Iэшъынэ А.
АР-м и Сурэт къэгъэлъэгъуапIэ сурэттех IэпэIасэу, сурэттеххэм яклубэу «Лэгъо-Накъэм» хэтэу Виктор Лутай ихэушъхьафыкIыгъэ къэгъэлъэгъонэу «Мир в котором я живу» зыфиIорэр къыщызэIуахыгъ. Аужырэ илъэси 3-м ащ тырихыгъэ сурэти 100 фэдиз Iофтхьабзэм хэхьагъ.
Адыгэ Республикэм исурэттеххэм яклуб ипащэу, АР-м культурэмкIэ изаслуженнэ IофышIэу Аркадий Кирнос зэхахьэр къызэIуихыгъ.— Виктор Лутай итворчествэ гъунапкъэ зэримыIэр иIофшIэнхэм къаушыхьаты. I996-рэ илъэсым къыщыублагъэу дунаим ихэгъэгу 22-рэ фэдизмэ ащыкIогъэ къэгъэлъэгъонхэм ар ахэлэжьагъ. Хэгъэгу, дунэе ыкIи шъолъыр зэнэкъокъухэм хагъэунэфыкIырэ чIыпIэхэр къащыдихыгъ, шIухьафтыныбэ къылэжьыгъ. Непэ сурэттехым идунай хьалэмэт икъэгъэлъэгъон къытфигъэхьазырыгъ, — къыIуагъ Аркадий Кирнос.АР-м культурэмкIэ иминистрэу Аулъэ Юрэ зэхахьэм къыщыгущыIагъ.— Виктор Василий ыкъом имэфэкIкIэ сыфэгушIо ыкIи АР-м и Къэралыгъэ Совет — Хасэм и Рэзэныгъэ тхылъ естыжьы сшIоигъу. Искусствэм ыкупкI къырихызэ, художественнэ амалхэр ыгъэфедэзэ, иIофшIагъэ пэпчъ псэ пытым фэдэу дахэу IэпэIасэм егъэпсы. ЫпэкIэ творческэ лъэгапIэхэм анэсынэу сыфэлъаIо, — къыIуагъ Аулъэ Юрэ.
— Сурэттехым иIофшIагъэхэр гъэшIэгъонэу гъэпсыгъэх, гупшысэ куу ащыпхырыщыгъ, щыIэныгъэм къыхэхыгъэх, — къыIуагъ Адыгэ Республикэмрэ Къэрэщэе-Щэрджэсымрэ язаслуженнэ сурэтышIэу, архитекторэу Бырсыр Абдулахь.— Мурад шъхьаIэу сиIэр тыкъэзыуцухьэрэ дунаим идэхагъэ къэзгъэлъэгъоныр, щыIэныгъэр лъызыгъэкIотэрэ цIыфым ищыIэкIэ-псэукIэ гукIэ сылъыIэсызэ, шIум, дэхагъэм афэсщэнхэр ары, — къыIуагъ Виктор Лутай.Тыкъэзыуцухьэрэ дунаим идэхагъэ сурэт техыгъэхэмкIэ IупкIэу къеIуатэ: къушъхьэ жэкIэфхэр, псыхъо чъэрхэр, мэз дахэхэр, лэжьыгъэ бэгъуагъэ къызэрахыжьырэ чIыгухэр, культурэм, шIэныгъэм, спортым япхыгъэхэр. Адыгеим ицIыф шIагъохэр зэкъошныгъэр агъэпытэзэ зы бын-унагъоу зэдэпсэухэрэр, щыIэныгъэм илъэныкъо зэфэшъхьафхэр сурэттехым иIофшIагъэхэм къащегъэлъагъо.Зы нэгъэупIэпIэгъум сурэт пчъагъэ тепхын плъэкIыщт. СурэтымкIэ цIыфым игумэкI-гупшысэхэр, дунаир зэрилъэгъурэ шIыкIэр IэпэIасэм къыреIотыкIы. Зы сурэтыр зы нэплъэгъу. ЦIыфым инэплъэгъу къыщыхэбгъэщы пшIоигъор сурэтым гупшысэ шъхьаIэ фэхъун фае.Iофтхьабзэм Адыгэ Республикэм ишIэныгъэлэжьхэм ащыщхэр, сурэтышIхэр, сурэттеххэр, АР-м культурэмкIэ и Министерствэ илIыкIохэр, искусствэхэмкIэ колледжэу Тхьабысымэ Умарэ ыцIэ зыхьырэм истудентхэр, зекIохэр хэлэжьагъэх.Къэгъэлъэгъоныр Iоныгъом и 20-м нэс зэIухыгъэщт.ЛъэпшъыкъоФатим.