ШышъхьэIум и 23-м къыщыублагъэу и 30-м нэс Апэрэ шъолъыр театральнэ фестивалэу «ЛъэгапI» зыфиIорэр Адыгеим щыкIуагъ.
КъекIокIырэ фестиваль мэхьанэ зэратыгъэ проектым Адыгеир иапэрэ бысымыгъ.Урысыем инароднэ артистэу, Лъэпкъхэм я Театрэ ихудожественнэ пащэу Евгений Мироновым игукъэкIыкIэ проектыр щыIэныгъэм щыпхыращы. Адыгеим и ЛIышъхьэу КъумпIыл Мурат иIэпыIэгъукIэ Iофтхьабзэр зэхащагъ. Лъэпкъхэм я Театрэ, АР-м культурэмкIэ и Министерствэ, Адыгеим итеатральнэ ыкIи концерт Зэхахьэхэм гукъэкIыр пхыращыгъ. Фестивалым ипрограммэ хэхьэгъэ къэгъэлъэгъон гъэшIэгъонхэр Мыекъуапэ щыпсэухэрэмрэ ащ ихьакIэхэмрэ арагъэлъэгъугъ.Фестивалым шъолъыр театрэхэм яактерхэм, ярежиссерхэм яIэпэIэсэныгъэ къыщагъэлъэгъуагъ, лъэгапIэу зынэсыгъэхэр нэмыкIхэм арагъэпшагъ, яIофшIакIэкIэ зэдэгощэнхэ амал яIагъ. Непэрэ лъэхъаным иискусствэ ыкIи икультурэ зэщымыщ Урысыем итеатральнэ купхэм къагъэлъэгъуагъ. Къалэхэу Альметьевскэм, Березники, Заречнэм, Набережные Челны, Новокузнецкэ ыкIи Новокуйбышевскэ яартистхэм яIофшIагъэхэр шъошэ лъагэм илъыгъэх.Шъугу къэдгъэкIыжьын, театральнэ фестивалэу «ЛъэгапIэ» зыфиIорэм ипрограммэ хэтэу Евгений Мироновым ыгъэуцугъэ спектакль-концертэу «Горькэм ирассказхэр» зыфиIорэр Лениным игупчэ къыщагъэлъэгъуагъ. Евгений Мироновыр ыкIи Москва и Къэралыгъо академическэ камернэ хор (Мининым ихор) ащ хэлэжьагъэх. Зыфэдэ къэмыхъугъэ культурнэ хъугъэ-шIэгъэ ин ар хъугъэ. Адыгеим и ЛIышъхьэу КъумпIыл Мурат Iофтхьабзэм хэлэжьагъ, культурэм ыкIи искусствэм иIахьышхоу ахилъхьэрэм фэшI АР-м и ЛIышъхьэ и Щытхъу тхылъ Евгений Мироновым фагъэшъошагъ.«ЛъэгапIэм» мурад шъхьаIэу иIэр непэрэ театральнэ искусствэм Кавказ щыпсэухэрэр лъыIэсыхэу, мэхьанэ ратэу шIыгъэныр, Урысыем ишъолъыр зэфэшъхьафхэм япрофессиональнэ купхэм зэпхыныгъэу яIэр гъэпытэгъэныр арэу зэрэщытыр зэхэщакIохэм къыхагъэщыгъ.