IофшIэгъу дэкIыгъохэр

Мыекъопэ районырАдыгеим и ЛIышъхьэу КъумпIыл Мурат Мыекъопэ районымкIэ къутырэу Северо-Восточные сады дэт гъэсэныгъэ Гупчэу N 9-м щыIагъ. Iофтхьабзэм хэлэжьагъэх АР-м иминистрэхэм я Кабинет и Тхьаматэ игуадзэу, АР-м финанс­хэмкIэ иминистрэу Виктор Орловыр, Адыгеим ипрокурорэу Игорь Шевченкэр.Илъэсым икъихьэгъум дэжь лъэпкъ проектэу «НыбжьыкIэхэмрэ кIэлэцIыкIухэмрэ» зыфиIорэм къыдыхэлъытэгъэ гъэцэкIэжьын IофшIэнхэу мыщ щаублагъэхэр ыкIэм фэкIуагъэх. Iоныгъом и 30-м атынэу щытыгъэ псэуалъэр ипIа­лъэм къыпэу агъэцэкIэжьыгъ. Iоныгъом и 1-м кIэлэцIыкIухэр зэтырагъэпсыхьэгъэ еджапIэм кIощтых.

АР-м гъэсэныгъэмрэ шIэныгъэмрэкIэ иминистрэу Евгений Лебедевым, Мые­къопэ районым ипащэу Михаил Марьиным, джащ фэдэу еджапIэм ипащэхэмрэ подряднэ организацием илIыкIохэмрэ яеплъыкIэхэр къаIуагъэх. Проектым сметэ уасэу иIэр сомэ миллион 61,2-м шъхьадэкIыгъ. Ащ щыщэу сомэ миллион 40,5-р — федеральнэ мылъкум, сомэ миллион 20,3-р — муниципальнэ ыкIи сомэ мин 409-м ехъур республикэ бюджетым къахэкIыгъэх. ЧIыпIэм изэтегъэ­псыхьан сомэ миллиони 7,1-рэ фэдиз пэIухьагъ. ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Перспективэр» ары мыщкIэ подряднэ организациеу щытыгъэр. Гъэсэныгъэ зыщарагъэгъотырэ Гупчэм кIэлэеджэкIо 300-м ехъу екIолIэн алъэкIыщт.«Республикэм гъэсэныгъэ зыщарагъэгъотырэ чIыпIэу иIэхэм агъэ­кIэжьыгъэ Гупчэр зэу къахэуцоным тэркIэ мэхьанэшхо иI. КIэлэцIыкIухэм шIэныгъэ куу ягъэгъотыгъэнымкIэ, ятворческэ амалхэм ахэ­гъэхъогъэнымкIэ ящыкIагъэхэр зэкIэ мыщ щарагъэгъотыщтых. ЕджапIэм ипащэхэм ыкIи щыла­жьэхэрэм анаIэ тырязгъэдзэнэу сыфай кIэлэеджакIохэм шIэныгъа­кIэхэр нахь шIогъэ ин хэлъэу къыз­IэкIагъэхьаным тегъэпсыхьагъэу егъэджэн Iофыр зэхащэнэу. КIэлэцIыкIухэмкIэ Iэрыфэгъоу щытынымкIэ ыкIи еджэным гухахъо хагъотэнымкIэ мы псэуалъэм мэхьанэшхо иI», — къыIуагъ КъумпIыл Мурат.Мы мэфэ благъэхэм еджапIэм ищыкIэгъэщт Iэмэ-псымэхэр, интерактивнэ панельхэр, шкафхэр, шхапIэм чIэтыщтхэр къыращэлIэщтых. Зэхэубытагъэу къэпIон хъумэ, игъэкIотыгъэ гъэцэкIэ­жьыным IофшIэн лъэпкъ зэфэшъхьаф 14 къыхиубытагъ, гъэсэныгъэ дэгъу ыкIи шIэныгъэ куухэр зэрагъэгъотынхэмкIэ, щынэгъончъэу щытынымкIэ, джырэ уахътэм диштэрэ лъэныкъохэр зэкIэ къыдалъытэхэзэ еджапIэр зэтырагъэпсы­хьагъ.