АКъУ
Урысые Федерацием и Правительствэ истипендие къалэжьыным пае Адыгэ къэралыгъо университетым щеджэхэрэр зэнэкъокъум пхырыкIыгъэх. Iоныгъом и 1-м къыщегъэжьагъэу 2027-рэ илъэсым ишышъхьэIу и 31-м нэс сомэ мин 20 зырыз ахэм къаратыщт.
Зэнэкъокъур Урысыем шIэныгъэмрэ гъэсэныгъэмрэкIэ и Министерствэ исайтэу стипендия.рф зыфиIорэм мэлылъфэгъум и 30-м къыщегъэжьагъэу мэкъуогъум и 15-м нэс щызэхищагъ. Мыщ очнэ шIыкIэм тетэу апшъэрэ еджапIэм щеджэхэрэр е экономикэм итехнологическэ хэхъоныгъэ ыкIи игъэкIэжьын япхыгъэ лъэныкъохэмкIэ еджэхэрэр ары хэлэжьэнхэ зылъэкIыгъэхэр. Ащ пае дэгъоу зэреджэхэрэр, академическэ чIыфэ зэратемылъыр ыкIи гъэхъагъэхэр зэряIэхэр къэзыушыхьатырэ тхылъхэр электроннэ шIыкIэм тетэу Адыгэ къэралыгъо университетым афигъэхьыгъэх.«Обществэм епхыгъэ шIэныгъ» зыфиIорэ лъэныкъомкIэ Урысыем истипендие къаратыщт экономикэмкIэ факультетым имагистратурэ ия 2-рэ курс щеджэрэ Константин Андрюхиным, социальнэ технологиемкIэ ыкIи зекIонымкIэ факультетым ия 4-рэ курс ис Вероника Дудкорэ Анастасия Земсковамрэ, юридическэ факультетым ия 4-рэ курс щеджэхэрэ Ангелина Моковозовам, ХъокIон Бислъан, Чэтэо Азэмат.«Инженернэ Iофыр, технологиер ыкIи техническэ шIэныгъэр» зыфиIорэмкIэ шIэныгъэ гъэнэфагъэхэмкIэ ыкIи цифрэ технологиемкIэ институтым ия 4-рэ курс щеджэрэ Игорь Наумовым, «Гъэсэныгъэ ыкIи кIэлэегъэджэ шIэныгъ» зыфиIорэмкIэ педагогикэмкIэ ыкIи психологиемкIэ факультетым ия 4-рэ курс ис Алина Ляликовам стипендиер къаратыщт.Адыгэ къэралыгъо университетым ипресс-къулыкъу.