Пшъэрылъ шъхьаIэхэр

АР-м иминистрэхэм я Кабинет ипланернэ зэхэсыгъоу Адыгеим и ЛIышъхьэу КъумпIыл Мурат зэрищагъэр АР-м и Прави­тельствэ зычIэт унэм щы­кIуагъ.

Республикэм социальнэ-экономикэ хэхъоныгъэ зэришIыщт лъэныкъо шъхьа­Iэхэм, лъэпкъ проектхэр, къэралыгъо программэхэр зэрагъэцакIэхэрэм мыщ щатегущыIагъэх.Зэхэсыгъом хэлэжьагъэх АР-м и Къэ­ралыгъо Совет — Хасэм и Тхьаматэу Владимир Нарожнэр, министрэхэм я Кабинет и Тхьаматэу КIэрэщэ Анзаур, министрэхэм я Кабинет хэтхэр, муниципальнэ образованиехэм япащэхэр.ЦIыфхэм ящыIэкIэ-псэукIэ зыкъегъэ­IэтыгъэнымкIэ, партиеу «Единэ Россием» ипрограммэ гъэцэкIэгъэнымкIэ Урысыем и Президентэу Владимир Путиным пшъэрылъэу къыгъэуцугъэхэр игъом агъэцэкIэнхэм пае къулыкъу пстэуми зэдырагъаштэу Iоф зэрэзэдашIэн фаер КъумпIыл Мурат къыхигъэщыгъ.