Красногвардейскэ районырАдыгеим и ЛIышъхьэу КъумпIыл Мурат республикэмкIэ Красногвардейскэ районым гъэсэныгъэм епхыгъэ псэуалъэ­хэу щашIыхэрэмрэ зэтырагъэпсыхьэхэрэм­рэ зэригъэлъэгъугъэх. Ащ игъусагъэх АР-м иминистрэхэм я Кабинет и Тхьаматэ игуадзэу, Адыгеим финансхэмкIэ иминистрэу Виктор Орловыр, АР-м гъэсэныгъэмрэ шIэныгъэмрэкIэ иминистрэу Евгений Лебедевыр, Красногвардей­скэ рйоным ипащэу Гъубжьэкъо Темур.ПсэупIэу Красногвардейскэм зэкIохэм, республикэм и ЛIышъхьэ къыплъыхьагъ лъэпкъ проектэу «Унагъор» зыфиIорэм къыдыхэлъытагъэу гъэцэкIэжьынхэр ыкIэм зыщыфэкIохэрэ кIэлэцIыкIу Iыгъы­пIэу N 6-у «ЧайкэкIэ» заджэхэрэр. Мы IыгъыпIэр нэбгырэ 50-м тегъэпсыхьагъ. IофшIэнхэмрэ зэтегъэпсыхьанымрэ апэIухьагъэр сомэ миллион 17,7-рэ. ПсэолъэшIхэм унэ кIоцI IофшIэнхэр зэшIуахыгъэх: джэхашъохэр, шъхьаныгъупчъэхэр, пчъэ блыпкъхэр зэблахъугъэх, унашъхьэр агъэкIэжьыгъ, псэуа­лъэм ыгупи зэтырагъэпсыхьагъ. Ащ нэмыкIэу кIэлэцIыкIухэр зыщычъыехэрэ унэхэм мебелыкIэр арагъэуцуагъ, зыщыгыкIэ­хэрэр, пщэрыхьапIэр, медицинэ кабинетыр зэтырагъэпсыхьагъэх. Джырэ уахътэм диштэрэ модульнэ пщэрыхьапIи ашIыгъ. КIэлэцIыкIу IыгъыпIэм ипчъэхэр Iоныгъом и 1-м къызэIуихыщтых.АР-м и ЛIышъхьэ а мэфэ дэдэм селоу Большесидоровскэм дэт кIэлэцIыкIу IыгъыпIэу N 2-м ишIын зэрэкIорэм зыщигъэгъозагъ. КIэлэцIыкIу 60-м телъы­тэгъэ псэуалъэр республикэ къэралыгъо программэу «Гъэсэныгъэм хэхъоныгъэ егъэшIыгъэныр» зыфиIорэм диштэу макIо. Сомэ миллион 260-рэ фэдиз псэуалъэм пэIухьащт, 2027-рэ илъэсым чъэпыогъум атынэу рахъухьагъ.Урысыем и ЛIыхъужъэу Н. Н. Шевелевым ыцIэ зыхьырэ еджапIэу N 15-м, селоу Еленовскэм дэтым, республикэм и ЛIышъхьэ щыIагъ. Лъэпкъ проектэу «КIэлэцIыкIухэмрэ ныбжьыкIэхэмрэ» зыфиIорэм диштэу игъэкIотыгъэ гъэцэкIэжьынхэр ащ рашIылIэх. Унашъхьэр, псы, фэбэ ыкIи электричествэ рыкIуапIэхэр зэблахъунхэу, ящыкIэгъэщт Iэмэ-псымэхэр ащэфынхэу рахъухьагъ. Проектыр сомэ миллион 97-м къыщыкIэщтэп, пIалъэу псэуалъэр затыщтыр 2027-рэ илъэсым ишышъхьэIу маз.