Анцокъо И.
ЭкономикэмкIэ апшъэрэ еджапIэм лъэпкъ ушэтынымкIэ и Университет щеджэхэрэмрэ Iоф щызышIэхэрэмрэ мы мафэхэм Адыгеим щыIэх. Культурэ зекIонымкIэ республикэм амалэу иIэр зэрагъэшIэщт, УрысыемкIэ зекIо гъогууанэхэм тишъолъыр зэрахэуцон ылъэкIыщтыр агъэунэфыщт.
Ащ пае ыпэрапшIэу Москва къикIыгъэ хьакIэхэм музейхэм нэIуасэ зафашIыщт. ДжырэкIэ АР-м и Лъэпкъ музей, КъокIыпIэ лъэпкъхэм я Къэралыгъо музей икъутамэу Адыгеим итым ащыIэгъахэх. Якъэгъэлъэгъонхэм, ятарихъ, хъарзынэщэу яIэхэм, яIофышIэхэм нэIуасэ зафашIыгъ, яамалхэм защагъэгъозагъ. АлъэгъугъэхэмкIэ пэшIорыгъэшъ зэфэхьысыжьхэри ашIыгъахэх.— Музейхэм яинагъэ, хъарзынэщэу яIэр, шIэныгъэшхо зыIэкIэлъ цIыфэу ащылажьэхэрэр дгъэшIэгъуагъэхэм ащыщ. ЗекIозещэу ачIэтхэм уядэIугъэ зэпытыгъэкIи уязэщыщтэп. «Мыекъуапэ укъызыкIокIэ, музейхэр зы мэфэ Iоф» аIоу зэхэсхыгъ, ау арэущэтэу зэрэщымытыр къызгурыIуагъ. Ары пакIошъ, зы музеимкIэ мафэр макIэ. Ахэм якъэбар пIотэ зэпытын фаеу сэлъытэ. Адыгеим икъушъхьэхэр зэрагъэлъэгъун къодыем пае зекIохэр къэмыкIохэу, культурэм, музеим икъэгъэлъэгъонхэм къапкъырыкIыхэзэ шъолъырым итарихъ зэрагъэшIэн фае, — къыIуагъ Римма Погодинам, экономикэмкIэ апшъэрэ еджапIэм лъэпкъ ушэтынымкIэ и Университет икъутамэ идоцент.Мы еджапIэм щеджэхэрэмрэ икIэлэегъаджэхэмрэ илъэс къэс шъолъырхэр къакIухьэх. Ежь ашъхьэкIи, цIыфхэм апайи ахэр лъэныкъуакIэмкIэ, культурэмкIэ, къызэIуахых. Хэтрэ зекIокIи шъолъырым нэIуасэ зыфэшIыгъэныр музейхэм къащежьэн фаеу ахэм алъытэ.— ДжырэкIэ Iофэу тшIэрэм къыкIэлъыкIощтыр нэгъэсыгъэу тшIапэрэп. Ау тидэкIыгъо IофшIэн изэфэхьысыжьхэм лъэныкъуитIумкIи, тэркIи шъолъырым имузейхэмкIи, шIуагъэ къэзытыщт проектхэр къакIэлъыкIонхэ ылъэкIыщт. Хэта зышIэрэр, Урысыем ишъолъырхэр зыхэхьащт культурнэ гъогууанэ зэхэдгъэуцонэу хъункIи хъун, — къыхигъэхъуагъ Римма Погодинам.Москва къикIыгъэ купыр Iоныгъоми 3-м нэс Адыгеим щылэжьэщт. Музейхэм афэшъхьафэу зекIор шъолъырым къихьэмэ лъэгъупхъэ чIыпIэхэмкIэ къэбар къэкIуапIэ хъущт пкъыгъохэмкIэ, гъуазэхэмкIэ зэрэзэтегъэпсыхьагъэхэм защагъэгъозэщт, инэпэеплъ пкъыгъохэмкIэ Iофым изытет зэрагъэшIэщт.Анцокъо Ирин.