А. Гусев
Джырэ шапхъэхэм адиштэу зэтырагъэпсыхьэгъэ Адыгэ республикэ кIэлэцIыкIу тхылъеджапIэм ипчъэхэр къызэIуихыжьыгъэх. Адыгеим и ЛIышъхьэу КъумпIыл Мурат пшъэрылъ къызэрэфишIыгъэм тетэу ащ икъызэIухыжьын хэлэжьагъ АР-м иминистрэхэм я Кабинет и Тхьаматэ игуадзэу, финансхэмкIэ иминистрэу Виктор Орловыр.
Джащ фэдэу Iофтхьабзэм хэлэжьагъэх АР-м культурэмкIэ иминистрэу Аулъэ Юрэ, Адыгэ республикэ кIэлэцIыкIу тхылъеджапIэм ипащэу Елена Демьянковар, ащ иIофышIэхэр, кIэлэеджакIохэр.ТхылъеджапIэр 1936-рэ илъэсым къызэIуахыгъагъ, джащыгъум тхылъ мини 3,3-рэ зычIэлъыгъэм зы ун зэлъиубытыщтыгъэр. КъызызэIуахыгъэр илъэс 90-рэ зэрэхъурэр мы илъэсым ичъэпыогъу ащ хигъэунэфыкIыщт. Гъэзетхэр, журналхэр, бзэ зэфэшъхьафкIэ къыдагъэкIыгъэ тхылъхэр, электрон къэкIуапIэхэр зэрэхэтхэу джырэ шапхъэхэм адиштэрэ интеллектуальнэ гупчэм пкъыгъо мини 112-м ехъу зыхэхьэрэ фонд иI. КIэлэцIыкIу мини 8-м ехъу илъэс къэс ащ къеуалIэ. Учреждением иIофышIэхэм литературнэ мэфэкIхэр, зэнэкъокъухэр, творческэ зэIукIэхэр ыкIи нэмыкI Iофтхьабзэхэр зэхащэх.
Лъэпкъ проектэу «Унагъу» зыфиIорэм къыдыхэлъытэгъэ федеральнэ проектэу «Унагъом щагъэлъапIэхэрэмрэ культурэм иинфраструктурэрэ» зыфиIорэм диштэу 2025 — 2026-рэ илъэсхэм игъэкIотыгъэ гъэцэкIэжьынхэр псэуалъэм рашIылIагъэх. Ащ пае бюджет зэфэшъхьафхэм сомэ миллион 39,8-м ехъу къахагъэкIыгъ. А ахъщэмкIэ унашъхьэр агъэцэкIэжьыгъ, шъхьаныгъупчъэхэр, унэ кIоцIым итхэр зэрэщытэу зэблахъугъэх, инженер коммуникациехэр агъэкIэжьыгъэх, сигнализациемкIэ, машIом зыщыухъумэгъэнымкIэ пкъыгъохэр, видеокамерэхэр чIагъэуцуагъэх. Джащ фэдэу мебелыкIэ, мультстудие, оборудованиякIэ, интерактивнэ панельхэр къащэфыгъэх, тхылъеджэпIэ фондым хагъэхъуагъ.
Адыгеим и ЛIышъхьэ ыцIэкIэ АР-м иминистрэхэм я Кабинет и Тхьаматэ игуадзэу, финансхэмкIэ иминистрэу Виктор Орловым Iофтхьабзэм хэлажьэхэрэм шIуфэс къарихыгъ. АгъэкIэжьыгъэ тхылъеджапIэр къызэрэзэIуахыжьыгъэмкIэ учреждением иIофышIэхэми, кIэлэцIыкIухэми ар къафэгушIуагъ, шIоу щыIэр къадэхъунэу къафэлъэIуагъ.«Урысыем и Президентэу Владимир Путиныр, Урысыем и Правительствэ кIэщакIо зыфэхъугъэ Iофтхьабзэхэм, лъэпкъ проектхэм, «Единэ Россием» и Народнэ программэ яшIуагъэкIэ зэхъокIыныгъэшIухэр тишъолъыр фэхъугъэх. Ахэм зэу ащыщ агъэкIэжьыгъэ республикэ кIэлэцIыкIу еджапIэу къызэIуахыжьыгъэр. Iоныгъом и 1-м мы Iофтхьабзэр зэрэзэхащагъэм, тхылъеджапIэр къызызэIуахыгъэр илъэс 90-рэ зыщыхъурэм ар зэрэтефагъэм мэхьанэшхо иI», — къыIуагъ Виктор Орловым.АР-м культурэмкIэ иминистрэу Аулъэ Юри, тхылъеджапIэм ипащэу Елена Демьянковари Iофтхьабзэм къыщыгущыIагъэх. ТхылъеджапIэм иамалхэм зэрахэхъощтым, кIэлэцIыкIухэм еджэныр шIу алъэгъунымкIэ ащ иIофышIэхэм афэлъэкIыщтыр тапэкIи зэрашIэщтым яцыхьэ зэрэтелъыр ахэм къаIуагъ.Культурэмрэ гъэсэныгъэмрэ япхыгъэ проектхэм япхырыщын тхылъеджапIэм технопаркэу «Кванториумым», обществэу «ШIэныгъэм» ялIыкIохэр, психологхэр, кIэлэегъаджэхэр, нэмыкI IофышIэхэр къыхигъэлэжьэщтых.