Лъэпшъыкъо Ф.
Республикэ общественнэ движениеу «Адыгэ Хасэр» ыкIи «Адыгеим иныбжьыкIэхэр» икIэщакIохэу гъэмэфэ зыгъэпсэфыгъо мафэхэм адыгэ джэгухэр Мыекъопэ гупчэ паркым щызэхащэх. КъэшъокIо ансамблэу «Абрекхэр», орэдыIо ансамблэу «Сэридай» джэгу зэкIэлъыкIохэр агъэджэгугъ.
НыбжьыкIэхэм я Урысые Союз и Адыгэ шъолъыр къутамэ итхьаматэу Абрэдж Заур Iофтхьабзэм къытегущыIагъ.— Культурнэ кIэн баеу лъэпкъым иIэр зыщызэхэугъоегъэ джэгум мэхьэнэ гъэнэфагъэ иI. Орэд мэкъамэмрэ къашъомрэ лIэужхэр зэрепхых. Проектым къыдыхэлъытагъэу джэгуи 10 зэхэтщагъ, 3-р Гупчэу «Адыгеим иныбжьыкIэхэм» ищагу щыкIуагъ. ЗыкIыныгъэмрэ зэкъошныгъэмрэ къашъом къыщежьэ пIоми хъущт. Лъэпкъ зэфэшъхьафхэм якъашъохэр тиджэгухэм къащашIых. ТиныбжьыкIэхэр чаных, нэбгырэ 200-м ехъоу пчыхьэзэхахьэмэ къякIолIагъ. Ахэр лъэпкъым рыгушхохэу, тишэн-хабзэхэм арыгъуазэхэу пIугъэнхэр пшъэрылъ зыфэтшIыжьыгъ. ТапэкIи проектым иIофшIэн лъыдгъэкIотэщт,— къыIуагъ Абрэдж Заур.
Джэгум къыдыхэлъытэгъэ шэн-хабзэхэр зэрихьэзэ, джэгуакIоу, Адыгэ Республикэм изаслуженнэ артистэу, адыгэ къэшъокIо ансамблэу «Абрекхэр» зыфиIорэм ипащэу ТхьакIумэщэ Налбек Iофтхьабзэхэр зэрищагъ.— Мыщ фэдэ пчыхьэ джэгухэм ныбжьыкIэхэмкIэ мэхьанэшхо яI. Ащ иамалхэмкIэ шэн-хабзэхэр нахь дэгъоу зэрагъашIэх, нэIуасэ зэфэхъух, ныбджэгъуныгъэр азыфагу илъ мэхъу. Лъэшэу тынаIэ зытетыдзэн фаер къэшъуакIохэмкIи, джэгум еплъынэу къекIолIагъэхэмкIи лъэпкъ джэгум идэхагъэ къэдгъэлъэгъоныр ары, — еIо ТхьакIумэщэ Налбек.Ижъырэ лъэхъанхэм къащегъэжьагъэу непэ къызнэсыгъэм адыгэхэм хэбзэ гъэнэфагъэхэр къяшIэкIыгъэх. А хэбзэшIухэм язы Iахь адыгэ джэгум къыщыгъэлъэгъуагъ. БлэкIыгъэмрэ къэкIощтымрэ зыщызэрихьылIэрэ пчэгум тихабзэ илъэныкъо пстэури епхыгъ: цIыфхэр зэрэзэхэтыщтхэр, узэрэзэдэзекIощтыр, бзылъфыгъэмрэ хъулъфыгъэмрэ язэфыщытыкI, укъызэрэзэдэшъощтыр, Iэдэбныгъэ-шъхьэкIэфэныгъэр.Адыгэм гъашIэм къыщыдекIокIырэ пкъыгъохэм, мэкъэмэ дахэхэр къэзытырэ лъэпкъ Iэмэ-псымэхэм пщынэр ащыщ. Iэмэ-псымэхэм ансамблэу «Сэридай» икIэщакIоу, ипщынаоу Абэсэ Долэт джэгу зэкIэлъыкIохэр дахэу ыгъэджэгугъэх.— ЦIыфхэр зы чIыпIэ щытыугъоинхэр, гуфэбэныгъэ зыхэлъ пчыхьэ джэгу редгъэкIокIыныр зигукъэкI кIэщакIохэм тигуапэу адедгъэштагъ. Лъэпкъ культурэр къэухъумэгъэныр ыкIи ныбжьыкIэхэм ягъэшIэгъэныр, ахэр къашъом ыбзэкIэ зыщызэдэгущыIэщтхэ пчэгур афэгъэпсыгъэныр, пщынэ мэкъамэр дгъэIуныр — джары тикупкIэ типшъэрылъыгъэхэр, — къыIуагъ Абэсэ Долэт.ЗэхэщакIохэм къызэрэхагъэщыгъэмкIэ, пшъэрылъэу зыфагъэуцужьырэр хэукъоныгъэ хамышIыхьэу, ижъырэ къэшъуакIэм, гъэпсыкIэм, пэсэрэ къэIуакIэм атетэу Iофтхьабзэр рагъэкIокIыныр ары. Шъыпкъэ, непэрэ уахътэм диштэу кIэ горэ хамыгъэхьан алъэкIырэп, дунаир зэхъокIы, ау къекIоу, егъэлыегъащэу щымытэу.