Республикэм и ЛIышъхьэ подрядчикым гущыIэгъу зыфэхъум игъэкIотыгъэ гъэцэкIэжьыныр игъом ухыгъэнымкIэ пшъэ­рылъхэр фишIыгъэх, спорт псэуалъэхэр еджэпIэ щагум дэтынхэу, чъыгхэмрэ къэгъагъэхэмрэкIэ ар агъэкIэрэкIэнэу игъо афилъэгъугъ.Республикэм и ЛIышъхьэ къызэрэхигъэщыгъэмкIэ, Урысыем и Президентэу Владимир Путиныр кIэщакIо зыфэхъугъэ программэхэу еджапIэхэмрэ кIэлэцIыкIу IыгъыпIэхэмрэ яигъэкIотыгъэ гъэцэкIэ­жьын епхыгъэхэр гъэцэкIэгъэнхэмкIэ, лъэпкъ проектхэм къыдалъытэрэ Iоф­тхьабзэхэр зэшIохыгъэнхэмкIэ пшъэ­­- ры­лъ­­хэр гъэцэкIагъэ зыхъухэкIэ, джырэ уахътэм къыгъэуцурэ санитарнэ шапхъэ­хэм ахэр адиштэ хъущтых, еджапIэхэм ыкIи кIэлэцIыкIу IыгъыпIэхэм ищыкIа­гъэу зыщыхъурэм чIыпIэ тедзэхэри яIэным иамали щыIэ хъущт.«Президент программэм къыдыхэлъытагъэу еджапIэхэм яигъэкIотыгъэ гъэцэкIэжьынкIэ IофшIэкIэшIу тIэкIэлъ хъугъэ, ахэм яинфраструктурэ гъэкIэжьыгъэнымкIэ мылъкуи, амали тиI, муниципальнэ гупчэхэм ямызакъоу, псэупIэ мыинхэми кIэлэцIыкIухэр ащагъэсэнхэмкIэ ыкIи ащапIунхэмкIэ Iэрыфэгъу амалхэр зэфэдэу ягъэгъотыгъэнхэ фае. Партиеу «Единэ Россием» ынаIэ къыттетэу чэзыу-чэзыоу а пшъэрылъыр зэшIотхыщт», — къы­Iуагъ КъумпIыл Мурат.

Лъэпкъ проектэу «Унагъом» къыды­хэлъытэгъэ федеральнэ проектэу «Ны­хэмрэ кIэлэцIыкIухэмрэ якъэухъу­мэн» зыфиIорэм диштэу Красногвардейскэ гупчэ сымэджэщым имодульнэ бзылъфыгъэ консультациеу агъэпсырэр рес­публикэм и ЛIышъхьэ псэупIэу Красногвардейскэм къыщызэпиплъыхьагъ.ЫпэкIэ бзылъфыгъэ консультациер терапевтическэ отделением къыфэгъэзэгъэгъэ унэжъым чIэтыгъ. ПроектыкIэм диштэу мамыку-гинекологхэм якабинетхэр, процедурэхэр защыфашIыщт, медикэ-социальнэ IэпыIэгъу зыщаратыщт кабинетхэр, мафэрэ къызэкIолIэщтхэ стационарыр ащ хэтыщтых. Псэолъэ­шIыным сомэ миллион 49,5-рэ пэIуагъэ­хьагъ. Ащ нэмыкIэу псэуалъэм къыпэIулъ чIыпIэм изэтегъэпсыхьан пае сомэ миллиони 8 къатIупщыгъ. Медицинэ учреждениер мы илъэсым ичъэпыогъу къызэIуахынэу рахъухьэ.Красногвардейскэ гупчэ сымэджэщым иврач шъхьаIэу Бэщыкъо Сусанэ къызэриIуагъэмкIэ, районым ис бзылъфыгъи 140-м ехъу лъэрымыхьэхэм яучет хэт. СменитIукIэ бзылъфыгъэ консультацием нэбгырэ 75-рэ щауплъэкIун алъэкIы. Сомэ миллион 78-м ехъу зыосэ медицинэ оборудование къыфащэфыгъ.