ПцэжъыеешэнымкIэ фестиваль Адыгеим щыкIуагъ. Фондэу «Хэгъэгум иухъумакIохэр» зыфиIорэм ишъолъыр къутамэрэ Мыекъуапэ физическэ культурэмрэ спортымрэкIэ и Комитетрэ зэхащэгъэ Iофтхьабзэм хэушъхьафыкIыгъэ операциехэм ыкIи зэо зэпэуцужьхэм ахэлэжьэгъэ ветеранхэр, ахэм ягупсэхэр зэфищагъэх.
Мыщ фэдэ зэIукIэхэм пшъэрылъ шъхьаIэу яIэр цIыфхэм загъэпсэфыныр, шIуагъэ къытэу яуахътэ агъэкIоныр ыкIи зэдэгущыIэнхэр ары. Ащ дакIоу пцэжъыеешэнымкIи ахэм заушэтыгъ.МэфэкI Iофтхьабзэм ветерани 7 хэлэжьагъ. ХъулъфыгъэхэмкIэ текIоныгъэр къыдахыгъ Левон Гамалянрэ Бжьэц Азэматрэ, ахэм пцэжъыеу къаубытыгъэхэм килограмм 21,7-рэ къащэчыгъ. ЯтIонэрэ чIыпIэр афагъэшъошагъ Виктор Кузнецовымрэ Михаил Люсенкэмрэ (килограмм 17,2-рэ), ящэнэрэ хъугъэх Алексей Дубровскэмрэ Владимир Щукинрэ (килограмми 5,1-рэ).БзылъфыгъэхэмкIэ къэгъэлъэгъон анахь дэгъу зиIэр хэушъхьафыкIыгъэ дзэ операцием зикIалэ хэкIодэгъэ Оксана Ошкаловар ары, ятIонэрэ ыкIи ящэнэрэ чIыпIэхэр афагъэшъошагъэх Ольга Хлопонинамрэ Наталья Христенкэмрэ.— Дэгъу дэдэу зыдгъэпсэфыгъ, сымышIэщтыгъэ цIыфхэм нэIуасэ сафэхъугъ, ахэм сигуапэу садэгущыIагъ. Джы пцэжъые анахь ин къэсыубытыныр гухэлъышIоу зыдэсIыгъыщт, — къыIуагъ текIоныгъэр къыдэзыхыгъэ Оксана Ошкаловам.