ДзюдомкIэ зэнэкъокъухэу СССР-м изаслуженнэ тренерэу Кобл Якъубэ ишIэжь фэгъэхьыгъэхэр Iоныгъом и 5 — 6-м Мыекъуапэ щыкIощтых. Я 13-у зэхащэрэ турнирым хъулъфыгъэхэм ыкIи бзылъфыгъэхэм зыщаушэтыщт.
Адыгэ къэралыгъо университетым и Ордэунэу Кобл Якъубэ ыцIэ зыхьырэм спортсменхэр щызэнэкъокъущтых. Iофтхьабзэм кIэщакIо фэхъугъэх республикэ спорт еджапIэмрэ АР-м физическэ культурэмкIэ ыкIи спортымкIэ и Комитетрэ.ЗэрагъэнэфагъэмкIэ, Урысыем и Къыблэ, нэмыкI шъолъырхэм ядзюдоист анахь лъэшхэр Адыгеим икъэлэ шъхьаIэ къеблэгъэщтых. Зэнэкъокъухэр сыхьатыр пшIыкIузым ыныкъом рагъэжьэщтых, кIэух зэIукIэгъухэр мафэм сыхьатыр 5-м.