Республикэм и ЛIышъхьэ Хьатикъуае зэкIом, амбулаторием игъэцэкIэжьын зэрэлъыкIуатэрэм зыщигъэгъозагъ. Шъугу къэтэгъэкIыжьы Адыгеим и ЛIышъхьэ УФ-м и Президент ишъо­лъыр приемнэ цIыфхэр зыщырегъэблагъэхэм мы Iофыгъор къызэриIэтыгъагъэр. Лъэпкъ проектэу «ГъэшIэ кIыхьэ чаныр» зыфи­Iорэм тетэу псауныгъэм икъэухъумэн фэгъэзэгъэ пэублэ звенэр джырэ уахътэм диштэу зэрэзэтырагъэпсыхьэрэ программэм къыдыхэлъытэгъэ IофшIэнхэр зэхащэх. Ащ пае сомэ миллион 23-м ехъу федеральнэ бюджетым къыхигъэкIыгъ.Медицинэ учреждением иунэ ылъапсэ нахь агъэпытагъ, инженер коммуникациехэр агъэкIэжьыгъэх, пчъэ-шъхьаныгъупчъэхэр зэблахъугъэх, ыкIоцIкIи ыкIыбкIи унэр агъэдэхагъ.Участкэ терапевти 2-мэ, педиатрэм, цашIэм амбулаторием Iоф щашIэ. ПIэкIори 6 зычIэфэрэ стационари, процедурнэ кабинетхэри, IэпыIэгъу зыщаратырэ кабинети ащ хэтых.«Медицинэ IэпыIэгъу дэгъу ягъэгъотыгъэным, сабыйхэр нахьыбэу къагъэхъунхэм, цIыфхэр нахь бэгъашIэ хъунхэм атегъэпсыхьэгъэ пшъэрылъ гъэнэфагъэхэр УФ-м и Президентэу Владимир Путиным тапашъхьэ къыри­гъэуцуагъэх. Ащ хэхьэх медицинэ учреждениеу щыIэхэр джырэ шапхъэхэм адиштэу зэтегъэ­псыхьэгъэнхэр, Iэмэ-псымакIэхэр къэщэфыгъэныр, врачхэр гъэхьазырыгъэнхэр, Iоф щашIэнэу специалистхэр къуа­джэм гъэкIогъэнхэр, цIыфхэр диспансеризацием къыхегъэубытэгъэнхэр ыкIи нэмыкIхэр. «Единэ Россием» илъэпкъ программи а лъэныкъохэр зэкIэ пстэури къыщыдэлъытагъэх. Федеральнэ пащэхэр IэпыIэгъу къытфэхъухэзэ, партиер ти­гъуазэу ащ фэдэ гухэлъхэр тIэкIу-тIэкIузэ щыIэныгъэм щыпхырытщыщтых», — къы­Iуагъ ЛIышъхьэм.Тэхъутэмыкъое районырАР-м и ЛIышъхьэу КъумпIыл Мурат Тэхъутэмыкъое районым социальнэ псэуалъэу щашIыхэрэмрэ щызэтырагъэ­псыхьажьыхэрэмрэ ащыIагъ. Ащ игъусагъэх АР-м иминистрэхэм я Кабинет и Тхьаматэ игуадзэу, Адыгеим финанс­хэмкIэ иминистрэу Виктор Орловыр, АР-м иминистрэхэм я Кабинет и Тхьаматэ игуадзэу Хъоткъо Хъызыр, АР-м псауныгъэм икъэухъумэнкIэ иминистрэу Мэрэтыкъо Рустем, АР-м гъэсэныгъэмрэ шIэныгъэмрэкIэ иминистрэу Евгений Лебедевыр, Тэхъутэмыкъое районым ипащэу Шъэо Аскэр.