Джыдэдэм зэшIохыгъэн фэе пшъэ­рылъхэм зэу ащыщ гъэсэныгъэ языгъэ­гъотырэ организациехэр илъэсыкIэ еджэ­гъум фэгъэхьазырыгъэнхэр. АР- м гъэсэныгъэмрэ шIэныгъэмрэкIэ иминистрэу Евгений Лебедевыр мы Iофыгъом къытегущыIагъ. Ащ зэрэхигъэунэфы­кIыгъэмкIэ, къулыкъу комиссиехэм рес­публикэм игурыт еджэпIи 139-р илъэсыкIэ еджэгъум фэхьазырэу алъытагъ.Къутырэу Северо-Восточные Сады дэт еджапIэм, Инэм гурыт еджапIэу N 25-м, Прикубанскэ гурыт еджапIэу N 14-м ягъэцэкIэжьын ыкIэм фэкIо. Къэралыгъо программэу «Гъэсэныгъэм зегъэушъомбгъугъэныр» зыфиIорэм диштэу 2022-рэ илъэсым къыщегъэжьагъэу 2025-рэ илъэсым нэс гурыт еджэпIэ 28-мэ гъэцэкIэжьын IофшIэнхэр арашIылIагъэх. КIэлэеджакIохэм атегъэ­псыхьэгъэ мебелымрэ шхапIэхэм яоборудованиерэ агъэкIэжьыгъэх. 2026-рэ илъэсым гурыт еджэпIи 5-мэ ягъэцэ­кIэжьын фежьагъэх, 2027-рэ илъэсым IофшIэнхэр аухыщтых.КъумпIыл Мурат муниципалитетхэм япащэхэм пшъэрылъ афишIыгъ гъэсэны­гъэ языгъэгъотырэ организациехэм ягъэ­цэкIэжьын зэрэкIорэм гъунэ лъа­фы­нэу, псэуалъэр затын фэе пIа­лъэр амыукъо­нэу, гурыт еджапIэхэм ящагу­хэм язэтегъэпсыхьан анаIэ атырагъэтынэу.АР-м гъэсэныгъэмрэ шIэныгъэмрэкIэ иминистрэ еджапIэхэм якабинетхэм язэтегъэпсыхьанкIэ, зэрэрагъэджэрэ тхылъхэр еджапIэхэм аIэкIэгъэхьэгъэнхэмкIэ Iофэу ашIэрэм фэгъэхьыгъэу къыIотагъ. Зэрэрагъэджэрэ тхылъхэр ыпкIэ хэмылъэу еджэпIэ пстэуми аратыгъэх. ЕджэпIэ библиотечнэ фондым игъэкIэжьын ыуж итых. Я 8 — 10-рэ классхэм арысхэм апае мыгъэ тари­хъымкIэ ыкIи обществознаниемкIэ тхылъ­хэр къащэфыгъэх. 2027-рэ илъэсым иублэгъу предметыкIэу «Духовно-нравственная культура России» зыфиIорэмкIэ зэрэрагъэджэщтхэ тхылъхэр къащэфыщтых. А 1-рэ классхэм арыхьащтхэм Iалъмэкъхэр ятыгъэным тегъэпсыхьэгъэ Iофтхьабзэр зэрэзэхащагъэмкIэ минист­рэм зэфэхьысыжьхэр къышIыгъэх.Гъэсэныгъэ языгъэгъотырэ органи­зациехэр террористическэ актхэм ащыухъумэгъэнхэм, сигнализациехэм, ви­деокамерэхэм, машIор зэрагъэкIосэжьырэ пкъыгъохэм Iоф ашIэным япхыгъэ Iофыгъохэм мыщ щатегущыIагъэх. ОшIэ-­дэмышIэ тхьамыкIагъо къызыхъукIэ, гъэсэныгъэ языгъэгъотырэ организациехэм, ухъумэным пылъ предприятиехэм яIофышIэхэм зэрэзекIонхэ фаер къафаIотагъ. Къуаджэхэм адэс кIэлэеджа­кIохэр щынэгъончъэу еджапIэм щэгъэнхэм ыкIи къэщэжьыгъэнхэм епхыгъэ Iофыгъоми анаIэ зэхэсыгъом щытырагъэтыгъ. Автобуси 120-мэ ахэр гурыт еджапIэм ращалIэх. 2026-рэ илъэсым муниципалитетхэм джыри автобус 14 къафащэфыщт.КъумпIыл Мурат гъэсэныгъэмрэ шIэныгъэмрэкIэ и Министерствэ пшъэрылъ фишIыгъ профильнэ классхэр зэхэщэ­гъэнхэу. АР-м культурэмкIэ и Минис­терствэрэ IэпэIасэхэм яобщественнэ организациехэмрэ ягъусэу лъэпкъ IэшIа­гъэхэм кIэлэцIыкIухэр апыщэгъэнхэмкIэ ищыкIэгъэ амалхэр зэрихьанэу игъо филъэгъугъ.2026 — 2027-рэ илъэсхэм ябжы­хьэ-кIымэфэ лъэхъан псэупIэ-коммунальнэ комплексым ипсэуалъэхэр зэрэфэхьазырхэми зэхэсыгъом щыхэплъагъэх. АР-м псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ иминистрэ иапэрэ гуадзэу Лафышъэ Рэмэзан къызэриIуагъэмкIэ, 2026 — 2027-рэ илъэсхэм ягъэфэбэгъу лъэ­хъан псэупIэ-коммунальнэ комплексымрэ социальнэ лъэныкъомрэ япсэуалъэхэр фэгъэхьазырыгъэнхэмкIэ республикэм имуниципальнэ образованиехэм IофшIэнхэр ащырагъэжьагъэх. Котельнэ 260-мэ, фэбэрыкIопIэ километрэ 288-мэ, гъэ­фэбэпIэ пункт 25-мэ IофшIэнхэр ащызэхащэх. Джащ фэдэу газрыкIопIэ километрэ мини 4,5-м ехъур, псыIыгъыпIэ 286-р, псырыкIопIэ, канализацие километрэ 2700-р кIымафэм фагъэхьазыры. Мы илъэсым мэкъуогъум и 1-м къыщегъэжьагъэу Iоныгъом и 18-м нэс фабэр аIэкIэзыгъэхьэрэ организациехэр бжы­хьэмрэ кIымафэмрэ зэрафэхьазырхэмкIэ уплъэкIунхэр зэхащэщтых.ПсэупIэ-коммунальнэ хъызмэтым ипредприятиехэм, бюджет организациехэм, цIыфхэм электроэнергиеу агъэфедагъэмкIэ чIыфэу ателъым къафыщыгъэкIэгъэнэу пшъэрылъ къэуцугъ. Муниципальнэ образованиехэм япащэхэм мы лъэныкъомкIэ амалэу яIэхэм ягугъу зэхэсыгъом къыщашIыгъ. Предприятие заулэмэ япащэхэм чIыфэхэр къафегъэIыхыгъэнхэмкIэ планыр зэрагъэцакIэрэр къаIотагъ.ЛIышъхьэм муниципальнэ образованиехэм, фабэр аIэкIэзыгъэхьэрэ организациехэм япащэхэм пшъэрылъ афи­шIыгъ чIыфэу ателъхэр къаIыхыжьыгъэ­нымкIэ IофшIэныр нахь агъэлъэшынэу, муниципалитетхэр зэкIэ кIымафэм дэгъоу фэгъэхьазырыгъэнхэу. Iоныгъом и 30-м нэс Ростехнадзорым щыкIагъэу къафилъэгъугъэхэр зэкIэ дагъэзыжьын фае. ШэкIогъум и 15-м ехъулIэу гъэ­фэбэгъу лъэхъаным зэрэфэхьазырхэмкIэ паспортхэр муниципальнэ образование пстэуми яIэн фае.АР-м и ЛIышъхьэ ипресс-къулыкъу къытырэ къэбархэмкIэ ЛIышэ Саныет.