Iофхэм хэшIыкI дэгъу зэрафыриIэр къыхигъэщыгъ.«О а лъэныкъомкIэ Iофхэм язытет зыфэдэм ущыгъуаз ыкIи пшъэры­лъэу къыппыщылъхэм хэшIыкI афыуиI. КъулыкъумкIэ проектэу ра­гъэжьагъэхэр шIуагъэ хэлъэу зэшIохыгъэнхэм, цIыфхэм федэ ахэм къафахьыным тэркIэ мэхьанэшхо иI. Пстэуми апэу ар зыфэгъэхьы­гъэр сэкъатныгъэ зиIэхэм ыкIи Iоф­шIапIэ зымыгъотыхэрэм IэпыIэгъу афэхъугъэныр, нэмыкI сэнэхьатхэм афе­джэжьынхэмкIэ Iофыгъоу къэуцухэ­рэр зэшIохыгъэнхэр ары. ХэушъхьафыкIыгъэ дзэ операцием иветеранхэм ыкIи ахэм яунагъохэм арысхэм IэпыIэгъу ятыгъэным, IофшIапIэхэм ахэр аIугъэ­хьэгъэнхэм нахь дэгъоу адэлэжьэгъэн фае», — къыIуагъ КъумпIыл Мурат.ЦIыфхэм IофшIэн ягъэгъотыгъэнымкIэ АР-м и ГъэIорышIапIэ ипащэ республи­кэм и ЛIышъхьэ къыгъэуцугъэ пшъэрылъхэр щыIэныгъэм щыпхырыщыгъэнхэм дэлэжьэным зэрэфэхьазырыр къыIуагъ.НепэкIэ IофшIэн зымыгъотэу агъэунэфыгъэр процент 0,4-м нэсы, нэбгырэ 874-рэ учетым хэт. ЧIыпIэ мини 4,3-рэ фэдиз шъолъырымкIэ чIыпIэ нэкIэу щыI, а лъэныкъомкIэ гумэкIыгъом икоэффициент процент 0,2-рэ фэдиз мэхъу. Фондэу «Хэгъэгум иухъумакIохэр» зыфиIорэм икъутамэ игъусэхэу хэушъхьафыкIыгъэ дзэ операцием хэлажьэхэрэм IофшIэн ягъэгъотыгъэнымкIэ ахэм яшIуа­гъэ къагъакIо.ЗэIукIэгъум илъэхъан лъэпкъ проектэу «IофышIэхэр» зыфиIорэм ыкIи УФ-м и Правительствэ къыгъэуцурэ пшъэрылъхэм атегъэпсыхьагъэу цIыфхэм IофшIэн ягъэгъотыгъэным епхыгъэ Iофыгъохэм анэсыгъэх. ЦIыфхэм IофшIэн ягъэгъотыгъэнымкIэ муниципальнэ къулыкъухэр зычIэт унэхэр игъорыгъозэ гъэкIэжьыгъэнхэм мэхьэнэ гъэнэфагъэ зэриIэр КъумпIыл Мурат къыхигъэщыгъ. ГущыIэм пае, 2026-рэ илъэсым лъэпкъ проектым ипхырыщын дакIоу Адыгеим щыпсэу­хэрэм IофшIэн ягъэгъотыгъэным фытегъэпсыхьэгъэ Гупчи 9-мэ гъэцэкIэжьын IофшIэнхэр ащэкIох, «Урысыем IофшIэныр зэрэщызэхэщагъэр» зыфиIорэ фирменнэ шIыкIэм тетэу ящыкIэгъэщт Iэмэ-псымэхэр къащэфых. Сомэ миллиони 154-рэ фэдиз а гухэлъхэм апэIуагъэхьагъ.Адыгеим и ЛIышъхьэ анаIэ тыраригъэдзагъ IофшIэн мыгъотыныгъэм тапэкIи къыкIегъэчыгъэн, ащ фэгъэзэгъэ къулыкъум фэIо-фашIэхэр нахь дэгъоу зэшIуи­хыхэзэ ышIын зэрэфаем.Гъужъыекъо Рустам 2002-рэ илъэсым Пшызэ къэралыгъо технологическэ университетыр къыухыгъ, экономист сэнэхьатыр зэригъэгъотыгъ. Тэхъутэмыкъое районым инароднэ депутатхэм я Совет гъогогъуищэ хадзыгъ, народнэ депутатхэм я Совет итхьаматэ иго­дзагъ. А муниципальнэ образование дэдэм илъэс 19-рэ цIыфхэм IофшIэн ягъэгъотыгъэнымкIэ Гупчэу итым пэщэныгъэ дызэрихьагъ. 2013-рэ илъэсым сэнэ­хьатэу «Къэралыгъо ыкIи муниципальнэ гъэIорышIэныр» зыфиIорэмкIэ Урысыем лъэпкъ хъызмэтымкIэ и Академие къы­ухыгъ. 2025-рэ илъэсым къыщегъэжьагъэу АР-м цIыфхэм IофшIэн ягъэгъотыгъэнымкIэ икъэралыгъо къулыкъу и ГъэIорышIапIэ ипащэ игуадзэу щытыгъ. 2026-рэ илъэсым муниципальнэ Iофы­шIэхэмрэ пэщэныгъэ зехьэгъэнымрэ хэхъоныгъэ ягъэшIыгъэным тегъэпсыхьэгъэ программэу «Мэрхэм яеджапI» зыфиIорэр гъэхъагъэ хэлъэу къыухыгъ. Адыгэ Республикэм цIыфхэм IофшIэн ягъэгъотыгъэнымкIэ и ГъэIорышIапIэ ипэщэ IэнатIэ Iуагъэхьагъ.АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.