ПсэупIэу Прикубанскэм зыщэIэм гурыт еджапIэу N 14-м иигъэкIотыгъэ гъэцэкIэжьын зэрэкIуагъэм зыщигъэгъо­загъ. Лъэпкъ проектэу «Унагъор» зыфиIорэм къыдыхэлъытагъэу сомэ миллион 45-рэ ащ пэIуагъэхьагъ. ПсэолъэшIхэм коммуникациехэр, джэхашъохэр, пчъэхэр ыкIи шъхьаныгъупчъэ блыпкъхэр зэбла­хъугъэх, унэм ыгупэ агъэкIэжьыгъ. Му­ни­ципальнэ къэкIуапIэхэм ахъщэ тедзэу сомэ миллиони 8 къахагъэкIыгъ, чIыпIэм изэтегъэпсыхьан ар пэIуагъэхьагъ, еджа­пIэм щагъэфе­дэщт Iэмэ-псымэхэр сомэ миллиони 4,5-кIэ къащэфыгъэх. ПIалъэу афагъэнэфагъэм нахь псынкIэу IофшIэнхэр аухыгъэх кIэлэеджакIохэр Iоныгъом и 1-м ехъулIэу классхэм арыхьажьынхэм фэшI.ПсэупIэу Инэм дэт гурыт еджапIэу N 25-м илъэсыкIэ еджэгъум ехъулIэу нэбгырэ 1100-м телъытэгъэ псэуалъэм игъэкIотыгъэ IофшIэнхэр щызэшIуахы­гъэх. Лъэпкъ проектым ишIуагъэкIэ сомэ миллиони 175-рэ IофшIэнхэм апэIуагъэ­хьагъ. Муниципалитетым имылъку щыщэу сомэ миллион 20-р еджапIэм къыпэIулъ чIыпIэм изэтегъэпсыхьан, сомэ миллиони 10 фэдизыр унашъхьэм изэблэхъун ыкIи сомэ миллион 34-р еджапIэм изэтегъэпсыхьан апэIуагъэхьагъ.А пстэуми анэмыкIэу унашъхьэр, унэ кIоцI коммуникациехэр, макъэ къэзыгъэIурэ пкъыгъохэр, джэхашъохэр зэблахъугъэх, актовэ залми зэхъокIыныгъэ инхэр фэхъугъэх. Муниципальнэ бюджетым ишIуагъэкIэ Iэмэ-псымэхэр зэблахъунхэ алъэкIыгъ. Спортзалми джырэ уахътэм диштэрэ теплъэ иIэ хъугъэ: дэпкъхэр агъэлагъэх, джэха­шъор, пчъэхэр агъэкIэжьыгъэх.

«Урысыем и Президент кIэщакIо зэрэфэхъугъэм тетэу гъэсэныгъэм исистемэ зэрэхэгъэгоу зэхъокIыныгъэ инхэр щыфэхъух. Тэ тиреспублики амал дэгъу иIэ хъугъэ еджапIэхэр анахь шэпхъэшIухэм адиштэхэу ашIынхэмкIэ. Джырэ уахътэм диштэрэ гъэсэныгъэ, шIэныгъэ куухэр ягъэгъотыгъэнхэм пае псэупIэ пстэуми адэс кIэлэцIыкIухэм зэфэдэ амалхэр ягъэгъотыгъэнхэ фае», — къыIуагъ АР-м и ЛIышъхьэ.Ащ нэужым къэлэ гъэпсыкIэ зиIэ псэупIэу Инэм дэт гупчэу Зэкъошны­гъэм изэтегъэпсыхьан зэрэкIорэр ЛIышъхьэм зэригъэлъэгъугъ. Iэрыфэгъу къэлэ щыIакIэр гъэпсыгъэнымкIэ проект анахь дэгъухэм якъыхэхын фэгъэхьыгъэ Урысые зэнэкъокъоу щыIагъэм а проектым текIоныгъэр къыщихьыгъ. Сомэ миллион 97-рэ ащ игъэцэкIэн пэIуагъэ­хьагъ, лъэпкъ проектэу «ЩыIэныгъэм пае инфраструктурэр» зыфиIорэм ифедеральнэ проектэу «Iэрыфэгъу къэлэ щыIакIэр» зыфиIорэм къыдыхэлъыта­гъэу а мылъкур къыхагъэкIыгъ.

