ЛIышъхьэр афэгушIуагъ

Республикэм къэралыгъо гъэпсыкIэ иIэ зыхъугъэм и Мафэ Къэбэртэе-Бэлъкъарым тыгъуасэ хигъэунэфыкIыгъ. А мэхьанэшхо зиIэ хъугъэ-шIагъэмкIэ къош шъолъырым щыпсэухэрэм афэгушIуагъ Адыгеим и ЛIышъхьэу КъумпIыл Мурат.«Къэбэртэе-Бэлъкъарым щыпсэухэрэм, къош республикэм ипащэу КIокIо Казбек сафэгушIо къэралыгъо гъэпсыкIэм и Мафэ фэшI!1921-рэ илъэсым Iоныгъом и 1-р шъолъырым икъэралыгъо гъэпсыкIэкIэ ублапIэ хъугъэ. 1997-рэ илъэсым республикэм и КонституциякIэу аштагъэмкIэ Урысые Федерацием хэхьэрэ шъолъырхэм афэдэ фитыныгъэхэр зиIэ хъугъэ Къэбэртэе-Бэлъкъарым ихэхъоныгъэкIэ чэзыукIэр ублагъэ хъугъэ. Непэ а мафэм къеушыхьаты лIэужхэм зэпхыныгъэ пытэ азыфагу зэрилъыр, тарихъым ыпашъхьэ пшъэдэ­кIыжь зэрэщахьырэр ыкIи гъэпсын Iофым теубытэгъэ ин зэрэфыряIэр.Адыгеимрэ Къэбэртэе-Бэлъкъарымрэ лIэшIэгъубэ хъугъэу гъунэ­гъушIу зэфыщытыкIэхэр азыфагу илъых, титарихъи, тикультури зы. Къош шъолъырым социальнэ-экономикэ хэхъоныгъэу ышIырэм лъытэныгъэ ин фытиIэу тылъэплъэ, Iоф­шIэным илъэныкъо зэфэ­шъхьафхэм гъэхъагъэу ащишIыхэрэм ащэгушIукIы.Лъытэныгъэ зыфэсшIырэ Казбек Валерий ыкъом, зэкIэ Къэбэр­тэе-Бэлъкъарым щыпсэухэрэм сыгу къыздеIэу сафэлъаIо псауныгъэ пытэрэ мамыр щыIакIэрэ яIэнэу, республикэ гупсэр ыкIи ти Хэгъэгушхоу Урысые Федерациер нахь зэтегъэпсыхьагъэ хъунхэм пае гъэ­псын Iофым гъэхъэгъакIэхэр щашIынхэу!» — къыщеIо шIуфэс тхылъым.