М. Гордышов
Лъэпкъ проектэу «Унагъом» къыдыхэлъытэгъэ федеральнэ проектэу «Унагъом щагъэлъапIэрэр» зыфиIорэм диштэу республикэ филармонием игъэцэкIэжьын фежьагъэх. Мы учреждениер Адыгэ Республикэм и Концерт зэхахьэ къыхеубытэ. 2026 — 2027-рэ илъэсхэм гъэцэкIэжьынхэр мыщ щыкIонэу рахъухьэ.
Адыгеим и ЛIышъхьэу КъумпIыл Мурат республикэ филармонием гъэцэкIэжьын IофшIэнхэр зэрэщыкIорэм зыщигъэгъозагъ. Ащ игъусагъэх АР-м культурэмкIэ иминистрэу Аулъэ Юрэ, учреждением идирекцие, подряднэ организациехэм ялIыкIохэр.ГъэцэкIэжьыным пае бюджет пстэуми сомэ миллион 227-м ехъу къатIупщыгъ. Мыгъэ сомэ миллиони 124,9-рэ, къихьащт илъэсым — сомэ миллиони 102,2-рэ къызфагъэфедэн ямурад. Унэ гупэмрэ унашъхьэмрэ ягъэцэкIэжьынкIэ, шъхьаныгъупчъэхэм, лифтхэм, унэр зэрагъэфэбэрэ пкъыгъохэм язэблэхъункIэ зэзэгъыныгъэхэр адашIыгъахэх. Унэе гъэфэбапIэ учреждением фагъэпсыщт.
КъумпIыл Мурат подряднэ организациехэм япащэхэм адэгущыIагъ, пшъэрылъ шъхьаIэхэр ахэм къафигъэнэфагъэх, гъэцэкIэжьын IофшIэнхэмкIэ пIалъэхэр аукъо зэрэмыхъущтыр ариIуагъ.«КультурэмкIэ учреждениехэм игъэкIотыгъэ гъэцэкIэжьынхэр яшIылIэгъэнхэмкIэ IэпэIэсэныгъэ тиIэ хъугъэ. АщкIэ щысэшIоу щыт концерт залэу «Налмэсыр» зэрагъэкIэжьыгъэр. Шъолъырми, хэгъэгуми якультурнэ щыIэныгъэкIэ республикэ филармонием амалыкIэхэр иIэ хъунхэм, Урысыем икультурнэ гупчэ пэрытхэм ар адэбэкъоным тэркIэ мэхьанэшхо иI», — къыIуагъ ЛIышъхьэм.Филармоническэ купхэм ярепетициехэр, яконцертхэр икъоу зэхащэнхэу республикэм и ЛIышъхьэ пшъэрылъ афишIыгъ. ГъэцэкIэжьынхэр окIофэ культурэм инэмыкI учреждениехэр зычIэт унэхэм ахэр зэращыIэщтхэр хигъэунэфыкIыгъ.Творческэ купхэр зыхэлэжьэрэ мэфэкI, культурэ Iофтхьабзэхэр зэхащэхэ зыхъукIэ, кIэ горэхэр ренэу агъэфедэн зэрэфаем КъумпIыл Мурат анаIэ тыраригъэдзагъ.Симфоническэ оркестрэм, филармонием иансамблэхэм, театрэхэм ащызэхэщэгъэ купхэм къалэм ичIыпIэхэу агъэкIэжьыгъэхэми, «Мэздахэ» дэжьи закъызэрэщагъэлъагъорэр республикэм щыпсэухэрэми, ихьакIэхэми агу зэрэрихьырэр ащ къыхигъэщыгъ.АР-м и ЛIышъхьэ ипресс-къулыкъу къытырэ къэбархэмкIэЛIышэ Саныет.