Мыщ плиткэу телъыр зэблахъугъ, къэгъагъэхэм псы атезыкIэщт пкъыгъор, зэралъыплъэхэрэ системэр, архитектурнэ пкъыгъо цIыкIухэр, тIысыпIэхэр агъэ­уцугъэх, джэгупIэхэр ашIыгъэх, кушъхьэ­фачъэхэмкIэ къызщачъыхьан алъэкIыщт чIыпIэхэри агъэнэфагъэх.Республикэм и ЛIышъхьэ пшъэрылъ къыгъэуцугъ а лъэныкъомкIэ проект заулэ зыщызэшIуахырэ къалэу Мыекъуа­пэ IофшIэкIэшIоу щагъэцакIэрэм кIырыплъэнхэу. Мы чIыпIэм щыпсэурэ бзылъфыгъэм Адыгеим и ЛIышъхьэ зыкъыфигъэзагъ «санитарнэ унэкIэ» заджэхэрэри ашIынэу агъэнэфагъэхэм къадыхалъы­тэнэу. КъумпIыл Мурат муниципалитетым пшъэрылъ фишIыгъ ар къыдилъытэнэу ыкIи общественнэ чIыпIэхэм ягъэкIэжьын кIо зыхъукIэ, цIыфхэм игъоу алъэгъу­хэрэр, яшIоигъоныгъэхэр ренэу къыдалъытэхэзэ ашIынэу.

Муниципалитетым ипащэу Шъэо Аскэр къызэриIуагъэмкIэ, 2027-рэ илъэсым Урысые зэнэкъокъоу чIыпIэхэм язэтегъэпсыхьанкIэ къахалъхьагъэхэм щатекIуагъэхэм нэIуасэ афашIыгъэх. Лъэныкъоу «Къэлэ цIыкIухэмрэ псэупIэ пунктхэмрэ» зыфиIорэм щыпхырыкIыгъ урамэу Сединым ыцIэ зыхьырэм къыхиубытэрэ лъэсрыкIо гъогум иигъэ­кIо­тыгъэ гъэцэкIэжьынкIэ проектыр. ПсэупIэу Инэм игупчэу Зэкъошныгъэм изэтегъэпсыхьанкIэ проектым пыдзагъэ фэдэу ар щытыщт.Къэлэ гъэпсыкIэ зиIэ псэупIэу Яблоновскэм Зэкъошныгъэм ипаркэу дэтым изэтегъэпсыхьанкIэ Урысые зэнэкъо­къум къыхиубытэгъэ проект анахь дэгъухэм къахагъэщыгъэхэм зыкIэ ащыщ хъугъэ. Лъэпкъ проектэу «ЩыIэныгъэм пае инфраструктурэр» зыфиIорэм къыдыхэлъытагъэу 2026-рэ илъэсым сомэ миллиони 135-рэ ащ изэшIохын къыфыхагъэкIыгъ.«Яблоновскэр нэбгырэ пчъагъэу щыпсэурэмкIэ Адыгеим иятIо­нэрэ псэупIэу щыт. Ащ дэсхэм япчъагъэ къыхэхъо ыкIи къалэм истатус шIэхэу иIэ хъущт. Унэ-коммунальнэ хъыз­мэтым игъэкIэжьынкIэ, мэшIо­гъэкIосэ къулыкъухэм яIофшIапIэ, сымэджэщыр, цIыфхэм зызщагъэпсэфырэ чIыпIэхэр ыкIи нэмыкIхэр гъэцэкIэжьыгъэнхэмкIэ пшъэры­лъыбэ джыри щыI», — къыхи­гъэщыгъ республикэм и ЛIышъхьэ.