А. Гусев
Адыгеим и ЛIышъхьэу КъумпIыл Мурат ригъэблэгъагъ Адыгэ Республикэм и Официальнэ лIыкIоу Краснодар краим и Губернатор дэжь щыIэнэу бэмышIэу агъэнэфэгъэ АкIэгъу Арамбый.
ЗэIукIэгъум хэлэжьагъ Адыгэ Республикэм и ЛIышъхьэрэ иминистрэхэм я Кабинетрэ я Администрацие къэралыгъо къулыкъумкIэ ыкIи IофшIэным ехьылIэгъэ политикэмкIэ и ГъэIорышIапIэ ипащэу Бэгугъэ Азэмат.АкIэгъу Арамбый дунэе зэфыщытыкIэхэмрэ экономикэмрэ алъэныкъокIэ Пшызэ къэралыгъо университетымрэ Адыгэ къэралыгъо университетымрэ къыухыгъэх. Мыекъопэ къэралыгъо технологическэ университетым икъутамэу псэупIэу Яблоновскэм дэтым щыригъэджагъэх, джащ фэдэу сатыу къулыкъухэм IэнэтIэ зэфэшъхьафхэр ащызэрихьагъэх. 2014-рэ илъэсым къыщегъэжьагъэу АР-м и Официальнэ лIыкIоу Краснодар краим и Губернатор дэжь щыIэм игуадзэу щытыгъ. Адыгэ Республикэм и ЛIышъхьэ и Указэу 2026-рэ илъэсым шышъхьэIум и 28-м къыдэкIыгъэм тетэу Адыгеим и Официальнэ лIыкIоу Краснодар краим и Губернатор дэжь щыIэнэу агъэнэфагъ.Бэгугъэ Азэмат къызэриIуагъэмкIэ, къэралыгъо ыкIи муниципальнэ гъэIорышIэным IофышIэ ныбжьыкIэхэр нахьыбэу хэщэгъэнымкIэ республикэм ипащэхэм къыдалъытэрэ лъэныкъохэм зыкIэ а Iофтхьабзэр ащыщ хъугъэ.
ЗэдэгущыIэгъум илъэхъан Адыгеим и ЛIышъхьэ къызэрэхигъэщыгъэмкIэ, Адыгеимрэ Краснодар краимрэ бэшIагъэу гъунэгъушIу ыкIи блэгъэныгъэ зэфыщытыкIэхэр зэдыряIэх. Хэгъэгум ишъолъыритIу экономикэм, инфраструктурнэ псэуалъэхэм, гъэсэныгъэм, псауныгъэм икъэухъумэн ыкIи социальнэ лъэныкъом зэрапхых.«Краснодар краир анахь къытпэблэгъэ тигъунэгъу. Ащ дытиIэ экономикэ, культурнэ ыкIи IофшIэным епхыгъэ зэфыщытыкIэхэр къэтыухъумэнхэм, дгъэпытэнхэм мэхьанэшхо иI. Гъэпсын, хэхъоныгъэ Iофым афытегъэпсыхьэгъэ пшъэрылъхэр къытпыщылъых, тицыхьэ зытелъыжьэу ыпэкIэ тылъыкIотэщт. Пшызэ шъолъырымрэ Адыгеимрэ ябизнес-проектхэм шъолъырхэм яэкономикэкIэ хэхъоныгъэу ашIыщтхэр къащыдэлъытагъэх. Краим ихэбзэ къулыкъухэм шIуагъэ къэзытырэ зэдэлэжьэныгъэ адытиIэн, тизэдэпсэуныгъэ джыри нахь лъэгэпIакIэм зэрэтетщэщтым тыдэлэжьэн фае», — къыIуагъ КъумпIыл Мурат.ЛIыкIо IофшIапIэм ипащэ къызэригъэгугъагъэхэмкIэ, пшъэрылъэу иIэхэр гъэцэкIагъэ хъунхэм пае амалэу иIэр зэкIэ рихьылIэщт.IофшIэнымкIэ, культурэмкIэ, гъэсэныгъэмкIэ, псауныгъэм икъэухъумэнкIэ, нэмыкI социальнэ лъэныкъохэмкIэ лъэныкъуитIуми Iофтхьабзэхэр зэдызэшIуахыщтых, лъэпкъ ыкIи дин зэгурыIоныгъэ-зэдэлэжьэныгъэу щыIэр гъэпытэгъэнымкIэ IофшIэкIэшIоу аIэкIэлъ хъугъэмкIэ зэхъожьыщтых.АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.