Яблоновскэм дэт IэзапIэм иигъэкIотыгъэ гъэцэкIэжьын зэрэкIорэр КъумпIыл Мурат зэригъэлъэгъугъ. Псауныгъэм икъэухъумэнкIэ пэублэ звенэм игъэкIэ­жьын ипрограммэ къызэрэдилъытэрэм тетэу сомэ миллион 45-рэ ащ пэIуагъэ­хьанэу къыхагъэкIыгъ. Мы илъэсым ыкIэм ехъулIэу IофшIэнхэр зэкIэ аухынхэу ары.Бзылъфыгъэ модульнэ консультацием иIофшIэни зэрэкIорэм республикэм и ЛIышъхьэ нэIуасэ зыфишIыгъ. Лъэпкъ проектэу «Унагъор» зыфиIорэм ифедеральнэ проектэу «Ныхэмрэ кIэлэцIыкIухэмрэ къэухъумэгъэнхэр» зыфиIорэм къыдыхэлъытагъэу 2025-рэ илъэсым ар агъэпсыгъагъ. Квадрат метрэ 600 хъурэ унэр ашIыным ыкIи ищыкIэгъэ Iэмэ- псымэхэр егъэгъотыгъэнхэм пае сомэ миллиони 182-рэ къыхагъэкIыгъагъ. Ащ нэужым АР-м и ЛIышъхьэ АдыгеякIэм бассейнэу щашIырэр зэригъэлъэгъугъ. Федеральнэ проектэу «Урысыем испорт» зыфиIорэм тегъэпсыхьагъэу ащ ишIын макIо. ПстэумкIи сомэ миллион 400 IофшIэнхэм апэIуагъэхьащт.Мы илъэсым шэкIогъум ащ епхыгъэ IофшIэнхэр зэкIэ аухынхэу мэгугъэх. Ныбжь зэфэшъхьаф зиIэхэр щесынхэ амал яIэнэу, секциехэри къызэIуахынхэу мэгугъэх. Спорт еджапIэу N 5-р а псэуалъэм епхыгъэ Iофтхьабзэхэм язэшIохын фагъэзагъ.Къуаджэу АдыгеякIэм социальнэ псэуалъэхэу щашIыхэрэм зыкIэ ащыщ нэбгырэ 280-м телъытэгъэ кIэлэцIыкIу IыгъыпIэр. Къати 3-у зэтет унэм квадрат метрэ мини 2,7-м ехъу еубыты. Ащ кабинетхэр, кIэлэцIыкIухэр зычIэсыщт, зыщычъыещтхэ унэхэр, техническэ лъэ­ныкъохэм афытегъэпсыхьэгъэ унэхэр хэтыщтых. Проектым къы­зэрэдилъытэрэм тетэу медицинэ кабинетыр, музыкэмрэ физкультурэмрэ япхыгъэ Iофтхьабзэхэр зыщызэшIуахыщтхэ унэхэри хэтыщтых. 2027-рэ илъэсым ыкIэм ехъулIэу IофшIэнхэр аухынхэу мэгугъэх, сомэ миллион 580-м ехъу ащ пэIуагъэхьащт.«Федеральнэ пащэхэми тимурадхэр пхырытщынхэмкIэ яшIуагъэ къытагъэкIы, илъэс къэс муниципалитетым спортымкIэ, гъэсэныгъэмкIэ псэолъакIэхэр щытэшIых, цIыфхэм ящыIакIэ нахьышIу шIыгъэным тегъэпсыхьэгъэ Iоф­шIэныр тапэкIи лъыдгъэкIо­тэщт», — къыIуагъ АР-м и ЛIышъхьэ.

АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.